1, 2. (a) Duzu gyima a ɛnee Wulutu ɛlɛyɛ a? (b) Ninyɛne kpalɛ boni a Wulutu nwunle ye wɔ Nyamenle Mɛla ne nee ye menli ne anwo a?

WULUTU hoto baale ne mɔɔ yesesa ye wɔ alehyenlɛ ne anu la anwo. Aleɛ ɛlɛdwo yɛɛ gyimayɛvoma dɔɔnwo ɛkpɔne gyima na bɛlɛkɔ Bɛtelɛhɛm, sua ekyi mɔɔ ɔwɔ boka bie azo la azo. Kɛmɔ ɛnee yeyɛ gyima alehyenlɛ ne anu kɔsɔɔti la ati, ɛnee yevɛ. Noko yeangyakyi, ɔvale debie ɔbobɔle baale ne ɔtetele ma mɔɔ wɔ zo la. Ɛnee gyima ne yɛ se, noko ɔnyianle aleɛ dɔɔnwo mɔɔ ɛnee ɔnlɛ anyelazo bɔbɔ kɛ ɔbanyia ye la.

² Asoo ɛnee ninyɛne ɛlɛbɔ ɔ bo ayɛ boɛ amaa bɛlɛra kunlavolɛ ɛhye ɔ? Kɛmɔ yɛnwunle ye wɔ tile ne mɔɔ li ɛhye anyunlu anu la, Wulutu bɔle kpɔkɛ kɛ ɔ nee ye ase Nawome badɛnla na Nawome Nyamenle, Gyihova ne bayɛ ye Nyamenle. Ahunlanvolɛ nwiɔ ne vi Mowabe rale Bɛtelɛhɛm, na Mowabenli Wulutu nwunle kɛ ɛnee Gyihova Mɛla ne lɛ ngyehyɛleɛ kɛnlɛma bie mɔɔ boa ehyiavolɛma nee nyɛvolɛ mɔɔ wɔ Yizilayɛ la. Akee ɔnwunle kɛ Gyihova menli ne mɔɔ ɔvale Mɛla ne ɔmanle bɛ la bie mɔ ɛlɛfa abɔ bɛ ɛbɛla anyi wɔ sunsum nu na bɛlale atiakunlukɛnlɛma mɔɔ ɔmanle ye ahonle dɔle ye azule nu la ali.

3, 4. (a) Kɛzi Bowaze manle Wulutu anwosesebɛ ɛ? (b) Kɛzi Wulutu neazo ne baboa yɛ wɔ mekɛ ɛhye mɔɔ anu yɛ se la anu ɛ?

³ Menli ɛhye mɔ ko a le Bowaze, nrenya sukoavolɛ ne mɔɔ ɛnee Wulutu ɛlɛsesa ma ne wɔ ye ɛya nu la. Bowaze nwunle ye la, ɔvale ye kɛ ɔ ra. Mɔɔ Wulutu hakyele edwɛkɛ mɔɔ Bowaze hanle hanvole ye kɛ ɔlɛnea Nawome na yekpa kɛ ɔbavea nɔhalɛ Nyamenle Gyihova andɛba abo la, ɔ nye liele.—Begenga Wulutu 2:11-14.

⁴ Noko akee, ɔbayɛ kɛ Wulutu dwenlenle ye kenlebie nwo. Kɛ ɛyɛvolɛ ehyianli mɔɔ ɔnlɛ ɔ hu anzɛɛ ɔ ra la, kɛzi ɔbahola yeanlea ɔ nwo nee Nawome dahuu ɛ? Asoo ma ɛsesalɛ baboa ye ɔ? Na saa ɔyɛ kpanyinli a nwane a banlea ye a? Ɛnee ndelebɛbo  wɔ nu kɛ ɔbadwenledwenle edwɛkɛ ɛhye mɔ anwo. Wɔ ɛnɛ ewiade ɛhye mɔɔ nuhua yɛ se la anu, menli dɔɔnwo dwenle ninyɛne ɛhye mɔ noko anwo. Saa yɛsukoa kɛzi Wulutu diedi ne boale ye manle ɔgyinlanle ngyegyelɛ ɛhye mɔ amuala anloa la a, ɔbamaa yɛazukoa ye.

