Lakki, Mootummaan Waaqayyoo haala garaa Kiristiyaanotaa keessa jiru kan argisiisu miti. a Kitaabni Qulqulluun mootummaa kana ‘Mootummaa samii’ jedhee waamuudhaan eessatti akka argamu ibsa. (Maatewos 4:17) Mootummaan Waaqayyoo bulchiinsa samii irraa bulchu akka taʼe ilaalchisee wanta Kitaabni Qulqulluun jedhu haa ilaallu.

•   Mootummaan Waaqayyoo bulchitoota, kan jalatti bulanii fi seera kan qabu siʼa taʼu hojii fedhii Waaqayyoo samii fi lafa irratti raawwachiisuu isaaniif kennameera.—Maatewos 6:10; Mulʼata 5:10.

•   Bulchiinsi ykn Mootummaan Waaqayyoo, mootummaa ‘uummata, sabootaa fi namoonni qooqa garaa garaa dubbatanii’ fi lafa irra jiraatan irratti bulchu dha. (Daaniʼel 7:13, 14) Aangoo bulchuu kan argate namoota isa jalatti bulan irraa utuu hin taʼin Waaqayyo irraa ti.—Faarfannaa 2:4-6; Isaayyaas 9:7.

•   Yesuus ergamoonni isaa amanamoo taʼan, Mootummaa isaa isa samii irratti isaa wajjin akka taʼanii fi achittis ‘teessoowwan irra akka taaʼan’ isaanitti himeera.—Luqaas 22:28, 30.

•   Mootummichi diinota qaba; diinota isaa kanas gara fuulduraatti ni balleessa.—Faarfannaa 2:1, 2, 8, 9; 110:1, 2; 1 Qorontos 15:25, 26.

 Kitaabni Qulqulluun Mootummaan Waaqayyoo wanta garaa namaa keessatti argamu, akkasumas kan bulchamu garaa nama sanaatiin akka taʼe hin barsiisu. Haa taʼu malee, Kitaabni Qulqulluun ‘dubbiin Mootummichaa’ ykn “misiraachoon Mootummichaa” garaa keenya keessa jiraachuu akka dandaʼu, garaa keenya keessa akka jiraatu gochuu akka qabnu ibsa.—Maatewos 13:19; 24:14.

“Mootummaan Waaqayyoo Isin Keessa Jira” Jechuun Maal Jechuu Dha?

 Akkaataa Kitaabonni Qulqulluu tokko tokko Luqaas 17:21 itti hiikan namoonni tokko tokko bakka Mootummichi jiru ilaalchisee akka burjaajaʼan godheera. Fakkeenyaaf, hiikkaawwan Kitaaba Qulqulluu hiika bara 1899 “Mootummaan Waaqayyoo isin keessa jira” jedha. Caqasa kana sirriitti hubachuuf yaada naannoo isaa jiru ilaaluu qabna.

 Yesuus yaada kana dubbachaa kan ture Fariisotatti dha; Fariisonni immoo garee geggeessitoota amantii Yesuusiin mormanii fi isa ajjeesuuf mariʼachaa turani dha. (Maatewos 12:14; Luqaas 17:20) Maarree Mootummichi haala garaa namoota hamoo taʼan keessa jiru akka taʼe yaaduun sirrii dhaa? Yesuus Fariisotaan, “Keessi keessan . . . fakkeessaa fi hamminaan kan guutame dha” isaaniin jedheera.—Maatewos 23:27, 28.

 Hiikkaawwan Kitaaba Qulqulluu yaada Luqaas 17:21 irratti argamu sirriitti kaaʼan kan biroon jiru: “Mootummaan Waaqayyoo gidduu keessan jira.” (Dalga kan ciibse nuyi; Kitaaba Qulqulluu Hiika Bara 1997) “Mootummaan Waaqayyoo isin gidduu jira.” (Kitaaba Qulqulluu Hiika Addunyaa Haaraa) Mootummaan Waaqayyoo Fariisota “gidduu” akka taʼe kan ibsame, Mootiin Mootummaa kanaa akka taʼu Waaqayyoon kan muudame isaan gidduu waan tureefi dha.—Luqaas 1:32, 33.