hyia fufule maa menli mgbe dɔɔnwo wu ɛvolɛ biala ɔlua aleɛ kpalɛ mɔɔ bɛnnyia ye bɛnli nee ewule ngakyile ti. Maanle bie mɔ ɛnli ehyia ɛdeɛ, noko alesama anu dɔɔnwo ne ala di ehyia kpalɛ. Baebolo ne kile kɛ ehyia le ngyegyelɛ mɔɔ alesama ɛhɔ nu mekɛ tendenle.—Kenga Dwɔn 12:8.

Kyesɛ yɛnyia ewiade arane bie mɔɔ ɔbadu ehyia bo la. Ɔwɔ kɛ arane zɛhae kola kyɛ agyapadeɛ mɔɔ wɔ ewiade ye anu la pɛpɛɛpɛ, na ɔmaa bɛgyakyi konle, mɔɔ yemɔ a fa ehyia ba la. Nyamenle ɛbɔ ɛwɔkɛ kɛ ɔbava arane zɛhae yeara ewiade.—Kenga Daneɛle 2:44.

Nyamenle ɛye ɔ Ra, Gyisɛse, ɛzie ɛkɛ ne kɛ ɔli alesama anwo zo tumi. (Edwɛndolɛ 2:4-8) Gyisɛse balie ehyiavolɛma na yeamaa nzisi nee basabasayɛlɛ bo apɛ.—Kenga Edwɛndolɛ 72:8, 12-14.

Gyisɛse mɔɔ le ‘Anzodwolɛ Belemgbunli’ mɔɔ bɛhanle ɔ nwo edwɛkɛ bɛdole ɛkɛ ne la, bamaa anzodwolɛ nee banebɔlɛ ara ewiade. Akee awie biala banyia ɔ ti anwo sua, gyima mɔɔ maa ahunlundwolɛ nee aleɛ dɔɔnwo.—Kenga Ayezaya 9:6, 7; 65:21-23.