Bɛwole me wɔ Riga, mɔɔ le Latvia suakpole ne azo. Me mame a tetele me nee me diema raalɛ ne a. Ɛnee me Mame kɔ Katɔlek ɛdeɛ, noko ɛnee yɛkɔ asɔne wɔ mekɛ mɔɔ bɛlɛdi asɔne nu ɛvolɛ bie la. Ɛnee dahuu medie medi kɛ tumi kpole bie wɔ ɛkɛ, noko me mgbavolɛ nu, ɛnee me nye die ninyɛne ngakyile nwo.

Mekɛ mɔɔ melɛnyi la, me mame nwunle kɛ mekola metudu ninyɛne na mekyehyɛ ye bieko. Ɛnee ninyɛne dɔɔnwo wɔ sua nu ɛkɛ mɔɔ bɛtudu a ɔyɛ boɛ a, yemɔti ɛnee ɔgyegye ye kɛ ɔbagyakyi me ngomekye wɔ sua nu. Yemɔti ɔvale bulalɛ bie mɔɔ bɛtudu bɛkyehyɛ la ɔmanle me, na ɛnee me nye die kɛ mebahyehyɛ na meadudu. Anyelielɛ ɛhye manle me nye liele debie bieko anwo—motohanlɛ. Me mame vale me wulale moto ɛzulɛ bie mɔɔ bɛfɛlɛ ye Zelta Mopēds (Motohanlɛ Kpalɛ) la anu. Membɔle ɔ bo kɛ meka moto ngyikyi, na nzinlii, menganle moto kpalɛ.

Ɛnee ɔngyɛ na meanwu debie yɛ yemɔti yeangyɛ menyianle anyuhɔlɛ ndɛndɛ wɔ nwɔhoa ɛhye mɔɔ esiane wɔ nu la anu. Menliele Latvia moto dɔɔnwo ɛzulɛ ɛzukoalɛ amodinli ne, na menliele Baltic Maanle Ne Mɔ Moto Ɛzulɛ Amodinli ne fane nwiɔ.

Mekɛ mɔɔ menliele duma wɔ motohanlɛ ne anu la, Evija, bɛlɛra mɔɔ me nee ye wɔ ɛkɛ (mɔɔ nzinlii ɔrayɛle me ye) la yiale Gyihova Alasevolɛ. Ɛnee yenyia bɛ mbuluku ne mɔ bie mɔɔ address wɔ ɔ nzi mɔɔ bɛfa bɛbiza Baebolo ɛzukoalɛ nwo adenle la. Ɔluale address ne azo ɔhɛlɛle bɛ. Yeangyɛ, Alasevolɛ nwiɔ rale ye ɛkɛ na ɔbɔle ɔ bo ɔ nee bɛ zukoale Baebolo ne. Ɛnee ɔngyegye me, noko zɔhane mekɛ ne ɛnee me nye ɛnlie asɔne nwo.

Nzinlii, Alasevolɛ ne mɔ hanle hilele me kɛ mendɛnla Evija Baebolo ɛzukoalɛ ne anu na mendie bie. Menyɛle ye zɔ na me nye liele mɔɔ mendele la anwo. Debie ko mɔɔ hanle me ahonle titile la a le Baebolo ne ɛwɔkɛ mɔɔ fane azɛlɛ  ye azo paladaese bie anwo la. Kɛ neazo la, bɛvale edwɛkɛ mɔɔ wɔ Edwɛndolɛ 37:10, 11 mɔɔ se: “Ɔnrɛhyɛ biala ɛnee amumuyɛnli ne abo zo ɛminli, ɛbahɔnlea ɛleka mɔɔ ɔwɔ la, na ɛnrɛnwu ye. Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo” la bɛhilele me. Me nye liele zɔhane ɛwɔkɛ ne anwo kpalɛ.

Mengɔle zo menyianle sunsum nu ninyɛne nwo anyelielɛ. Membɔle ɔ bo menwunle adalɛ dɔɔnwo mɔɔ wɔ asɔne nu la. Noko, me nye liele Baebolo ngilehilelɛ nwo ɔluakɛ ndelebɛbo wɔ nu yɛɛ nuhua la ɛkɛ ne kɛnlɛma.

