Baebolo ne maa yɛnwu mɔɔ Gyihova nee ɔ Ra, Gyisɛse Kelaese bayɛ wɔ amaneɛnwunlɛ mɔɔ Seetan Abɔnsam ɛva ɛra la anwo wienyi. Baebolo ne ka kɛ: ‘Deɛmɔti Nyamenle Ara Gyisɛse, rale la a le kɛ ɔbazɛkye Abɔnsam gyima biala mɔɔ yeli la.’ (1 Dwɔn 3:8) Ewiade ɛtane ɛhye mɔɔ anyebolo, ɛkpɔlɛ nee esiane wɔ nu la bazɛkye. Gyisɛse bɔle ɛwɔkɛ kɛ, “bɛbadu Seetan mɔɔ sie ɛtane ewiade ɛhye la bɛavi ɛkɛ.” (Dwɔn 12:31) Bɛye Seetan tumi ne bɛfi ɛkɛ a, bɛbava tenlene ewiade fofolɛ bɛazie ɛkɛ, na ewiade ɛhye bayɛ anzondwolɛ ɛleka.—2 Pita 3:13.

Na menli mɔɔ kpo kɛ bɛbahakyi bɛ ndenle na bɛkɔ zo bɛyɛ ninyɛndane la ɛ? Suzu ɛwɔkɛ ɛhye mɔɔ anu la ɛkɛ wienyi la anwo nea: ‘Menli mɔɔ di boɛ la badɛnla azɛlɛ ne azo, yɛɛ menli mɔɔ anwo ɛnlɛ edwɛkɛ la baha zolɛ. Bɛbaye amumuyɛma bɛavi azɛlɛ ne azo, na bɛadu ngunzima bɛavi zolɛ.’ (Mrɛlɛbulɛ 2:21, 22) Ɛtanevolɛma mɔɔ yɛ mgbane mgbane la bɛavi ɛkɛ. Wɔ anzondwolɛ tɛnlabelɛ zɛhae anu, alesama mɔɔ yɛ tieyɛ la anwo bɛadɔ bɛ ngyikyingyikyi avi ɛtane nwo.—Wulomuma 6:17, 18; 8:21.

Wɔ zɔhane ewiade fofolɛ ne anu, kɛzi Nyamenle baye ninyɛndane avi ɛkɛ ɛ? Ɔnrɛlie alesama fanwodi ɔnrɛvi bɛ sa nu na ɔnrɛmaa bɛnrɛyɛ kɛ robɔt la. Emomu, ɔbahilehile alesama mɔɔ yɛ tieyɛ la ye ndenle, na yeaboa bɛ yeamaa bɛahakyi adwenle nee subane ɛtane mɔɔ bɛlɛ la.

Duzu a Nyamenle bayɛ wɔ esiane nwo a? Yebɔ ɛwɔkɛ kɛ ɔnrɛhyɛ ye Belemgbunlililɛ ne bali azɛlɛ ye azo tumi. Gyisɛse Kelaese, mɔɔ kola yɛ wuleravolɛma ayile la a Nyamenle ɛkpa ye kɛ zɔhane Belemgbunlililɛ ne azo Belemgbunli a. (Mateyu 14:14) Gyisɛse eza lɛ tumi wɔ abɔdeɛ nu ninyɛne zo. (Maake 4:35-41) Ɛhye ati, amaneɛnwunlɛ mɔɔ ‘mekɛ nee ninyɛne mɔɔ bɛ nye ɛnla’ fa ba la bɛavi ɛkɛ. (Nolobɔvo ne 9:11) Wɔ Kelaese tumililɛ bo, munzule biala ɛnrɛdo alesama.—Mrɛlɛbulɛ 1:33.

Na menli mgbe dɔɔnwo mɔɔ bɛnze nwolɛ bie mɔɔ bɛwu alɔbɔlɛ ewule la ɛ? Mekɛ mɔɔ Gyisɛse dwazole ɔ gɔnwo Lazalɛse wiele la, ɔhanle kɛ: “Mame a mele ewudwazo ne nee ngoane ne a.” (Dwɔn 11:25) Amgba, Gyisɛse lɛ tumi mɔɔ ɔbava yeadwazo, anzɛɛ yeamaa menli mɔɔ ɛwu la azia ara ngoane nu bieko a!

Saa ɛ nye die nwo kɛ ɛbadɛnla ewiade mɔɔ esiane ɛnrɛdo kpalɛma wɔ nu la anwo a, ɛnee duzu ati a ɛnva ɛnzie ɛ nye zo kɛ ɛbazukoa Baebolo ne na wɔanwu nɔhalɛ Nyamenle ne nee ye bodane ne anwo ninyɛne dɔɔnwo a? Gyihova Alasevolɛ mɔɔ wɔ ɛleka mɔɔ ɛwɔ la bava anyelielɛ aboa wɔ bɛamaa wɔanyia zɔhane ndelebɛbo ne. Yɛto ɛsalɛ yɛavɛlɛ wɔ kɛ nwu Gyihova Alasevolɛ mɔɔ bɛwɔ ɛleka mɔɔ ɛde la anzɛɛ kɛlɛ menli mɔɔ yɛ magazine ɛhye la.