Gyihova kpondɛ kɛ ‘yɛdi nɔhalɛ.’ (Malakae 2:16) Ɛhye anwo hyia wɔ wɔ agyalɛ ne anu, ɔluakɛ saa ɛdi nɔhalɛ a yɛɛ wɔ bokavolɛ ne balie wɔ ali a. Na yemɔ noko a bamaa ɛlɔlɛ adɛnla bɛ avinli a.

Ɛnɛ, nɔhalɛlilɛ ɛnle agyalɛ dɔɔnwo anu. Amaa wɔabɔ wɔ agyalɛ ne anwo bane la, ɔwɔ kɛ ɛyɛ ninyɛne nwiɔ.

MƆƆ BAEBOLO NE KA LA: “Bɛnwu mɔɔ le kpalɛ la.” (Felepaema 1:10) Ninyɛne mɔɔ le kpalɛ anzɛɛ anwo hyia kpalɛ wɔ wɔ ɛbɛlabɔlɛ nu la ko a le wɔ agyalɛ ne. Ɔwɔ kɛ ɛmaa nwolɛ kyia wɔ.

Gyihova kpondɛ kɛ ɛfa wɔ adwenle ɛsie wɔ bokavolɛ ne anwo zo na ɛ nee ye ‘bɛ nye die.’ (Nolobɔvo ne 9:9) Gyihova ɛhile kɛ ɔnle kɛ ɛbu ɛ nye ɛgua wɔ bokavolɛ ne anwo zo, emomu, ɔkpondɛ kɛ bɛyɛ ninyɛne mɔɔ bamaa bɛ nye alie la. (1 Kɔlentema 10:24) Maa wɔ bokavolɛ ne ɛde nganeɛ kɛ ɔ nwo hyia wɔ.

DUZU A ƐBAHOLA WƆAYƐ A?:

• Nea kɛ ɛ nee ye babɔ nu ayɛ ninyɛne dahuu, na nyia mekɛ maa ye

• Mmadwenle ɛ ngome ɛ nwo

MƆƆ BAEBOLO NE KA LA: “Saa nrenya nea raalɛ maa ɔ nwo dɔ ye a ɛnee yeva ye wɔ ye ahonle nu.” (Mateyu 5:28) Saa nrenya bie kɔ zo dwenle ninyɛne zɛhae mɔ anwo a, yɛbahola yɛaha kɛ ɔnli nɔhalɛ ɔmmaa ye bokavolɛ ne.

Gyihova se: “Bɔ wɔ ahonle nwo bane.” (Mrɛlɛbulɛ 4:23, NW; Gyɛlɛmaya 17:9) Ɔwɔ kɛ ɛnea ninyɛne mɔɔ ɛmaa ɛ nye nea la boɛ. (Mateyu 5:29, 30) Dwobu nee ɔ nye yɛle ngyekyeleɛ kɛ ɔnrɛnlea raalɛ gyɛne ɔnrɛhulo ye. Sukoa ye neazo ne. (Dwobu 31:1) Bɔ kpɔkɛ kɛ ɛnrɛnlea nla nwo nvoninli. Eza bɔ mɔdenle kɛ ɛnrɛnyia awie gyɛne anwo ɛhulolɛ.

DUZU A ƐBAHOLA WƆAYƐ A?:

• Maa awie biala ɛnwu ye kɛ ɛ nee wɔ bokavolɛ ne ala a kɔ a

• Dwenle wɔ bokavolɛ ne nganeɛdelɛ nwo, na pɛ agɔnwolɛvalɛ biala mɔɔ ɔgyegye ye la anu