5, 6. (a) Kɛzi ninyɛne hɔle boɛ manle Wulutu wɔ mekɛ mɔɔ lumua mɔɔ ɔhɔle Bowaze ɛya nu la ɛ? (b) Nawome nwunle Wulutu la, duzu a ɔyɛle a?

⁵ Wulutu wozole ma mɔɔ ɔnyianle la, ɛnee ɔle asɛɛ kilo 10 mɔɔ kɔ 14. Ɔkpogyale, na bie a ɔkyekyele ye wɔ ye ɛdanlɛ ne anu ɔzoale ɔhɔle Bɛtelɛhɛm wɔ mekɛ mɔɔ ɛnee awozinli ne ɛlɛba la.—Wul. 2:17.

⁶ Nawome nwunle ye ase ne la ɔ nye liele, na ɔbayɛ kɛ bɔlɛ kpole ne mɔɔ ɛnee ɔzo la zinle ɔ nwo. Eza Wulutu vale aleɛ ne mɔɔ Bowaze vale manle ye la bie rale sua nu na bɛ mu nwiɔ bɛlile. Nawome bizale ye kɛ: “Nienwu a ɛnɛ ɛhɔsesale wɔ mgbɛpɛlɛ ne a? Nienwu a ɛlile gyima ɛhye a? Nyamenle ɛyila ahenle mɔɔ yɛle wɔ nyele ɛhye la.” (Wul. 2:19) Nawome yɛ debie nzonlɛ; Wulutu bɔlɛ ne manle ɔnwunle kɛ awie ɛla atiakunlukɛnlɛma ali ɛhile bɛlɛra kunlavolɛ ne.

7, 8. (a) Nwane a Nawome nwunle kɛ Bowaze atiakunlukɛnlɛma ne vi ye a, na duzu ati ɔ? (b) Kɛzi Wulutu lale ɛhulolɛ kpundii bieko ali hilele ye ase ne ɛ?

⁷ Bɛbɔle ɔ bo kɛ bɛdi adwelie, na Wulutu hanle Bowaze atiakunlukɛnlɛma ne anwo edwɛkɛ hilele Nawome. Nawome anye liele nwolɛ na ɔhanle kɛ: “[Gyihova] ɛyila ye kɛ ɔdwenle menli mɔɔ ɛwu ɛhɔ nee anyewɔzoamra anwo la.” (Wul. 2:20) Ɔnwunle kɛ Bowaze atiakunlukɛnlɛma ne vi Gyihova mɔɔ ɔka ye azonvolɛ ɔmaa bɛyɛ kpalɛ na ɔbɔ bɛ ɛwɔkɛ kɛ ɔbadua bɛ kakɛ wɔ bɛ atiakunlukɛnlɛmayɛlɛ nwo la ɛkɛ. *—Bɛgenga Mrɛlɛbulɛ 19:17.

⁸ Nawome zele Wulutu kɛ ɔdie Bowaze edwɛkɛ ne na ɔ nee ye mraalɛ ne mɔ ɛyɛ gyima wɔ ye ɛya ne anu amaa awie biala angyegye ye. Wulutu diele. Eza ɔhɔle zo ɔdɛnlanle “ɔ hu ɔ nli ne anwo ɛkɛ.” (Wul. 2:22, 23) Edwɛkɛ zɔhane maa yɛnwu ɛhulolɛ kpundii bieko mɔɔ Wulutu lale ye ali la. Bie a Wulutu neazo ne bamaa yɛabiza yɛ nwo kɛ, asoo yɛdi yɛ abusua ne eni,  yɛfa nɔhalɛlilɛ yɛnea yɛ alɔvolɛ na yɛboa bɛ ɔ? Gyihova nwu ɛhulolɛ kpundii zɛhae.

