Wangeela Maarqos 10:1-52
-
Gaaʼelaa fi wal hiikuu (1-12)
-
Yesuus ijoollee eebbise (13-16)
-
Gaaffii namichi sooressi gaafate (17-25)
-
Mootummichaaf aarsaa kaffaluu (26-31)
-
Yesuus akka duʼu ammas raajiin ni dubbatame (32-34)
-
Gaaffii Yaaqoobii fi Yohaannis gaafatan (35-45)
-
Yesuus namoota hedduudhaaf furii kaffale (45)
-
-
Barxiimewos inni qaro dhabeessi ni fayye (46-52)
10 Yesuus achii kaʼee gara daangaawwan Yihudaa warra Yordaanos gama jiranii dhufe; ammas namoonni hedduun isa biratti walitti qabaman. Inni akkuma amala isaa ammas isaan barsiisuu jalqabe.+
2 Fariisonni isa qoruuf yaaduudhaan gara isaa dhufanii, namni tokko haadha manaa isaa akka hiiku seerri kan isaaf heyyamu taʼuu fi dhiisuu isaa isa gaafatan.+
3 Innis deebisee, “Museen maal isin ajaje?” isaaniin jedhe.
4 Isaanis, “Museen waraqaa ragaa ittiin ishii hiiku ishiidhaaf kennee akka ishii hiiku heyyameera”+ jedhan.
5 Yesuus garuu akkana isaaniin jedhe: “Museen sababii mata jabina keessaniitiif+ ajaja kana isiniif barreesse.+
6 Haa taʼu malee, jalqaba uumamaatii kaasee, ‘Waaqayyo dhiiraa fi dubartii godhee isaan uume.+
7 Kanaan kan kaʼes, namni abbaa isaa fi haadha isaa ni dhiisa;+
8 lamaan isaanii foon tokko taʼu’;+ kanaafuu, isaan sana booda foon tokko dha malee lama miti.
9 Egaa, wanta Waaqayyo walitti hidhe namni kam iyyuu gargar hin baasin.”+
10 Yeroo manatti deebiʼanis, barattoonni isaa waaʼee kanaa isa gaafachuu jalqaban.
11 Innis akkana isaaniin jedhe: “Namni haadha manaa isaa hiikee kan biraa fuudhu kam iyyuu ishii irratti ejja raawwata;+
12 dubartiin takkas abbaa manaa ishii hiiktee nama kan biraatti yoo heerumte ejja raawwatti.”+
13 Namoonni akka inni isaan qaqqabuuf ijoollee xixinnoo gara isaatti fiduu jalqaban; barattoonni garuu isaanitti dheekkaman.+
14 Yesuus yeroo kana argu aaree akkana isaaniin jedhe: “Mootummaan Waaqayyoo warra akkanaatiif waan taʼeef, ijoollee xixinnoon gara koo haa dhufan, isaan dhowwuuf hin yaalinaa.+
15 Dhuguman isiniin jedha, namni Mootummaa Waaqayyoo akka mucaa xinnoo tokkootti hin simanne kam iyyuu matumaa itti hin galu.”+
16 Inni ijoollee sana ni hammate; harka isaa isaan irra kaaʼees+ isaan eebbise.
17 Utuu inni deemaa jiruus namni tokko fiigee dhufee, isa duratti jilbeenfatee, “Yaa Barsiisaa gaarii, jireenya bara baraa dhaaluuf maal gochuun qaba?”+ jedhee isa gaafate.
18 Yesuusis akkana isaan jedhe: “Maaliif gaarii jettee na waamta? Waaqa tokkicha malee gaariin hin jiru.+
19 Ajajawwan, ‘Hin ajjeesin,+ hin ejjin,+ hin hatin,+ sobaan ragaa hin baʼin,+ hin gowwoomsin,+ abbaa kee fi haadha tee kabaji’+ jedhan beekta.”
20 Namichis, “Yaa bariisaa, wantoota kana hunda ijoollummaa kootii jalqabee eegeera” isaan jedhe.
21 Yesuusis isa ilaalee isa jaallate; achiis, “Wanta tokkotu sitti hirʼata: Dhaqi, wanta qabdu gurguriitii hiyyeeyyiidhaaf kenni; samii irratti qabeenya ni argatta; sana booda kottuutii duuka buutuu koo taʼi”+ isaan jedhe.
22 Inni garuu yommuu kana dhagaʼu ni gadde; qabeenya hedduu waan qabuufis gaddaa achii deeme.+
23 Yesuus naannoo isaa erga ilaalee booda barattoota isaatiin, “Namoota maallaqa qabaniif Mootummaa Waaqayyootti galuun akkam rakkisaa dha!”+ jedhe.
24 Barattoonni isaa garuu dubbiin isaa kun isaan dinqisiise. Achiis Yesuus deebisee akkana isaaniin jedhe: “Yaa ijoolle, Mootummaa Waaqayyootti galuun akkam rakkisaa dha!
25 Namni sooressi Mootummaa Waaqayyootti galuu mannaa, gaalli qaawwa lilmoo keessa hulluuquutu salphata.”+
26 Isaanis caalaatti dinqisiifatanii, “Egaa eenyutu fayyuu dandaʼa ree?”+ isaan jedhan.*
27 Yesuusis gara isaanii ilaalaa, “Kun namootaaf hin dandaʼamu, Waaqayyoof garuu akkana miti; Waaqayyoof wanti hundi ni dandaʼama”+ jedhe.
