Ɛbalie Ɛzonlenlɛ Wɔali Wɔ Ɛbɛlabɔlɛ Kpalɛ Nwo Ɔ?
Sylvia, mɔɔ nea mgbanyinli la ka kɛ, “Me nee menli dɔɔnwo mɔɔ bɛkile kɛ bɛsonle Nyamenle la a hɔle kɔlegyi a. Noko, ɛnee bɛwua wɔ sɔnea nu na bɛno nyiletane. Ɛzonlenlɛ ɛngakyi bɛ ɛbɛlabɔlɛ.”
Nrenya bie mɔɔ bɛfɛlɛ ye Lionel la ka kɛ: “Me gɔnwo mɔ gyimayɛvoma bɔ adalɛ na bɛfɛlɛ kɛ bɛnde kpɔkɛ wɔ mekɛ mɔɔ bɛte kpɔkɛ la. Bɛkɔ asɔne noko bɛnva bɛmbɔ ɛbɛla—ɔle kɛ mbia mɔɔ bɛfa bɛkile menli ala la.”
Ɛzonlenlɛ ɛngola ɛngakyi menli dɔɔnwo ɛbɛlabɔlɛ. Ɛnɛ, menli dɔɔnwo sɔ “nyamenlezonlenlɛ nu” noko bɛnlie “ye tumi kpalɛ ne” bɛndo nu. (2 Temɔte 3:5) Bɛ asɔne mgbanyima ɛnyɛ neazo kpalɛ; yɛɛ ɛsɔfo ne mɔ noko ɛnva Ngɛlɛlera ne anu folɛdulɛ mɔɔ ɔwɔ kɛ bɛ mboane ne mɔ fa bɔ bɛ ɛbɛla la ɛmmaa bɛ. Ɔnyɛ nwanwane kɛ menli dɔɔnwo die di kɛ Nyamenle ɛndwenle bɛ ɛbɛlabɔlɛ nwo la.
DUZU A BAEBOLO NE KILEHILE A?
Baebolo ne kile kɛ Nyamenle te nganeɛ na ɔdwenle kɛzi yɛbɔ yɛ ɛbɛla la anwo kpalɛ. Mekɛ mɔɔ tete Yizilayɛma dele Nyamenle anwo atua la, “bɛmanle ɔlile nyane.” (Edwɛndolɛ 78:40) Noko akee, saa awie kakyi fi ye nyɛleɛ ɛtane nwo a, “anyelielɛ” kpole ba anwuma lɔ. (Luku 15:7) Saa awie nyia yɛ anwuma Selɛ ne subane ngɛnlɛma ne anwo anyezɔlɛ a, ɛhulolɛ mɔɔ ɔlɛ ɔmaa Nyamenle la banyi na yeaha ye yeamaa yeahulo mɔɔ Nyamenle kulo la na yeahyi mɔɔ Nyamenle kyi la.—Emɔso 5:15.
KƐZI GYIHOVA ALASEVOLƐ YƐ BƐ ƐDEƐ NE Ɛ?
Deseret News mɔɔ wɔ Salt Lake City, Utah, U.S.A. la hanle Gyihova Alasevolɛ anwo edwɛkɛ kɛ, “bɛboa bɛmaa mbusua gyinla kpundii, bɛboa bɛmaa menli di nɔhalɛ na bɛnyia subane kpalɛ.” Adwelie kɛlata ne doale zo kɛ: “Nuhua menli fa ɛbɛlabɔlɛ ngyinlazo kpalɛ bɔ bɛ ɛbɛla. Bɛdie bɛdi kɛ sigalɛte ɛnlonlɛ, nzabolɛ, nyiletane, kyakyadolɛ, adwɔmanebɔlɛ nee mrenya mɔɔ fa mrenya la le nyɛleɛ mɔɔ kola sɛkye awie sunsum nu gyinlabelɛ a.”
Asoo asɔne mgbanyima ɛboa bɛ mboane ɛmaa bɛva Nyamenle ɛbɛlabɔlɛ nwo ngyinlazo bɛbɔ bɛ ɛbɛla?
Kɛzi Nyamenle subane ne mɔɔ Alasevolɛ ne mɔ ɛzukoa nwolɛ debie la ɛboa bɛ ɛ? Sylvia mɔɔ yɛlumua yɛha ɔ nwo edwɛkɛ la ka kɛ, “Adalɛ ɛbu zo wɔ ayileyɛlɛ gyima ne anu. Ɔnyɛ se kɛ mebayɛ bie. Noko nganeɛ mɔɔ menwu kɛ Gyihova * te wɔ nwolɛ la ɛboa me ɛmaa meyɛ mɔɔ le kpalɛ la. Me nye die yɛɛ me nzo nu ɛdwo me.” Sylvia die to nu kɛ mɔɔ ɔdie ɔdi wɔ ye ɛzonlenlɛ ne anu na ɔfa ɔbɔ ye ɛbɛla la ɛmaa ye ɛbɛlabɔlɛ ɛyɛ kpalɛ.
^ ɛden. 9 Baebolo ne kile kɛ Nyamenle duma a le Gyihova.