9. Abusua nwo debie boni a yɛsukoa yɛfi Wulutu nee Nawome ɛkɛ a?

⁹ Asoo ɛnee Wulutu nee Nawome le abusua? Bie mɔ suzu kɛ kunli, yelɛ, ngakula, nenya anzɛɛ nana nee mɔɔ bokɛboka nwo la angome a ka bɔ nu yɛ abusua mɔɔ “ɔdi munli” a. Noko Wulutu nee Nawome neazo ne maa yɛnwu kɛ Gyihova azonvolɛ bahola aha abɔ nu ayɛ abusua na bɛamaa anyelielɛ, atiakunlukɛnlɛma nee ɛlɔlɛ adɛnla bɛ avinli. Asoo ɛ nye sɔ wɔ abusua ne? Gyisɛse hanle hilele ye ɛdoavolɛ ne mɔ kɛ awie bɔbɔ mɔɔ ɔnlɛ abusua la bahola anyia bie wɔ Keleseɛnema asafo ne anu.—Mak. 10:29, 30.

10. Adenle boni azo a ɛnee Nawome kpondɛ kɛ ɔboa Wulutu a?

¹⁰ Wulutu sesale ma wɔ Bowaze ɛya nu ɔvi April mɔɔ bɛfa bɛte baale toonwo ɔhɔdwule mekɛ mɔɔ bɛfa bɛte hwiiti wɔ June la. Mekɛ ne ɛlɛkɔ la, Nawome dwenlenle debie mɔɔ ɔbahola yeayɛ yeamaa ye ase ne la anwo. Mɔɔ ɛnee bɛwɔ Mowabe la, ɛnee Nawome ze ye wienyi kɛ ɔnrɛhola ɔnrɛboa Wulutu ɔnrɛmaa ɔnrɛnyia kunli fofolɛ. (Wul. 1:11-13) Akee ɔbɔle ɔ bo kɛ ɔnyia adwenle fofolɛ. Ɔzele Wulutu kɛ: “Me ra raalɛ, ɔwɔ kɛ memaa bɛgya wɔ.” (Wul. 3:1) Ɛnee ɔle amaamuo wɔ zɔhane mekɛ ne anu kɛ awovolɛ bakpondɛ bokavolɛ amaa bɛ mra, na ɛnee Wulutu ɛrayɛ Nawome ara bɔkɔɔ. Ɛnee Nawome kpondɛ kɛ ɔmaa “bɛgya” Wulutu amaa yeanyia awie ɔ nee ye adɛnla na ɔ hu abɔ ɔ nwo bane. Noko ɛnee duzu a Nawome bahola ayɛ a?

11, 12. (a) Mekɛ mɔɔ Nawome hanle kɛ Bowaze “di agya a ɔyɛ boɛ” la, ɛnee Nyamenle Mɛla kɛnlɛma boni anwo edwɛkɛ a ɔlɛka a? (b) Duzu a Wulutu yɛle ye wɔ ye ase edwɛkɛ ne anwo a?

¹¹ Mekɛ mɔɔ lumua mɔɔ Wulutu bɔle Bowaze duma la, Nawome hanle kɛ: “Nrenya ne le yɛ nwo sonla. Ɔle sonla mɔɔ di agya a ɔyɛ boɛ a.” (Wul. 2:20) Duzu a ɛnee ɛhye kile a? Nyamenle yɛle ngyehyɛleɛ kɛnlɛma wɔ Mɛla ne mɔɔ ɔvale ɔmanle Yizilayɛma la anu ɔmanle mbusua mɔɔ bɛnlɛ bie anzɛɛ bɛ awie ɛwu na bɛ nwo ɛlɛkyele bɛ la. Saa raalɛ bie ahu wu na yeanwo a,  ɔ nwo kyele ye kpalɛ ɔluakɛ ɔ hu duma baminli avi awolɛndoazo mɔɔ ɛha la kɔsɔɔti anu. Noko akee, Nyamenle Mɛla ne manle adenle kɛ ɔwɔ kɛ nrenya ne adiema gya kunlavolɛ ne ɔ nee ye wo amaa ɔ hu ne duma amminli na yeabɔ abusua ne agyapadeɛ nwo bane. *—Mɛla 25:5-7.

