Barumsi buʼuuraa Macaafa Qulqulluu hanga ammaatti ilaalle, jaalala Yihowaadhaaf qabdu akka sii guddise hin shakkisiisu. Jaalalli kun caalaatti guddachaa akka adeemu gochuuf, carraaqqii gochuu keenya itti fufuu qabna. (1 Phexros 2:2) Abdiin jireenya barabaraa argachuuf qabdu, Dubbii Waaqayyoo qayyabachuudhaan Waaqayyotti dhihaachuu itti fufuu keerratti kan hundaaʼedha.​—Yohannis 17:3; Yihudaa 21 dubbisi.

Waaqayyoon ilaalchisee beekumsi qabdu guddachaa yommuu adeemu amantiinkees ni jabaata. Amantiinimmoo Waaqayyoon gammachiisuuf si gargaara. (Ibroota 11:1, 6) Qalbii geddarachuufi akkaataa jireenyaa keerratti jijjiirama barbaachisaa gochuuf si kakaasa.​—Hojii Ergamootaa 3:19 dubbisi.

Wantoota baratte namootatti himuun waanuma jirudha; hundi keenyayyuu misiraachoo namootatti himuun nu gammachiisa. Qayyabannaakee yommuu itti fuftu, Macaafa Qulqulluutti fayyadamtee amantii Yihowaafi misiraachicharratti qabdu ibsuu kan dandeessu akkamitti akka taʼe baratta.​—Roomaa 10:13-15 dubbisi.

Namoonni hedduun misiraachicha michoota ykn firoottansaaniitti himuudhaan jalqabu. Misiraachicha yeroo lallabdu malaan gargaarami. Amantiinsaanii dogoggora akka taʼe dubbachuu mannaa abdiiwwan Waaqayyo kenne itti himi. Namoonni yeroo baayʼee wanta ati dubbattu caalaa gaarummaa ati argisiistuuf xiyyeeffannaa akka kennanis yaadadhu.​—2 Ximotewos 2:24, 25 dubbisi.

Dubbii Waaqayyoo qayyabachuunkee karaa hafuuraa guddachuuf si gargaara. Suutuma suutas, Yihowaa wajjin michooma adda taʼe qabaatta. Akkasumas, miseensa maatiisaa keessaa tokko taʼuudhaan kansaa taʼuu dandeessa.​—2 Qorontos 6:18 dubbisi.

Dubbii Waaqayyoo qayyabachuukee itti fufuudhaan gama hafuuraatiin guddina argisiisaa deemuu dandeessa. (Ibroota 5:13, 14) Dhugaa Baatota Yihowaa keessaa namni tokko, kitaaba Macaafni Qulqulluun Maal Barsiisa? jedhamutti fayyadamee akka si qayyabsiisu gaafadhu. Dubbii Waaqayyoorraa barachaa yommuu adeemtu, jireenyikees caalaatti fooyyaʼaa dhufa.​—Faarfannaa 1:1-3; 73:27, 28 dubbisi.

Misiraachoon kun Yihowaa isa Waaqa gammadaa biraa dhufe. Namoota sabasaa taʼanitti michoomuudhaan isatti dhihaachuu dandeessa. (Ibroota 10:24, 25) Carraaqqii Yihowaa gammachiisuuf gootu itti fufuudhaan, jireenya dhugaa, jechuunis jireenya barabaraa argatta. Waaqayyotti dhihaachuun wanta gochuu dandeessu hundarra kan caaludha.​—1 Ximotewos 1:11; 6:19 dubbisi.