1-3. Kpuya boni mɔ a menli biza wɔ ewule nwo a, na mualɛ boni a ɛzonlenlɛ ngakyile ne mɔ fa maa bɛ a?

BAEBOLO ne bɔ yɛ ɛwɔkɛ kɛ kenle bie ewule bavi ɛkɛ. (Yekile 21:4) Yɛzukoale ye wɔ Tile 5 ne anu kɛ ɛkpɔnedeɛ ne bamaa yɛahola yɛanyia dahuu ngoane. Noko menli tɛwu. (Nolobɔvo 9:5) Yemɔti kpuya mɔɔ hyia mɔɔ yɛbiza la anu ko a le kɛ, Saa yɛwu a, yɛkɔ ni?

² Kpuya ɛhye mualɛ ne hyia, titili wɔ mekɛ mɔɔ yɛ kulovolɛ bie kɛwu la. Bie a yɛbiza kɛ: ‘Yehɔ ni? Ɔlɛnea yɛ ɔ? Ɔbahola yeaboa yɛ ɔ? Asoo yɛbanwu ye bieko?’

³ Asolo mualɛ mɔɔ ɛzonlenlɛ ngakyile ne mɔ biala fa maa a. Bie mɔ kilehile kɛ saa sonlakpalɛ wu a, ɔkɔ anwuma yɛɛ ɛtanevolɛ wu a, bɛyela ye wɔ abɔnsam senle nu. Bie mɔ se saa ɛwu a, ɛkakyi sunsum na ɛ nee wɔ mbusuafoɔ mɔɔ bɛwu dɛbadɛba la kɔtɛnla. Bie mɔ noko se saa ɛwu na bɛbua wɔ ndɛne a, bɛsia bɛwo wɔ fofolɛ.

4. Edwɛkɛ titili boni a ɛzonlenlɛ ne mɔ kilehile ye wɔ ewule nwo a?

⁴ Ɛzonlenlɛ dɔɔnwo kilehile ninyɛne ngakyile, noko asɛɛ bɛ muala bɛkilehile deɛ ko ne ala. Yemɔ a le kɛ saa sonla wu a, debie bie wɔ ye nu mɔɔ ɔkɔ zo ɔtɛnla aze a. Asoo ɛhye le nɔhalɛ ɔ?

5, 6. Saa awie wu a, tɛnlabelɛ boni a ɔkɔ nu a?

⁵ Gyihova ze ɛleka mɔɔ yɛwu a yɛkɔ la, na yeha yehile yɛ kɛ saa awie wu a, ɔnde ngoane nu bieko. Yemɔti saa awie wu a, ye nganeɛdelɛ nee ɔ ti anu  edwɛkɛ minli. * Saa yɛwu a, yɛngola yɛnnwu debie, yɛnde edwɛkɛ yɛɛ yɛngola yɛndwenle bieko.

⁶ Belemgbunli Sɔlɔmɔn hɛlɛle kɛ “mowuamra ɛnze ɛhwee.” Mowuamra ɛngola ɛngulo awie anzɛɛ ɛmkpɔ awie yɛɛ “gyima anzɛɛ ngyehyɛleɛ anzɛɛ adwenle anzɛɛ nrɛlɛbɛ ɛnle Nla ne anu.” (Kenga Nolobɔvo 9:5, 6, 10.) Eza Baebolo ne ka ye wɔ Edwɛne 146:4 kɛ saa awie wu a, “ye nzuzulɛ kɔsɔɔti minli.”

7. Edwɛkɛ boni a Gyisɛse hanle ye wɔ ewule nwo a?

⁷ Mɔɔ Gyisɛse agɔnwo kpalɛ Lazalɛse wule la, ɔhanle ɔhilele ye ɛdoavolɛ ne mɔ kɛ: “Yɛ gɔnwo Lazalɛse ɛlafe.” Noko ɛnee Gyisɛse ɛngile kɛ Lazalɛse ɛlɛdie ɔ menle. Akee ɔhanle kɛ: “Lazalɛse ɛwu.” (Dwɔn 11:11-14) Yemɔti Gyisɛse vale ewule totole nafelɛ nwo. Yeanga kɛ Lazalɛse wɔ anwuma anzɛɛ ɔ nee ye mbusuafoɔ mɔɔ bɛwu dɛbadɛba la ɛhɔdɛnla. Eza yeanga kɛ Lazalɛse ɛlɛnwu amaneɛ wɔ abɔnsam senle nu anzɛɛ bɛbazia bɛawo ye fofolɛ. Ɛnee ɔle kɛ asɛɛ Lazalɛse ɛlafe botoo la. Ngɛlɛlera gyɛne noko fa ewule toto nafelɛ botoo nwo. Baebolo ne ka kɛ mekɛ mɔɔ bɛhunle Sitivin la, “ɔlale wɔ ewule nu.” (Gyima ne 7:60, ɔbodwɛkɛ) Ɛzoanvolɛ Pɔɔlo noko hɛlɛle kɛ Kilisienema bie mɔ “ɛla wɔ ewule nu.”​—1 Kɔlentema 15:6.