¹² Nawome hanle debie mɔɔ ɔkulo kɛ Wulutu yɛ la ɔhilele ye. Nea kɛzi ɔbayɛ kɛ edwɛkɛ ne mɔɔ ɔhanle la zinle bɛlɛra ne anwo a. Ɛnee Yizilayɛma Mɛla ne dɔɔnwo tɛde fofolɛ wɔ Wulutu anye zo, yɛɛ ɔnze bɛ amaamuo ne dɔɔnwo. Noko ɛnee ɔbu Nawome kpalɛ, ɛhye ati ɔdiele ye edwɛkɛ ne kɔsɔɔti. Bie a edwɛkɛ mɔɔ Nawome hanle la ɛyɛlɛ bayɛ se anzɛɛ ɔbamaa ɔ nyunlu agua aze bɔbɔ, noko Wulutu liele dole nu. Ɔvale mɛlɛbɛnwoaze ɔhanle kɛ: “Mɔɔ wɔha la, mebayɛ.”—Wul. 3:5.

13. Duzu a yɛsukoa yɛfi Wulutu ɛkɛ wɔ mgbanyinli mɔɔ yɛtie bɛ la anu a? (Eza nea Dwo. 12:12.)

¹³ Ɔyɛ a, ɔyɛ se ɔmaa ngakula kɛ bɛbadie mgbanyinli mɔɔ bɛlɛ anwubielɛ la edwɛkɛ. Ɔnyɛ se kɛ bɛbade nganeɛ kɛ mgbanyinli ɛhye mɔ ɛnde ngyegyelɛ mɔɔ ngakula yia la abo. Wulutu mɛlɛbɛnwoaze nwo neazo ne maa yɛnwu kɛ saa yɛtie mgbanyinli mɔɔ bɛlɛ anwubielɛ mɔɔ bɛkulo yɛ edwɛkɛ na bɛdwenle yɛ nwo la folɛdulɛ a, yɛbanyia nvasoɛ dɔɔnwo. (Bɛgenga  Edwɛndolɛ 71:17, 18.) Noko, folɛ boni a Nawome dule Wulutu a, na asoo Wulutu nyianle zolɛ nvasoɛ?

14. Duzu a le ma ɛkpogyalɛ ɛleka, na kɛzi bɛkpogya ma ne ɛ?

¹⁴ Nɔsolɛ zɔhane ala, Wulutu hɔle ɛleka mɔɔ bɛkpogya ma ne, ɛleka tafaa mɔɔ bɛbolo ɛkɛ ne toonwo yeyɛ ketekete mɔɔ ɛyazonlɛma kɔkpogya bɛ ma wɔ ɛkɛ la. Bɛta bɛyɛ ɛleka ɛhye wɔ boka nye anwo anzɛɛ ɔ ti zo, ɛleka mɔɔ anwoma ne bɔ kpole wɔ nɔsolɛ nu la. Amaa abonle ne avi ma ne anu la, gyimayɛvoma ne fa faka anzɛɛ kyɛnze fula ma ne mɔɔ bɛbolo la na bɛfuandi ye anwomanyunlu amaa anwoma ne ava abonle ne ahɔ na ma ne agua azɛlɛ ne anwo.

15, 16. (a) Ka mɔɔ ɔzile ma ɛkpogyalɛ ɛleka ne wɔ mekɛ mɔɔ Bowaze kpɔnenle gyima nɔsolɛ ne la. (b) Kɛzi Bowaze nwunle kɛ Wulutu la ɔ gyakɛ anu ɛkɛ ɛ?

¹⁵ Wulutu vale ɔ nwo ziele na ɔnleanle gyimayɛvoma ne hɔkpulale kɛ bɛkpɔnenle gyima nɔsolɛ nu la. Bowaze nleanle manle bɛkpogyale ye ma dɔɔnwo ne na bɛhuohuanle ɔ nloa. Yemɔti ɔwiele debie di la, ɔhɔlale ye ma ne azo lɔ. Bie a ɛnee bɛta bɛyɛ ɛhye amaa nwule anwua ma ne mɔɔ bɛkɛde la. Wulutu nwunle kɛ Bowaze ɛlɛkɔ ahɔla. Akee mekɛ ɛdwu kɛ ɔyɛ mɔɔ Nawome hanle la.

