“NYAMENLE le Sunsum,” alesama ɛngola ɛnnwu ye. (Dwɔn 4:24) Noko, Baebolo ne ka kɛ menli bie ɛnwu Nyamenle. (Hibuluma 11:27) Kɛzi ɔkola ɔyɛ zɔ ɛ? Asoo ɛbahola wɔanwu “Nyamenle ne mɔɔ ɛnyelɛ ɛnnwu ye la”?—Kɔlɔsaema 1:15.

Fa yɛ gyinlabelɛ ne toto awie mɔɔ bɛkawo ye la ɛnee ɔ nye ɛzi la anwo nea. Asoo ɔ nye mɔɔ ɛnzi la ɛmmaa ɔnde debie biala mɔɔ kɔ zo wɔ ewiade ne anu la abo? Kyɛkyɛ. Anyezinliravolɛ te edwɛkɛ wɔ ndenle ngakyile zo mɔɔ boa ye maa ɔnwu menli, ninyɛne yɛɛ gyima mɔɔ ɛlɛkɔ zo la. Nrenya ko mɔɔ anye ɛzi la hanle kɛ: “Debienwunlɛ ɛnle ɛnyelɛ nu, ɔwɔ adwenle nu.”

Zɔhane ala a ɛngola ɛnva ɛ nye mgbane ɛnnwu Nyamenle, noko ɛkola ɛfa wɔ ‘adwenle ɛnyelɛ’ ne ɛnwu ye a. (Ɛfɛsɛsema 1:18) Suzu ndenle nsa mɔɔ ɛbahola wɔalua zo wɔayɛ zɔ la anwo.

Anyezinliravolɛ te nganeɛ kpole wɔ debie mɔɔ ɔkɛnwu ye nee mɔɔ ɔkɛzɔ nu la anwo, na ɔboa ye ɔmaa ɔnwu ninyɛne mɔɔ ɔngola ɔnva ɔ nye ɔnnwu ye la. Zɔhane ala a ɛbahola wɔava kɛzi ɛte nganeɛ la wɔanleɛnlea ewiade ne anu na wɔanwu Nyamenle ne mɔɔ bɛnnwu ye la a. ‘Ye su kpalɛ ne mɔɔ yɛ nye ɛnnwu ye la da ali wienyi, ɔluakɛ menli nwu ɛhye wɔ ninyɛne mɔɔ Nyamenle ɛbɔ la anu.’—Wulomuma 1:20.

Kɛ neazo la, suzu yɛ aako ne anwo nea. Bɛanyɛ yɛ azɛlɛ ye kɛ yɛdɛnla zolɛ ala, na kɛ yɛ nye balie wɔ zolɛ. Saa yɛdie anwoma kɛnlɛma, yɛte ewia, yɛdi bakama fɛlɛko bie, anzɛɛ yɛte anloma ɛzunlɛ kɛnlɛma a, yɛ nye die. Asoo ahyɛlɛdeɛ ɛhye mɔ ɛmmaa yɛnnwu yɛ Bɔvolɛ ne adwenle, ye ɛlɔlɛ nee ye kpalɛyɛlɛ ɔ?

Duzu a ninyɛne mɔɔ ɛnwu ye wɔ ewiade ne anu la maa ɛsukoa wɔ Nyamenle anwo a? Nuhua ko a le kɛ, anwuma da Nyamenle tumi ne ali. Abɔdeɛ nwo nrɛlɛbɛ daselɛ ko mɔɔ ɛra kenle nsa ye la kile kɛ ewiade ne anu ɛlɛtɛlɛ ndɛndɛ adɛla mekɛ biala! Saa ɛnea anwomanyunlu nɔɔzo a, biza ɛ nwo kɛ: ‘Tumi ne mɔɔ ɛlɛmaa ewiade ne anu adɛlɛ ndɛndɛ la vi ni?’ Baebolo ne ka kile yɛ kɛ Bɔvolɛ ne lɛ ‘anwosesebɛ dɔɔnwo yɛɛ tumi molozo.’ (Ayezaya 40:26) Nyamenle abɔdeɛ kile kɛ ɔdaye a ɔle ‘Tumivolɛ Bedevinli ne’—Ahenle mɔɔ ‘lɛ tumi kpole’ la.—Dwobu 37:23.

Ɛrɛladane ko mɔɔ ɔ mra nwiɔ anye ɛzi la ka kɛ: “Ɛdendɛlɛ a le debie mɔɔ hyia kpalɛ wɔ bɛ debiezukoalɛ nu a. Ka debie biala mɔɔ ɛnwu ye nee mɔɔ ɛte la anwo edwɛkɛ kile bɛ, na siezie ɛ nwo kɛ ɛbaha debie biala mɔɔ ɛbanwu ye la anwo edwɛkɛ. Ɛdawɔ a ɛle bɛ nye a.” Zɔhane ala a ɔde a, “awie biala ɛtɛnwunle Nyamenle ɛlɛ,” Nyamenle Ara, Gyisɛse, mɔɔ “ɔde Selɛ ne anwo ɛkɛ ne la, yemɔ yɛɛ ɛmaa yɛnwu ye a.” (Dwɔn 1:18) Kɛmɔ ɔle Nyamenle abɔdeɛ mɔɔ lumua nee ɔ Ra kokye la ati, Gyisɛse rayɛle yɛ “nye” mɔɔ maa yɛnwu anwuma lɔ a. Ye ɛkɛ a yɛkola yɛnyia Nyamenle ne mɔɔ ɛnyelɛ ɛnnwu ye la anwo edwɛkɛ kpalɛ yɛfi a.

