1, 2. а) Киристе ӕ апостолти цӕмӕй бафӕдзахста? б) Апостолтӕ Киристей цӕмӕн ниууагътонцӕ? (Кӕсӕ ма хузӕмӕ.)

 КИРИСТЕ загъта: «Уод бӕргӕ федар ӕй, фал бауӕр ба лӕмӕгъ ӕй» (Матф. 26:41б) a. Уомӕй ӕй ци зӕгъун фӕндадтӕй? Киристе ӕй лӕдӕрдтӕй, адӕн ӕнӕнхӕст ке ’нцӕ ӕма арӕх ке рӕдуйунцӕ. Фал ма ’й аци дзурдтӕй фӕндадтӕй ӕ ахуркӕнуйнӕгти бафӕдзӕхсун, цӕмӕй сӕхецӕй ӕгӕр нифсгун ма уонцӕ. Цалдӕр сахаттей размӕ апостолтӕ дзурдтонцӕ, сӕ Хецауи ке неци хузи ниууадздзӕнцӕ (Матф. 26:35). Уотӕ ке архайдзӕнцӕ, уобӕл сӕхуӕдтӕ федарӕй ӕууӕндтӕнцӕ ӕма сӕ фӕндгӕ дӕр кодта. Сӕ гъудий кӕрон дӕр н’ адтӕй, зин уавӕри ӕндӕрхузи ке бакӕндзӕнцӕ. Гъе уой туххӕй син Киристе загъта: «Ма бафунӕй уотӕ ӕма ӕдзох коветӕ, цӕмӕй фӕлварӕни федар фӕллӕууайтӕ» (Матф. 26:41а).

² Гъигагӕн, апостолтӕ Киристемӕ нӕ байгъустонцӕ. Сӕ Ахургӕнӕги син ку ниййахӕстонцӕ, уӕд куд бакодтонцӕ? Ци дзурд равардтонцӕ, уой исӕнхӕст кодтонцӕ? Нӕъ. Сӕхецӕй ӕнгъӕл дӕр куд н’ адтӕнцӕ, уотӕ бакодтонцӕ: фӕттарстӕнцӕ ӕма ралигъдӕнцӕ (Матф. 26:56).

3. а) Адӕймаг ӕхебӕл ку ранвӕрсуй, уӕд ӕй е куд фӕхъхъор кӕнуй, цӕмӕй Йеговӕбӕл еузӕрдонӕй байзайа? б) Аци статьяй цӕмӕ ӕркӕсдзиан?

³ Адӕймаг ӕхебӕл ӕгӕр ку ранвӕрсуй, уӕд масти хай бауй. Дзубанди дӕр ибӕл нӕййес, мах фӕндуй Йегови зӕрдӕ рохс кӕнун ӕма рӕстӕй архайун. Фал гъӕуама ма иронх кӕнӕн, ӕнӕнхӕст ке ан ӕма ни фӕлварӕнӕй хизт ке неке ӕй (Ром. 5:12; 7:21–23). Гӕнӕн ес, ӕма ӕнӕнгъӕлти уӕхӕн уавӕрти бахауӕн, ӕма нин тӕрегъӕди нихмӕ федар фӕллӕуун хъӕбӕр зин уодзӕй. Цӕмӕй Йеговӕбӕл ӕма ӕ Фуртбӕл еузӕрдонӕй байзайӕн, уой туххӕй гъӕуама Киристей фӕдзӕхст нӕ зӕрдӕбӕл  дарӕн. Аци статьяй бал фиццаг ӕркӕсдзиан, уӕлдай лӕмбунӕг цӕхуӕн гъуддӕгти гъӕуама уӕн, уомӕ. Уой фӕсте ба базондзиан, нӕ бон куд ӕй фӕлварӕнтӕй нӕхе багъӕуай кӕнун. Фӕстагмӕ ба радзордзиан, ци нин банхус кӕндзӕй, цӕмӕй алкӕддӕр къӕрцгъос уӕн.

УӔЛДАЙ ЛӔМБУНӔГ ЦӔХУӔН ГЪУДДӔГТИ ГЪӔУАМА УӔН?

4, 5. Уотӕ уӕззау ка нӕй, уӕхӕн тӕрегъӕдтӕй дӕр нӕхе цӕмӕн гъӕуай кӕнӕн?

⁴ Еуӕй-еу тӕрегъӕдтӕ уотӕ уӕззау нӕ фӕуунцӕ, фал уӕддӕр тӕссаг ӕнцӕ, уомӕн ӕма уони туххӕй адӕймаг Йеговӕй раидард уй. Удта ма, гӕнӕн ес, уӕззау тӕрегъӕдмӕ дӕр ӕркӕнонцӕ.