¹⁶ Wulutu yɛle nyaa nyaa hɔle ɛkɛ. Ɔnwunle kɛ nrenya ne ɛlafe botoo. Yemɔti, kɛmɔ Nawome hanle la, ɔhɔyele ɔ gyakɛ anwo ɛdanlɛ ne na ɔlale ɛkɛ ɔhendɛle. Mekɛ hɔle bie kpalɛ na  wɔ Wulutu anye zo, ɛnee ɔlɛkyɛ somaa. Akee wɔ nɔe ne, Bowaze bɔle ɔ bo kɛ ɔtwe ye nu. Kɛmɔ ɛnee ɛyɛlɛ wɔ nu la ati, bie a ɔziale ɔhwenle ye ɛdanlɛ ne kɛ ɔfa yeaheda ɔ gyakɛ anwo. Noko ɔnwunle kɛ awie la ɛkɛ. Baebolo ne ka kɛ, “ɔnwunle kɛ raalɛ bie la ɔ gyakɛ anu ɛkɛ.”—Wul. 3:8.

17. Menli mɔɔ ka kɛ mɔɔ Wulutu yɛle la ɛnle kpalɛ la bu bɛ nye gua nɔhalɛ edwɛkɛ nwiɔ boni azo?

¹⁷ Ɔbizale kɛ, “Ɛdawɔ nwane a ɛla ɛkɛ ne la?”Wulutu mɔɔ ɔbayɛ kɛ ɛnee ɔ ne ɛlɛwozo la buale kɛ: “Yɛmenle, medame, wɔ sonvolɛ raalɛ Wulutu ɔ. Ɛle me hu kɔliagya mɔɔ wɔmɔ a ɔwɔ kɛ ɛnea me a; yemɔti gya me.” (Wul. 3:9) Adwuleso amra bie mɔ ka kɛ Wulutu nyɛleɛ ne nee ye ɛdendɛlɛ kile kɛ ɛnee ɔnlɛ adwenle kpalɛ, noko bɛbu bɛ nye bɛgua nɔhalɛ edwɛkɛ nwiɔ azo. Mɔɔ lumua la, ɛnee Wulutu ɛlɛyɛ ye kɛmɔ bɛ amaamuo ne kile la, ɛnɛ, nuhua dɔɔnwo wɔ ɛkɛ mɔɔ yɛnyɛ. Yemɔti, ɔle nvonleɛ kɛ yɛbava mɔɔ ɔyɛle la yɛatoto ɛnɛ mekɛ ye ɛbɛla mɔɔ ɛkpɔlɔ la anwo. Mɔɔ tɔ zo nwiɔ, Bowaze hanle edwɛkɛ mɔɔ kile kɛ ɔnwunle kɛ Wulutu bɔ ɛbɛla kpalɛ na ɔfɛta nganvolɛ kpole la.

18. Duzu a Bowaze hanle kyekyele Wulutu arɛle a, na tɛnlabelɛ nwiɔ boni anu a ɔlale ɛhulolɛ kpundii mɔɔ ɛnee Bowaze ɛlɛka nwolɛ edwɛkɛ la ali a?

¹⁸ Ɔbayɛ kɛ kɛzi Bowaze dɔle ɔ rɛle aze dendɛle la kyekyele Wulutu arɛle. Ɔhanle kɛ: “Me ra raalɛ, [Gyihova] ɛyila wɔ. Akee wɔhile kɛ ɛlɛ subane kpalɛ wɔdɛla alumua ne kɛ wɔandoɔdoa mgbavolɛ sukoavolɛma anzɛɛ ehyianvolɛma la.” (Wul. 3:10) “Alumua ne” kile ɛhulolɛ kpundii mɔɔ Wulutu lale ye ali kɛ ɔ nee Nawome ziale rale Yizilayɛ na ɔlɛnea ye la. Mɔɔ li awieleɛ la a ɛnee ɔlɛka nwolɛ edwɛkɛ la. Bowaze nwunle kɛ anrɛɛ Wulutu bahola agya kpavolɛ, kɛ ɔle sukoavolɛ anzɛɛ ehyianli. Noko, ɛnee ɔkpondɛ kɛ ɔyɛ mɔɔ ɔle kpalɛ la ɔmaa Nawome yɛɛ Nawome ahu ne mɔɔ ɛwu la amaa nrenya ne duma amminli. Ɛhye maa yɛte deɛmɔti Bowaze anye liele bɛlɛra ɛhye subane kpalɛ ne anwo la abo.