Mekɛ mɔɔ melɛsukoa Baebolo ne la, menwunle kɛzi Gyihova bu ngoane kpole, nee kɛzi ɔsonle bolɛ ɔmaa ye la. (Edwɛndolɛ 36:9) Yemɔ hanle adwenle mɔɔ melɛ ye wɔ moto ɛzulɛ ne anwo la—ɛnee mengulo kɛ mebava me ngoane meado esiane nu bieko. Emomu, ɛnee mekulo kɛ mefa me ngoane mewula Gyihova anyunlunyia. Ɛhye ati, ɛnee akee dumalielɛ, anyunlunyia nee anyelielɛ mɔɔ wɔ motohanlɛ nu la ɛngyia me bieko.

Wɔ 1996, mengɔle Gyihova Alasevolɛ maanle maanle avinli nyianu mɔɔ bɛyɛle ye wɔ Tallinn, mɔɔ wɔ Estonia la, ɛnee ɔ nee ɛleka mɔɔ meta mekɔ moto ɛzulɛ ne la avinli anwa. Wɔ nyianu ne abo, menwunle menli mɔɔ vi maanle ngakyile nu mɔɔ bɛyia nu wɔ koyɛlɛ nee anzondwolɛ nu la. Kɛ neazo la, mekɛ mɔɔ Dasevolɛ ko baage minlinle la, menzuzule kɛ ɔnrɛnwu ye bieko ɛlɛ. Noko yeangyɛ, Dasevolɛ bie nwunle baage ne na ɔvale ɔrale mɔɔ ɛhwee aminli a. Ɔzinle me nwo kpole kpalɛ! Akee mendele ɔ bo kɛ Alasevolɛ ne mɔ fa ngyinlazo kpalɛ mɔɔ wɔ Baebolo ne anu la bɔ bɛ ɛbɛla amgba. Me nee Evija doale yɛ debiezukoalɛ ne azo, na bɛzɔnenle yɛ wɔ 1997 kɛ Gyihova Alasevolɛ.

Me gɔnwo mɔ bie ɛwu, ɔluakɛ bɛfa moto ne bɛnriandi mgbane mgbane la ati. Baebolo ne mɔɔ menzukoale la manle menwunle kɛ melɛ ɛzonlelilɛ wɔ ngoane Maavolɛ, Gyihova anyunlu. Bie a ndelebɛbo ɛhye a liele me ngoane a.

Me nee Evija nyianle nwolɛ adenle yɛvale ɛvolɛ nna yɛzonlenle wɔ dahuu ɛzonlenlɛ gyima ne anu wɔ Gyihova Alasevolɛ ɔfese ne mɔɔ wɔ Riga la anu. Kɛkala yɛ nye die kɛ yɛlɛtete yɛ ra raalɛ, Alise, na yɛlɛboa ye yeamaa yeanyia Gyihova anwo ɛlɔlɛ kpole la. Dapɛne biala, menyia nwolɛ adenle mefa kenle ko mekɔ ɔfese ne mɔɔ bɛkile edwɛkɛ bo wɔ ɛkɛ la anu na meyɛ kale nee ninyɛne gyɛne mɔɔ ɛzɛkye la boɛ. Ɔmaa me nye die kpalɛ kɛ melɛfa mɔɔ menzukoale ye me ngakula nu meali gyima kpalɛ la! Ɛhɛe, melɛkɔ zo meadudu ninyɛne na meahyehyɛ ye bieko.

Me nye die kɛ menyia adenle na me nee me abusua ne ɛlɛdi nɔhalɛ Nyamenle ne anwo daselɛ la, ɛhye amuala ɛyɛ boɛ ɔlua mɔɔ menzukoale menvile Baebolo ne anu la. Nɔhalɛ nu, azɛlɛ ye azo paladaese ɛwɔkɛ ne hakyile me subane!