8. Kɛzi yɛkola yɛnwu ye kɛ Nyamenle ambɔ alesama kɛ bɛwu ɛ?

⁸ Asoo Nyamenle bɔle Adam nee Yive kɛ kenle bie dedee bɛbawu ɔ? Kyɛkyɛ! Gyihova bɔle bɛ la ɛnee bɛlɛ kpɔkɛdelɛ kpalɛ mɔɔ bamaa bɛadɛnla aze dahuu  la. Mɔɔ Gyihova bɔle alesama la, ɔmaanle bɛnyianle ɛhulolɛ kɛ bɛbadɛnla aze dahuu. (Nolobɔvo 3:11) Awovolɛ ɛngulo kɛ bɛ mra yɛ mrelera na bɛwu, na zɔhane ala a Gyihova noko te nganeɛ wɔ yɛ nwo a. Noko saa Nyamenle bɔle yɛ kɛ yɛdɛnla aze dahuu a, ɛnee duzu ati a yɛwu a?

9. Duzu ati a ndelebɛbo wɔ mɛla mɔɔ Gyihova vale maanle Adam nee Yive la anu a?

⁹ Gyihova hanle hilele Adam wɔ Yidɛn tola ne anu kɛ: “Ɛkola ɛdi baka biala mɔɔ wɔ tola ne anu la ma ne  bie. Noko baka ne mɔɔ maa bɛnwu kpalɛ nee ɛtane la ɛdeɛ, mmadi bie, ɔluakɛ kenle mɔɔ ɛbali bie la, ewule a ɛbawu a.” (Gyɛnɛsese 2:9, 16, 17) Ɛnee ɔnyɛ se kɛ bɛbali mɛla zɔhane mɔɔ nuhua la ɛkɛ la azo, yɛɛ ɛnee Gyihova lɛ adenle ka mɔɔ le kpalɛ nee mɔɔ le ɛtane la kile bɛ. Saa bɛtie Gyihova a, bɛbamaa yeanwu ye kɛ bɛbu ye tumililɛ ne. Eza bɛbamaa Gyihova anwu kɛ bɛ nye sɔ debie biala mɔɔ ɔvale ɔmaanle bɛ la.

10, 11. (a) Kɛzi Seetan maanle Adam nee Yive yɛle ɛtane ɛ? (b) Kɛmɔti a Adam nee Yive ɛnlɛ mɔɔ bɛyɛle la anwo nyelebɛnloa biala ɛ?

¹⁰ Mɔɔ yɛ alɔbɔlɛ la a le kɛ, Adam nee Yive kpale kɛ bɛbayɛ Gyihova anwo anzosesebɛ. Seetan bizale Yive kɛ: “Asoo amgba Nyamenle se bɛmmadi baka biala mɔɔ wɔ tola ye anu la ma ne bie ɔ?” Yive buale ye kɛ: “Yɛkola yɛdi mbaka mɔɔ wɔ tola ye anu la ma ne bie. Noko Nyamenle hanle ye wɔ baka ne mɔɔ gyi tola ne avinli lɔ la ma ne anwo kɛ: ‘Bɛmmadi bie fee, bɛmmafa bɛ sa bɛka ye bɔbɔ; anrɛɛ bɛkɛwu.’”​—Gyɛnɛsese 3:1-3.