28 Pheexirosis, “Kunoo, nuti wanta hundumaa dhiisnee si duukaa buuneerra”+ isaan jedhe.
29 Yesuusis akkana jedhe: “Dhuguman isiniin jedha, namni anaa fi misiraachichaaf jedhee, mana yookiin obboloota yookiin obboleettota yookiin haadha yookiin abbaa yookiin ijoollee yookiin maasii dhiise,+
30 yeroo ammaatti ariʼatamaa wajjin+ manneen, obboloota, obboleettota, haadhota, ijoollee fi maasii dachaa 100, sirna* dhufu keessatti immoo jireenya bara baraa kan hin arganne hin jiru.
31 Haa taʼu malee, warri duraa hedduun warra boodaa taʼu, warri boodaa hedduun immoo warra duraa taʼu.”+
32 Isaan karaa gara Yerusaalemitti geessu irra yeroo ol baʼaa turanitti Yesuus isaan dura deemaa ture; isaan baayʼee dinqisiifatanii kan turan yeroo taʼu, warri isa duukaa buʼan garuu ni sodaatan. Inni ammas warra Kudha Lamaan kophaatti baasee akkana jedhee wantoota isa irra gaʼuuf jiran isaanitti himuu jalqabe:+
33 “Kunoo, gara Yerusaalemitti ol baʼaa jirra; Ilmi namaas dura buutota lubootaa fi barsiisota seeraatti dabarfamee ni kennama. Isaan duʼa isatti murteessu, saboota kaanittis dabarsanii isa kennu.
34 Isatti qoosu, isatti tufu, isa garafu, akkasumas isa ajjeesu; guyyaa sadii booda garuu duʼaa ni kaʼa.”+
35 Ilmaan Zabdewos kan taʼan Yaaqoobii fi Yohaannis+ gara isaa dhufanii, “Barsiisaa, wanta si kadhannu hunda akka nuuf gootu barbaanna”+ isaan jedhan.
36 Innis, “Maal akkan isiniif godhu barbaaddu?” isaaniin jedhe.
37 Isaanis, “Bakka ulfinaa+ keetti tokkoon keenya karaa mirga kee, tokkoon keenya immoo karaa bitaa kee akka teenyu nuuf heyyami” jedhanii deebisan.
38 Yesuus garuu, “Isin wanta kadhattan hin beektan. Xoofoo ani dhugu dhuguu yookiin cuuphaa ani cuuphamaa jiru cuuphamuu ni dandeessuu?”+ isaaniin jedhe.
39 Isaanis, “Eeyyee, ni dandeenya” isaan jedhan. Yesuusis akkana isaaniin jedhe: “Xoofoo ani dhugu ni dhugdu, cuuphaa ani cuuphamaa jirus ni cuuphamtu.+
40 Karaa mirga koo yookiin karaa bitaa koo taaʼuun garuu, warra isaaniif qophaaʼeef kan kennamu dha malee wanta ani kennu miti.”
41 Barattoonni kurnan yommuu waaʼee kanaa dhagaʼan Yaaqoobii fi Yohaannisitti ni aaran.+
42 Yesuus garuu ofitti isaan waamee akkana isaaniin jedhe: “Namoonni bulchitoota sabootaa jedhaman gooftolii akka isaan irratti taʼan, guguddoonni isaaniis aangoo isaanii akka isaan irratti argisiifatan beektu.+
43 Isin gidduutti garuu akkana taʼuu hin qabu; kanaa mannaa, isin gidduutti guddaa taʼuu kan barbaadu kam iyyuu tajaajilaa keessan haa taʼu;+
44 namni isin gidduutti dura taʼuu barbaadu kam iyyuu garbicha hunda keessanii haa taʼu.
45 Sababiin isaas, Ilmi namaa iyyuu kan dhufe warra kaan tajaajiluu+ fi lubbuu isaa bakka namoota hedduu furii* godhee kennuufi+ malee, akka isa tajaajilaniif miti.”
46 Achiis gara Yerikoo dhufan. Haa taʼu malee, inni, barattoonni isaa fi namoonni hedduun yommuu Yerikoodhaa baʼaa turanitti, Barxiimewos (ilmi Xiimewos) inni qaro dhabeessaa fi kadhattuu taʼe karaa qarqara taaʼee ture.+
47 Innis Yesuus namni Naazireet sun achiin darbaa akka jiru yommuu dhagaʼu, “Yaa Yesuus Ilma Daawit,+ garaa naa laafi!”+ jedhee iyye.
48 Achiis namoonni hedduun akka inni callisu itti himuudhaan isa ifachuu jalqaban; inni garuu, “Yaa Ilma Daawit, garaa naa laafi!” jedhee ittuma caalchisee iyye.
49 Kanaafuu, Yesuus dhaabbatee, “Isa waamaa!” jedhe. Isaanis namicha qaro dhabeessa sanaan, “Jabaadhu! Kaʼi; si waamaa jira” jedhan.
50 Innis uffata isaa of irraa darbatee, utaalee kaʼuudhaan gara Yesuus dhaqe.
51 Achiis Yesuus, “Maal akkan siif godhu barbaadda?” isaan jedhe. Namichi qaro dhabeessi sunis, “Rabboonii,* agartuun koo akka anaaf deebiʼu godhi” isaan jedhe.
52 Yesuusis, “Dhaqi. Amantiin kee si fayyiseera”+ isaan jedhe. Namichis agartuun isaa yeruma sana isaaf deebiʼe;+ achiis namoota sanaa wajjin isa duukaa buʼuu jalqabe.
Miiljaleewwan
^ Ykn tarii, “waliin jedhan.”
^ Ykn., “bara.” Ibsa Jechootaa ilaali.
^ Ykn., “beenyaa; kiisii.”
^ “Barsiisaa” jechuu dha.