⁵ Фӕлварӕни ни алкедӕр бахауй. Ӕмхузӕн ке нӕ ан, уой туххӕй ни алкӕмӕдӕр ӕхе лӕмӕгъдзийнӕдтӕ ес. Кедӕрти гъӕуй ӕнӕгъдау фӕндти хӕццӕ тох кӕнун. Иннетӕ ба фӕттох кӕнунцӕ, цӕмӕй мастурбаци ма кӕнонцӕ ӕма порнографимӕ ма кӕсонцӕ. Ес ма уӕхӕнттӕ дӕр, ӕ маст уорамун ӕнцон кӕмӕн нӕй кенӕ ба адӕнӕй ка тӕрсуй, кенӕ ма хъӕбӕр хеваст ка фӕууй, уӕхӕнттӕ ӕма уотӕ идарддӕр. Иаков куд загъта, уомӕ гӕсгӕ «алкӕмӕндӕр фӕлварӕн фӕууй, ӕхе зӕрди фӕндӕ ’й ке ’сцирен кӕнуй ӕма ӕ фӕдбӕл ке рандӕ уй», е (Иак. 1:14).

6. Цӕбӕл гъӕуама сӕттӕн?

⁶ Ду ба ’й зонис, фӕлварӕн дин цӕхуӕн гъуддӕгтӕ исунцӕ, уой? Еуӕй-еухатт нин нӕ гъӕндзийнӕдтӕбӕл басӕттун зин фӕууй. Кенӕ ба нӕхе уотӕ фӕддарӕн, цума нин тӕссаг нецӕмӕй фӕууй. Фал нӕ е хуарзӕй нецӕмӕ ’ркӕндзӕй (1 Иоан. 1:8). Расагъӕс кӕнӕ, Павел ма сауӕнгӕ фӕлтӕрдгун киристӕнтти дӕр фӕдзахста, лӕмбунӕг ку нӕ уонцӕ, уӕд фӕлварӕнти ке бахаудзӕнцӕ (Гал. 6:1). Гъӕуама нӕхе ма сайӕн ӕма нин фӕррӕдуйунӕй тӕссаг кӕми уодзӕй, уӕхӕн уавӕртӕ рагацау уинӕн (2 Кор. 13:5).

7. Уӕлдай лӕмбунӕг цӕмӕн гъӕуама уӕн? Ӕрхӕссӕ цӕветтон.

⁷ Зӕгъӕн, нӕ лӕмӕгъдзийнӕдтӕ исбӕрӕг кодтан. Идарддӕр ба нин ци кӕнгӕ ’й? Гъӕуама ӕгас хъауритӕй архайӕн, цӕмӕй сӕ хӕццӕ тох кӕнӕн ӕма ма фӕррӕдуйӕн. Ӕрхӕссӕн цӕветтон. Рагидзаманти горӕти фӕрстӕн сӕ тӕккӕ лӕмӕгъдӕр бунат адтӕй колдуар. Уой туххӕй сӕ уӕлдай хъӕбӕрдӕр гъӕуай кодтонцӕ. Уотӕ гъӕуама мах дӕр уӕлдай лӕмбунӕг уӕн, лӕмӕгъ кӕми ан, еци гъуддӕгтӕмӕ (1 Кор. 9:27).

НӔ БОН КУД ӔЙ НӔХЕ ФӔЛВАРӔНТӔЙ БАГЪӔУАЙ КӔНУН?

8, 9. Ӕмбесӕндти 7 сӕри ци лӕхъуӕни туххӕй дзурд цӕуй, уомӕн ӕ бон куд адтӕй ӕхе тӕрегъӕдӕй багъӕуай кӕнун? (Ӕмбесӕндтӕ 7:8, 9, 13, 14, 21).

⁸ Нӕ бон куд ӕй нӕхе фӕлварӕнӕй багъӕуай кӕнун? Ӕркӕсӕн, Ӕмбесӕндти 7 сӕри  ци лӕхъуӕни кой цӕуй, уой хабарӕй цӕбӕл ахур кӕнӕн, уомӕ. Ихӕлд силгоймаг ин загъта, цӕмӕй ӕхсӕвӕ ӕ хӕццӕ фӕууа, ӕма лӕхъуӕн дӕр нӕ фӕллӕудтӕй. 22 стихи финст ӕй: «Ӕма е дӕр ӕ фӕдбӕл рараст ӕй». Фиццаг бакастӕй адӕймагмӕ уотӕ фӕккӕсдзӕй, цума еци хабар ӕнай-ӕнойти ӕрцудӕй. Фал уой размӕ ци стихтӕ финст ес, уонӕй ес базонӕн, еци лӕхъуӕн цалдӕр ӕнӕзунд унаффи ке рахаста ӕма ’й тӕрегъӕдмӕ етӕ ке ӕркодтонцӕ.