¹¹ Akee Seetan hanle kɛ: “Tɛ ewule a bɛbawu a. Nyamenle ze kɛ kenle ko ne ala mɔɔ bɛbali bie la, bɛ nye babuke na bɛayɛ kɛ Nyamenle, na bɛanwu kpalɛ nee ɛtane.” (Gyɛnɛsese 3:4-6) Ɛnee Seetan kpondɛ kɛ Yive nyia adwenle kɛ ɔkola ɔsi ɔ ti anwo kpɔkɛ wɔ mɔɔ le kpalɛ nee mɔɔ le ɛtane la anwo. Eza ɔbɔle adalɛ ɔhilele Yive wɔ mɔɔ ɔyɛ anzosesebɛ a ɔbado ye la anwo. Seetan hanle kɛ Yive ɛnrɛwu, ɔti Yive lile bakama ne bie na ɔvale bie ɔmaanle ɔ hu. Ɛnee Adam nee Yive ze kɛ Gyihova ɛha ɛhile bɛ kɛ bɛmmadi zɔhane bakama ne bie. Mekɛ mɔɔ bɛlile bie la, bɛkpale kɛ bɛnrɛli mɛla mɔɔ nuhua la ɛkɛ na ɔnyɛ se la azo. Bakama ne mɔɔ  bɛlile la hilele kɛ bɛmbu bɛ anwuma Selɛ ne mɔɔ lɛ ɛlɔlɛ la. Ɛnee bɛnlɛ mɔɔ bɛyɛle la anwo nyelebɛnloa biala!

12. Duzu ati a ɔyɛ nyane kɛ Adam nee Yive yɛle Gyihova anwo anzosesebɛ ɛ?

¹² Nea kɛzi ɔyɛ nyane kɛ yɛ awovolɛ mɔɔ limoa la ambu bɛ Bɔvolɛ ne a! Saa ɛbɔ mɔdenle ɛtete ɛ mra nwiɔ, nrenyia ko yɛɛ raalɛ ko, na bɛte ɛ nwo atua bɛyɛ mɔɔ bɛdabɛ bɛkulo la a, kɛzi ɛbade nganeɛ ɛ? Asoo wɔ ɛbolɛ ɛnrɛde ɔ?

13. Mɔɔ Gyihova hanle kɛ “ɛbazia wɔahɔ ndɛtɛlɛ nu” la, ɛnee boni a ɔlɛkile a?

¹³ Mekɛ mɔɔ Adam nee Yive yɛle anzosesebɛ la, nwolɛ adenle mɔɔ ɛnee bɛlɛ kɛ bɛbadɛnla aze dahuu la vile bɛ sa. Gyihova hanle hilele Adam kɛ: “Ɛle ndɛtɛlɛ na ɛbazia wɔahɔ ndɛtɛlɛ nu.” (Kenga Gyɛnɛsese 3:19.) Ɛhye kile kɛ Adam bazia ayɛ ndɛtɛlɛ, ɔbayɛ kɛ asɛɛ bɛambɔ ye bɛamba ewiade ɛlɛ la. (Gyɛnɛsese 2:7) Adam yɛle ɛtane ne la anzi, ɔwule na yeandɛnla ngoane nu bieko.

14. Duzu ati a yɛwu a?

¹⁴ Saa Adam nee Yive diele Nyamenle a, anrɛɛ bɛtɛte ngoane nu. Noko mekɛ mɔɔ bɛyɛle ɔ nwo anzosesebɛ la, bɛyɛle ɛtane na akee bɛwule. Ɛtane le kɛ ewule ɛzulolɛ bie mɔɔ yɛnyia yɛvi yɛ awovolɛ  mɔɔ limoa la ɛkɛ a. Bɛva ɛtane bɛwo yɛ muala na ɛhye ati a yɛwu la. (Wulomuma 5:12) Noko tɛ mɔɔ Nyamenle kulo kɛ ɔto alesama la ɛne. Ɛnee Nyamenle ɛngulo kɛ alesama kɛwu, yemɔti Baebolo ne fɛlɛ ewule “kpɔvolɛ.”​—1 Kɔlentema 15:26.

15. Kɛzi nɔhalɛ ne mɔɔ fale ewule nwo la maa yɛnyia fanwodi ɛ?

¹⁵ Ewule nwo nɔhalɛ ne maa yɛnyia fanwodi yɛfi nzuzulɛ ngakyile mɔɔ ɛndenrɛ la anwo. Baebolo ne kilehile yɛ kɛ mowuamra ɛnde nyane anzɛɛ bɛnli alɔbɔlɛ. Bɛngola bɛndendɛ bɛngile yɛ yɛɛ yɛngola yɛ nee bɛ ɛndendɛ. Yɛnrɛhola yɛnrɛboa mowuamra yɛɛ bɛdabɛ noko bɛnrɛhola bɛnrɛboa yɛ. Bɛnrɛhola bɛnrɛgyegye yɛ, yemɔti ɔnle kɛ yɛsulo bɛ. Noko ɛzonlenlɛ ngakyile ka kɛ mowuamra de ngoane nu wɔ ɛleka bie na saa yɛtua ezukoa yɛmaa ɛsɔfo ne mɔ anzɛɛ menli mɔɔ bɛbu bɛ kɛ bɛle nwuanzanwuanza la a, yɛbahola yɛaboa bɛ. Noko saa yɛnwu nɔhalɛ ne mɔɔ fale ewule nwo la a, ɔnrɛmaa bɛnrɛva adalɛ edwɛkɛ zɔhane bɛnrɛbɛlɛbɛla yɛ.