Tie edwɛkɛ ekyi mɔɔ Gyisɛse mɔɔ nee ɔ Ze dɛnlanle mekɛ tendenle hanle ye wɔ Nyamenle anwo la:

• Nyamenle yɛ gyima a ɔnvɛ. “Egya yɛ gyima kenle biala.”—Dwɔn 5:17.

• Nyamenle ze yɛ ngyianlɛ. “Bɛ Ze mɔɔ wɔ anwuma la ze mɔɔ bɛhyia nwolɛ la amuala kolaa na bɛabiza ye.”—Mateyu 6:8.

•  Nyamenle fi atiakunlukɛnlɛma nu maa yɛ debie. ‘Bɛ Ze mɔɔ wɔ anwuma la maa ye ezule tɔ na ye ewia fi maa ɛtanevolɛma nee kpalɛyɛlɛma amuala.’—Mateyu 5:45.

• Nyamenle bu yɛ nuhua ko biala kɛ ɔsonle bolɛ. “Bɛtɔ nyamenleakatiba nwiɔ ɛkpɔsɛba ko, noko akee ko bɔbɔ ɛndɔ aze wɔ mekɛ mɔɔ bɛ Ze mɔɔ wɔ anwuma la ɛnze nu a. Na bɛmɛ, bɛ ti zo enrinli bɔbɔ bɛdia. Zɔhane ati bɛmmasulo, ɔluakɛ bɛsonle bolɛ kpole bɛtɛla nyamenleakatiba dɔɔnwo.”—Mateyu 10:29-31.

Menli mɔɔ anye ɛzi la nwu ninyɛne wɔ adenle ngakyile zo tɛla menli mɔɔ nwu debie la. Bie a anyezinliravolɛ babu alubo kɛ ɔnle awozinli, emomu ɔle ɛleka kɛnlɛma mɔɔ ewia ɛmbɔ ɛkɛ la. Kɛmɔ awie mɔɔ anye ɛzi ɛngola ɛnnwu alubo anzɛɛ wienyi la, yɛdayɛ mumua ne yɛnrɛhola yɛnrɛde kɛzi Gyihova de la abo. Ɛhye ati, Gyihova manle yɛnyianle dasanli mɔɔ lale Ye subane nee ye sonlaholɛ ali wɔ adenle mɔɔ di munli la azo.

Zɔhane sonla ne a le Gyisɛse. (Felepaema 2:7) Gyisɛse anga ɔ Ze anwo edwɛkɛ ala, eza ɔhilele yɛ kɛzi Nyamenle de la. Gyisɛse ɛdoavolɛ Felepe hanle kɛ: “Awulae, kile yɛ Selɛ ne.” Gyisɛse buale ye kɛ: “Awie mɔɔ ɛnwu me la ɛnwu Selɛ ne.” (Dwɔn 14:8, 9) Selɛ ne anwo debie boni a “ɛnwu” ye wɔ Gyisɛse nyɛleɛ nu a?

Ɛnee Gyisɛse kulo menli, ɔbɛlɛ ɔ nwo aze yɛɛ bɛkola bɛbikye ye. (Mateyu 11:28-30) Ye subane kɛnlɛma ne manle menli bikyele ye. Gyisɛse dele menli nyane bo, na ɔ nee bɛ bɔle nu liele bɛ nye. (Luku 10:17, 21; Dwɔn 11:32-35) Saa ɛkenga anzɛɛ ɛte Gyisɛse anwo edwɛkɛ wɔ Baebolo ne anu a, fa wɔ adwenle kɔ zo na bu edwɛkɛ ne kɛ ɔlɛkɔ zo wɔ wɔ adwenle nu. Saa ɛdwenledwenle kɛzi Gyisɛse yɛle menli la anwo a, ɛbanwu sonlaholɛ nwanwane mɔɔ Nyamenle de la wienyi na wɔabikye Ye.

Buluku kɛlɛvolɛ ko hanle kɛzi awie mɔɔ anye ɛzi nwu ewiade ne la anwo edwɛkɛ kɛ: “Ɔte edwɛkɛ ngyikyi ɔfi ɛleka dɔɔnwo (mɔɔ ɔfa ɔ sa ɔka ye, ɔte ye evuanlɛ, mɔɔ ɔte nee mɔɔ bokɛboka nwo la), na ɔfa ɔ muala ɔbɔ nu wɔ adenle bie azo.” Zɔhane ala a ɛnea ninyɛne mɔɔ Nyamenle ɛbɔ, ɛkenga edwɛkɛ mɔɔ Gyisɛse hanle ye wɔ ɔ Ze anwo, na ɛsuzu kɛzi Gyisɛse lale Nyamenle subane ali la anwo a, ɛbanwu Gyihova anwo nvoninli kɛnlɛma a. Ɛbanwu ye kɛ ɔwɔ ɛkɛ ne amgba.

Dwobu, mɔɔ dɛnlanle aze wɔ tete ne la nwunle ye zɔhane. Ɔlumuale ɔhanle edwɛkɛ ‘mɔɔ ɔnde ɔ bo la.’ (Dwobu 42:3) Noko mekɛ mɔɔ ɔzuzule Nyamenle abɔdeɛ nwanwane ne anwo kpalɛ la, ɔhanle Dwobu ɔmanle ɔhanle kɛ: ‘Me nzo yɛɛ menvale mendele wɔ nganeɛ a, na kɛkala, yemɔ meva me nye menwu wɔ.’—Dwobu 42:5.

Ɛdawɔ noko ɛbahola wɔayɛ zɔ. “Saa ɛkpondɛ [Gyihova] a, ɔbamaa wɔanwu ye.” (1 Edwɛkɛsisilɛ 28:9, NW) Gyihova Alasevolɛ bava anyelielɛ aboa wɔ bɛamaa wɔakpondɛ na wɔanwu Nyamenle ne mɔɔ bɛnnwu ye la.