⁹ Гъуддаг уомӕй райдӕдта, ӕма лӕхъуӕн фӕцӕйцудӕй еци «силгоймаг кӕми цардӕй, еци гъӕунги рӕзти ӕма рараст ӕй ӕ хӕдзари ’рдӕмӕ». (Бакӕсӕ Ӕмбесӕндтӕ 7:8, 9.) Еци силгоймаги ку фӕууидта, уӕд иннердӕмӕ нӕ рандӕ ’й, фал имӕ бацудӕй. Ӕхецӕн ра ба кӕнун бауагъта ӕма ин куд лигъстӕ кӕнуй, уомӕ игъуста. Силгоймаг ин загъта, фарни нивӕндтӕ ке ӕрхаста. Уомӕй ӕй, ӕвӕдзи, фӕндадтӕй бавдесун, лӕгъуз адӕймаг ке нӕй. (Бакӕсӕ Ӕмбесӕндтӕ 7:13, 14, 21.) Еци лӕхъуӕн ӕгас еци ӕнӕзунд къахдзӕфтӕ ку не ’скодтайдӕ, уӕд ӕхе фӕлварӕни нӕ багӕлстайдӕ ӕма тӕрегъӕд не ’скодтайдӕ.

10. Уомӕн гӕнӕн куд ес, ӕма абони дӕр еске Ӕмбесӕндти киунуги ци лӕхъуӕни туххӕй дзурд цӕуй, уой хузӕн тӕрегъӕд искӕна?

¹⁰ Соломони ӕмбесондӕй бӕрӕг ӕй, уӕхӕн хабарӕй ӕгас Йегови лӕггадгӕнгутӕн дӕр тӕссаг ке ӕй. Тӕрегъӕд ка искодта, уӕхӕн адӕймаг, ка ’й зонуй, дес кӕна, уӕхӕн хабар ибӕл куд ӕрцудӕй, уобӕл. Удта ма уотӕ дӕр дзора, ӕхуӕдӕг дӕр уой ӕнгъӕл ке н’ адтӕй. Фал фӕстӕмӕ ку ракӕса, уӕд ӕй фӕууиндзӕй, еци гъуддагмӕ ’й цӕхуӕндӕр къахдзӕфтӕ ке ӕркодтонцӕ. Ка ’й зонуй, Йегови ка нӕ уарзуй, уони хӕццӕ лимӕн кӕнун райдӕдта кенӕ ба ци ерхӕфсӕнтӕ ӕвзурста, ӕ рӕстӕг ци бунӕтти ӕрвиста ӕма ци сайттӕмӕ бацӕуидӕ, етӕ киристӕнтти аккаг н’ адтӕнцӕ. Уомӕй уӕлдай ма, ка ’й зонуй, Йеговӕмӕ дӕр нӕбал кувта, Библи дӕр нӕбал кастӕй, удта ӕмбурдтӕмӕ ӕма игъосун кӕнунмӕ дӕр нӕбал цудӕй. Мадта Ӕмбесӕндти 7 сӕри ке кой цӕуй, еци лӕхъуӕни хузӕн тӕрегъӕд ӕнӕнгъӕлти не ’скодта.

11. Нӕхе цӕмӕй гъӕуама хезӕн, цӕмӕй тӕрегъӕд ма искӕнӕн?

¹¹ Аци хабарӕй цӕбӕл ахур кӕнӕн? Нӕхе гъӕуама айдагъ тӕрегъӕдӕй ма гъӕуай кӕнӕн, фал ма тӕрегъӕдмӕ цидӕриддӕр ӕркӕнуй, уомӕй дӕр. Соломон дӕр нӕ гъе уомӕй бафӕдзахста, хӕтагӕ силгоймаги туххӕй хабар ку радзурдта, уӕд. Е загъта: «Дӕ къах дӕ ӕ нӕдтӕмӕ ма бахӕссӕд» (Ӕмб. 7:25). Уой хузӕн унаффӕ ма финст ӕй Ӕмбесӕндти 5 сӕри дӕр: «Дӕхе си идард дарӕ, ӕ хӕдзари къӕсӕрмӕ ин хӕстӕгдӕр ма цо» (Ӕмб. 5:3, 8). Ӕцӕгӕйдӕр, гъӕуама нӕхе еуварс дарӕн, тӕрегъӕдмӕ нӕ цидӕриддӕр ӕркӕнуй, уомӕй b. Ка ’й зонуй, цӕхуӕндӕр гъуддӕгтӕ лӕгъузбӕл нимад нӕ ’нцӕ, фал дӕу ба тӕрегъӕдмӕ ӕркӕндзӕнцӕ. Уомӕ гӕсгӕ си гъӕуама дӕхе гъӕуай кӕнай (Матф. 5:29, 30).