19, 20. (a) Duzu ati a Bowaze angya Wulutu ɛkɛ ne ala ɛ? (b) Ndenle boni mɔ azo a Bowaze lale atiakunlukɛnlɛma ali na ɔhilele kɛ ɔngulo kɛ Wulutu anyunlu kɛgua aze ɛ?

¹⁹ Bowaze doale zo kɛ: “Kɛkala, me ra raalɛ, mmasulo; debie biala mɔɔ wɔbiza la, mebayɛ meamaa wɔ, ɔluakɛ awie biala  mɔɔ wɔ sua ye azo la ze kɛ ɛle raalɛ mɔɔ lɛ subane.” (Wul. 3:11) Ɔ nye liele nwolɛ kɛ ɔbagya Wulutu; ɔbayɛ kɛ mɔɔ Wulutu hanle kɛ ɔle kɔliagya na ɔgya ye la yeanyɛ ye nwanwane. Noko akee, ɛnee Bowaze le tenlenenli na ɛnee ɔmkpondɛ kɛ ɔdi ɔ ti anwo ɔyɛ debie biala. Bowaze zele Wulutu kɛ awie mɔɔ bikye Nawome ɔ hu ne mɔɔ ɛwu mɔɔ ɔwɔ kɛ di agya ne la wɔ ɛkɛ. Ɛnee Bowaze balumua amaa kɔliagya ne mɔɔ bikye ye la adenle saa ɔkɛgya Wulutu a.

²⁰ Bowaze hanle hilele Wulutu kɛ ɔla ɛkɛ ne ɔhendɛ na aleɛbahye ne yeahɔ amaa awie annwu ye. Ɛnee ɔngulo kɛ ɔ nee ye bɛ nyunlu gua aze, ɔluakɛ wɔannea a menli adwenle bayɛ bɛ kɛ bɛbɔ ɛbɛla ɛtane. Wulutu lale nrenya ne agyakɛ anu bieko, bie a ɛnee akee ye adwenle ɛgyinla wɔ mekɛ mɔɔ nrenya ne diele ye edwɛkɛ la. Mɔɔ maanle nu ɛtɛtetele la, ɔdwazole. Bowaze zule baale ma ne bie guale ye ɛdanlɛ ne anu na ɔziale ɔhɔle Bɛtelɛhɛm.—Bɛgenga Wulutu 3:13-15.

21. Duzu a manle Wulutu nyianle duma kɛ “raalɛ mɔɔ lɛ subane” a, na kɛ ɔkɛyɛ na yɛazukoa ye neazo ne ɛ?

²¹ Nea kɛzi ɔbayɛ kɛ Wulutu anye liele wɔ mekɛ mɔɔ ɔhakyele Bowaze edwɛkɛ ne mɔɔ ɔhanle la kɛ ɔle “raalɛ mɔɔ lɛ subane” la! Nɔhalɛ nu, mɔdenle mɔɔ Wulutu bɔle kɛ ɔkpondɛ Gyihova na yeazonle ye la boka nwolɛ bie a bɛbɔle ye duma kpalɛ la. Ɛnee eza yela atiakunlukɛnlɛma ali yehile Nawome nee ye menli ne, na yehile kɛ ɔdwenle bɛ nwo. Ɔvile ye ɛhulolɛ nu ɔyɛle nzenzaleɛ na ɔliele amaamuo fofolɛ ɔdole nu. Saa yɛsukoa Wulutu diedi ne a, yɛbabu awie mɔ nee bɛ amaamuo. Saa yɛyɛ ye zɔ a, ɔbamaa yɛdayɛ noko yɛanyia duma kpalɛ.

22, 23. (a) Duzu a Bowaze vale manle Wulutu a? (b) Folɛ boni a Nawome dule Wulutu a?

