Haa taʼu malee, namoonni michoota isaanii wajjin wal qunnamuuf adda durummaadhaan teknoolojiitti fayyadaman yeroo baayʼee . . .

• miira michoota isaanii hin hubatan.

• kophummaa fi gad aantummaan isaanitti dhagaʼama.

• namoota kaan irratti xiyyeeffachuu caalaa of irratti xiyyeeffatu.

MIIRA WARRA KAANII HUBACHUU

Miira nama tokkoo hubachuuf yeroo fudhannee waaʼee nama sanaa yaaduu qabna. Ergaa gabaabaa walii erguu fi weebsaayitii hawaasaa fayyadamuudhaan kan qabamnu taanaan garuu kana gochuun nutti ulfaata.

Teknoolojiin kan si toʼatu taanaan ergaa michoonni kee siif erganiif deebii kennuun hojii sitti taʼa. Ergaan siif ergamu baayʼee waan taʼeef, gargaarsa michuu kee barbaachisu irratti utuu hin yaadin ergaa siif ergamu hundumaaf daftee deebii kennuu irratti xiyyeeffatta.

MEE YAADI: Michoota kee waliin wal qunnamuuf teknoolojiitti yeroo fayyadamtu ‘miira isaanii akka hubattu’ argisiisuu kan dandeessu akkamitti?—1 PHEEXIROS 3:8.

MIIRA GAD AANTUMMAA

Qorannaan tokko akka ibsetti namoonni hedduun weebsaayitii hawaasaa erga fayyadamanii booda miira gad aantummaatu isaanitti dhagaʼama. Qorattoonni sun namni tokko suuraawwan namoonni baasan ilaaluudhaan yeroo dabarsuun isaa “yeroo isaa akka gube akka isatti dhagaʼamu akka godhu” ibsaniiru.

Kana malees, namoonni suuraawwan nama hawwatanii fi warri kaan baasan ilaaluun isaanii karaa sirrii hin taaneen namoota kaanii wajjin wal bira of qabuuf isaan kakaasuu dandaʼa. Kun immoo, jireenyi namoota kaanii yeroo hundumaa gammachiisaa akka taʼetti yaaduudhaan jireenya isaaniitti akka hin gammanne godha.

MEE YAADI: Weebsaayitii hawaasaa yeroo fayyadamtu karaa sirrii hin taaneen namoota kaanii wajjin wal bira of qabuu irraa of eeguu kan dandeessu akkamitti?—GALAATIYAA 6:4.

OF IRRATTI XIYYEEFFACHUU

Barsiistuun takka barattoonni ishii tokko tokko ofittoo fi hiriyoota waa isaaniif godhan qofa kan barbaadan akka taʼan barreessiteetti. * Namoonni akkasii faayidaa michummaan isaanii isaaniif argamsiisu qofa irratti xiyyeeffatu. Namni akkasii michoota isaa akkuma appilikeeshinii yeroo barbaadutti ittiin bashannanee, yeroo hin barbaannetti immoo cufutti ilaala.

MEE YAADI: Wanti intarneetii irratti baastu namoota kaanii wajjin wal dorgomaa ykn gar malee of irratti xiyyeeffachaa akka jirtu argisiisaa?—GALAATIYAA 5:26.

ITTI FAYYADAMA TEKNOOLOJII KEE QORI

Teknoolojiin gooftaa utuu hin taʼin tajaajilaa kee yoo taʼe michoota kee wajjin wal qunnamuu fi caalaatti isaanitti dhihaachuuf si gargaara.

Wantoota irratti hojjechuu barbaaddu irratti mallattoo godhi ykn yaada kee barreeffadhu.

• Yeroo baayʼee ergaa barreeffamaa erguu mannaa namootaa wajjin qaamaan haasaʼuu

• Yeroo namootaa wajjin haasoftu bilbila kee of irraa fageessuu (ykn sagalee isaa dhaamsuu)

• Yeroo weebsaayitii hawaasaa fayyadamuudhaan dabarsitu daangessuu

• Nama xiyyeeffannaadhaan dhaggeeffatu taʼuu

• Michuu kee haala rakkisaa keessa jiru wajjin wal arguu