16. Adalɛ edwɛkɛ boni a ɛzonlenlɛ dɔɔnwo kilehile wɔ mowuamra anwo a?

¹⁶ Seetan dua adalɛ ɛzonlenlɛ zo bɔ adalɛ kile yɛ na ɔmaa yɛnyia adwenle kɛ mowuamra tɛte aze. Kɛ neazo la, ɛzonlenlɛ bie mɔ kilehile kɛ saa yɛwu a, debie bie wɔ yɛ nu mɔɔ ɔkɔ zo ɔtɛnla aze wɔ ɛleka bie a. Asoo ɛhye a wɔ ɛzonlenlɛ ne kilehile wɔ a, anzɛɛ ɔkilehile wɔ mɔɔ Baebolo ne ka ye wɔ mowuamra anwo la ɔ? Seetan dua adalɛbɔlɛ zo twe menli fi Gyihova anwo.

17. Duzu ati a abɔnsam senle ngilehilelɛ ne gua Gyihova anwo evinli ɛ?

¹⁷ Mɔɔ ɛzonlenlɛ dɔɔnwo kilehile la yɛ azibɛnwo. Kɛ  neazo la, bie mɔ kilehile kɛ bɛbayela ɛtanevolɛma wɔ abɔnsam senle nu dahuu. Adalɛ edwɛkɛ zɔhane gua Gyihova anwo evinli. Ɔnrɛmaa menli ɛnrɛnwu amaneɛ zɔhane ɛlɛ! (Kenga 1 Dwɔn 4:8.) Saa awie fa kakula bie asa wula senle nu kɛ ɔfa yeahwe ɔ nzo a, kɛzi ɛbabu ye ɛ? Ɛbaha kɛ ɔ ti yɛ se kpalɛ. Ɛnrɛhulo kɛ ɛbabikye ye. Na kɛ Seetan kpondɛ kɛ yɛbu Gyihova la ɛne!

18. Duzu ati a ɔnle kɛ yɛsulo mowuamra a?

¹⁸ Ɛzonlenlɛ bie mɔ kilehile kɛ saa menli wu a, bɛkakyi sunsum. Ɛzonlenlɛ ɛhye mɔ kilehile kɛ ɔwɔ kɛ yɛdi sunsum ɛhye mɔ eni na yɛsulo bɛ ɔluakɛ bɛbahola bɛayɛ agɔnwolɛma kpalɛ anzɛɛ agbɔvolɛ mɔɔ ati yɛ se la. Menli dɔɔnwo die adalɛ edwɛkɛ zɔhane di. Bɛsulo mowuamra yemɔti bɛsonle bɛ bɛgyakyi Gyihova. Kakye kɛ mowuamra ɛnde nganeɛ biala yɛɛ bɛndwenle, yemɔti ɔnle kɛ yɛsulo bɛ. Gyihova a bɔle yɛ a. Ɔdaye a ɔle nɔhalɛ Nyamenle ne a, na ɔwɔ kɛ yɛsonle ɔ ngomekye.​—Yekile 4:11.

19. Saa yɛnwu mowuamra anwo nɔhalɛ ne a, kɛzi ɔboa yɛ ɛ?

¹⁹ Saa yɛnwu mowuamra anwo nɔhalɛ ne a, ɔmaa yɛnyia fanwodi yɛfi adalɛ ngilehilelɛ ɛhye mɔ anwo. Eza nɔhalɛ ɛhye boa yɛ maa yɛte ɛwɔkɛ ngɛnlɛma mɔɔ Gyihova ɛbɔ mɔɔ fale yɛ ɛbɛlabɔlɛ nee yɛ kenle bie anwo la abo.

20. Duzu a yɛbazukoa wɔ tile bieko anu a?

²⁰ Mekɛ tendenle mɔɔ ɛze ɛhɔ la, Nyamenle sonvolɛ bie mɔɔ bɛfɛlɛ ye Dwobu la bizale kɛ: “Saa sonla wu a, asoo ɔbadɛnla aze bieko?” (Dwobu 14:14) Asoo sonla mɔɔ ɛwu la bahola adɛnla ngoane nu bieko amgba? Mualɛ mɔɔ Nyamenle fa maa yɛ wɔ Baebolo ne anu la yɛ anyelielɛ. Yɛbanwu ye wɔ tile bieko anu.