²² Wulutu dwule sua nu la, Nawome bizale ye kɛ; “Me ra raalɛ, kɛ ɔde ɛ?” Ɛnee Nawome kpondɛ kɛ ɔnwu ye saa Wulutu nyianle awie mɔɔ ɔbagya ye anzɛɛ yeanyia bie a. Wulutu hanle edwɛkɛ biala mɔɔ Bowaze hanle hilele ye la ɔhilele ye ase ne. Eza Wulutu vale baale ma ne mɔɔ Bowaze zule manle ye la ɔhilele Nawome.—Wul. 3:16, 17.

²³ Nawome vile nrɛlɛbɛ nu ɔdule Wulutu folɛ kɛ ɔdɛnla sua nu kenle ko ne, ɔmmakɔsesa ma wɔ ɛya ne anu. Ɔmanle Wulutu anwosesebɛ kɛ: “Nrenya ne ɛnrɛla, kɛ ɔkɛyɛ biala la, ɔwɔ kɛ ɔnwu edwɛkɛ ne guabelɛ ɛnɛ kenle ko ye ala.”—Wul. 3:18.

24, 25. (a) Kɛzi Bowaze hilele kɛ ɔle tenlenenli mɔɔ ɔnle angomedi ɛ? (b) Ndenle boni mɔ azo a bɛyilale Wulutu a?

 ²⁴ Nawome nwunle Bowaze adwenle bɔkɔɔ. Bowaze hɔle suakpole ne anlenkɛ kpole ne anloa, ɛleka mɔɔ ɔyɛ a mgbanyima ne mɔ yia la na ɔdɛnlanle aze ɔhendɛle ɔhɔkpulale kɛ kɔliagya mumua ne rale la. Wɔ alasevolɛma ne anyunlu, Bowaze manle kɔliagya ne nwunle ye kɛ ɔwɔ kɛ ɔgya Wulutu. Noko, nrenya ne anlie ando nu na ɔhanle kɛ ɔbagyegye ɔ mra ne mɔ agyalilɛ. Bowaze zele mgbanyima nee menli mɔɔ wɔ ɛkɛ ne la amuala kɛ, ɔbadɔ debie biala mɔɔ anrɛɛ le Yilemɛlɛke ɛdeɛ la, nee debie biala mɔɔ le Maalɔn ɛdeɛ la yeavi Nawome asa anu na yeagya Wulutu yeaboka nwo. Bowaze doale zo kɛ “amaa yeawo mralɛ wɔ agyadeɛ ne mɔɔ melie la duma nu.” (Wul. 4:1-10) Bowaze ɛnee le tenlenenli amgba na ɛnee ɔnle angomedi.

²⁵ Bowaze gyale Wulutu. Ɛhye anzi, yɛkenga kɛ: “[Gyihova] manle ɔvale ɛkolɛ na ɔwole ralɛ nrenya.” Mraalɛ mɔɔ wɔ Bɛtelɛhɛm la yilale Nawome na bɛhanvole Wulutu kɛ ɔsonle bolɛ ɔmaa Nawome ɔtɛla mralɛ mrenya nsuu bɔbɔ. Yɛnwu ye kɛ nzinlii Belemgbunli Devidi kpole ne rayɛle Wulutu alɔnra. (Wul. 4:11-22) Gyisɛse Kelaese noko rayɛle Devidi angabɛnzo.—Mat. 1:1. *

26. Duzu a Wulutu nee Nawome neazo ne maa yɛkakye a?

²⁶ Wulutu nee Nawome nyianle nyilalɛ, na Nawome liele kakula ne ɛnleanlɛ dole ɔ nwo zo. Mraalɛ nwiɔ ɛhye mɔ edwɛkɛ ne maa yɛnwu kɛ Gyihova Nymenle anye wɔ menli mɔɔ fa mɛlɛbɛnwoaze yɛ gyima ɛsesebɛ nea bɛ mbusua na bɛ nee ye nɔhalɛ azonvolɛ bɔ nu sonle la anwo zo. Ɔ rɛle ɛnvi kɛ ɔbayila menli mɔɔ bɛdi nɔhalɛ kɛ Bowaze, Nawome nee Wulutu la.