KENNAAN adda taʼe yoo nuu kenname, dinqisiifannaa keenya akka ibsinu nu dirqisiisa. Yesuus namoota bara sanatti dhukkuba qoricha hin qabneen qabamanii dararamaa turan kurnan erga fayyisee booda yaada kana ifa godheera. Namoota kurnan sana keessaa inni tokko, “sagalee guddaadhaan Waaqayyoon galateeffachaa deebiʼe.” Yeroo kanatti Yesuus, “Namoonni fayyan kudhan hin turree? Maarree warri kaan salgan eessa buʼan?” jedhe. (Luqaas 17:12-17) Kana irraa maal baranna? Gocha gaarummaa namoonni nutti argisiisan battalumatti dagachuu dandeenya!

Furiin kennaawwan kaan irra baayʼee adda dha. Kennaawwan hanga harʼaatti kennaman hunda irras baayʼee kan caalu dha. Maarree wanta Waaqayyo siif godheef ilaalcha akkamii qabaachuu qabda?

• Qaama kennaa kana sii kenne bari. Furiin ilmaan namootaa hundumaatiif jireenya bara baraa kan argamsiisu battaluma tokkotti miti. Kanaa mannaa, Yesuus kadhannaa Waaqayyotti dhiheesse irratti, “Jireenya bara baraa argachuu akka dandaʼaniif, si isa Waaqa dhugaa tokkicha taatee fi Yesuus Kiristoos isa ati ergite sana beekuu qabu” jedheera. (Yohaannis  17:3) Namni tokko yeroo ati ijoollee xiqqoo turtetti namichi tokko lubbuu kee akka siif baraare utuu sitti himee, waaʼee namicha sanaa fi maaliif akka si oolche beekuu hin barbaadduu? Yihowaan, inni furii lubbu baraarsaa taʼe siif kenne, inni eenyu taʼuu isaa akka bartu qofa utuu hin taʼin, caalaatti isaa wajjin michummaa akka uummattu ni fedha. Kitaabni Qulqulluun, “Gara Waaqayyootti dhihaadhaa, innis isinitti ni dhihaata” jedhee nu gorsa.—Yaaqoob 4:8.

• Furicha irratti amantii qabaadhu. “Ilmatti kan amanu jireenya bara baraa qaba.” (Yohaannis 3:36) Amanuu jechuun maal jechuu dha? Hojiidhaan argisiisuu jechuu dha; furicha irratti amantii qabaachuun hojiidhaan argisiisuu gaafata. (Yaaqoob 2:17) Hojii akkamii? Kennaan tokko kan kee kan taʼu, carraaqqii gootee yoo fudhatte qofa dha. Kanaafuu, carraaqqii gochuudhaan furicha fudhachuu qabda. Akkamitti? Waaqayyo akkamitti akka jiraattu akka barbaadu baradhu; achiis wanta baratte hojii irra oolchi. * Waaqayyo cubbuu kee akka sii dhiisuu fi qalbii qulqulluu akka sii kennuuf kadhadhu. Furichi warra itti amanan hundumaaf gara fuulduraatti bara baraaf nagaa, tasgabbii fi badhaadhummaa argamsiisuuf wabii akka taʼu amanannaa guutuu qabaachuudhaan Waaqayyotti dhihaadhu!—Ibroota 11:1.

• Ayyaana Yaadannoo duʼa Yesuus irratti argami. Yesuus waggaa waggaatti qophii furii kana akka yaadannuuf, Ayyaana Yaadannoo hundeesseera. Ayyaana kana ilaalchisee, “Kana yeroo hundumaa yaadannoo kootiif godhaa” jedheera. (Luqaas 22:19) Dhugaa Baatonni Yihowaa Ayyaana Yaadannoo duʼa Yesuus Kibxata, Ebla 9, 2009 (Ebla 11, 2017) erga aduun seentee booda ni kabaju. Sagantaan saʼaatii tokkoof turu kun, haasaa duuti Kiristoos maaliif akka barbaachisee fi faayidaa duuti isaa ammas taʼe gara fuulduraatti argamsiisu ibsa. Waggaa darbe, addunyaa maratti namoonni gara miliyoona 20 taʼan Ayyaana Yaadannoo irratti argamaniiru. Atis dinqisiifannaa kennaa Waaqayyoo isa hunda caalu kanaaf qabdu argisiisuuf nu waliin akka kabajju miira hoʼaadhaan si afeerra.