EDWƐKƐ TITILE | ASOO SEETAN WƆ ƐKƐ?
Seetan Wɔ Ɛkɛ Ɔ?
Seetan mɔɔ bɛyɛ ye nvoninli kɛ anwumabɔvolɛ mɔɔ ɛdɔ aze wɔ Madrid, Spain
“Menyinle wɔ El Salvador. Ɛnee saa meyɛ anzosesebɛ a, me mame ka kɛ, ‘Abɔnsam ɛlɛba arahye wɔ!’ Na mebua kɛ, ‘Maa ɔrɛla!’ Ɛnee medie Nyamenle medi, noko menlie Seetan menli.”—ROGELIO.
Ɛ nee Rogelio yɛ adwenle ɔ? Edwɛkɛ ɛhye mɔ boni a ɛbu ye kɛ ndelebɛbo wɔ nu a?
-
Seetan ɛnle ɛkɛ; ɔle subane ɛtane bie ala.
-
Seetan wɔ ɛkɛ, noko ɔndwenle alesama anwo.
-
Seetan le sunsum nu abɔdeɛ mɔɔ lɛ tumi mɔɔ gyegye alesama kpole a.
Bie a menli mgbe dɔɔnwo die edwɛkɛ ɛhye mɔ biala di. Noko asoo nuhua ne mɔɔ le nɔhalɛ la hyia amgba ɔ? Saa Seetan ɛnle ɛkɛ a, ɛnee menli mɔɔ die di kɛ ɔwɔ ɛkɛ la ɛbɛlɛbɛla bɛ nwo. Saa Seetan wɔ ɛkɛ na ɔndwenle alesama anwo a, ɛnee mgbane ala a menli dɔɔnwo nea boɛ anzɛɛ ɛzulolɛ bɔbɔ ka bɛ a. Noko, saa Seetan bɛlɛbɛla menli a, ɛnee ɔ nwo yɛ ɛzulolɛ tɛla kɛzi menli dɔɔnwo bu ye la.
Bɛmaa yɛnlea kɛzi Ngɛlɛlera Nwuanzanwuanza ne bua kpuyia ɛhye mɔ la: Seetan le duzu anzɛɛ yemɔ a le nwane—ɔle subane ɛtane bie anzɛɛ sunsum nu sonla? Saa ɔle sunsum nu sonla a, asoo Seetan anwo yɛ wɔ ɛzulolɛ? Saa ye zɔhane a, ɛnee kɛ ɔkɛyɛ na wɔabɔ ɛ nwo bane ɛ?