12. Иов цӕхуӕн унаффӕ рахаста ӕма ’й е фӕлварӕнтӕй куд гъӕуай кодта? (Иов 31:1).

¹² Цӕмӕй нӕ бон уа нӕхе гъӕуай кӕнун, тӕрегъӕдмӕ нӕ ка ӕркӕндзӕй, уӕхӕн уавӕртӕй, уой туххӕй гъӕуй федардзийнадӕ. Уобӕл ба нӕ бон ӕй Иовӕй исахур ун. Е ӕ цӕстити хӕццӕ искодта бадзурд ӕма унаффӕ рахаста, силгоймӕгтӕмӕ мондаг каст ке некӕд кӕндзӕй. (Бакӕсӕ Иови 31:1.) Иов ци бадзурд искодта, цӕргӕ дӕр уомӕ гӕсгӕ кодта. Ӕма уой фӕрци ӕ бийнойнагбӕл алкӕддӕр адтӕй еузӕрдон. Мах бон дӕр ӕй унаффӕ рахӕссун, фӕлварӕни ке туххӕй бахаудтайанӕ, уӕхӕн гъуддӕгтӕй нӕхе еуварс ке дардзиан.

13. Цӕбӕл сагъӕс кӕнӕн, уомӕ лӕмбунӕг ун цӕмӕн гъӕуй? (Кӕсӕ ма хузтӕмӕ.)

¹³ Цӕбӕл сагъӕс кӕнӕн, е дӕр хъӕбӕр ӕхсидзгӕ ’й (Рац. 20:17). Еуӕй-еуетӕмӕ уотӕ фӕккӕсуй, ӕма ӕнӕгъдау естӕбӕлти ку сагъӕс кӕнай, уӕд уоми лӕгъузӕй неци ес, ӕрмӕстдӕр  кӕнгӕ уотӕ ма кӕнӕ. Фал уотемӕй адӕймаг ӕхе фӕссайуй. Адӕймаг ӕдзох лӕгъуз естӕбӕл ку фӕссагъӕс кӕнуй, уӕд уотемӕй ӕхуӕдӕг ӕ лӕгъуз фӕндтӕ исцирен кӕнуй. Мадта уотӕ уайуй, ӕма ӕхуӕдӕг ӕхецӕн фӕлварӕн искӕнуй, уой фӕсте ба ӕ хӕццӕ фӕттох кӕнуй. Ке зӕгъун ӕй гъӕуй, рӕстӕгӕй-рӕстӕгмӕ лӕгъуз сагъӕстӕ алкӕмӕдӕр фӕззиннуй. Фал ӕхсидзгӕ ’й, цӕмӕй сӕ уайтагъддӕр нӕ сӕрӕй фӕссорӕн ӕма хуарз естӕбӕл сагъӕс кӕнун райдайӕн. Уотемӕй нӕхе уӕззау тӕрегъӕдӕй багъӕуай кӕндзиан. Фал еци лӕгъуз фӕндтӕн нӕ зӕрди ӕрбунат кӕнун ку бауадзӕн, уӕд уӕхӕн карз исуодзӕнцӕ, ӕма нин сӕ нихмӕ тох кӕнун хъӕбӕр зин исуодзӕй (Фил. 4:8; Кол. 3:2; Иак. 1:13–15).

14. Никкидӕр ма нӕ бон куд ӕй нӕхе фӕлварӕнтӕй багъӕуай кӕнун?

¹⁴ Никкидӕр ма нӕ бон ци ӕй кӕнун, цӕмӕй нӕхе фӕлварӕнтӕй багъӕуай кӕнӕн? Гъӕуама ибӕл ӕппундӕр ма гурусхӕ кӕнӕн, Йегови закъӕнттӕмӕ гӕсгӕ ку цӕрӕн, уӕд нин е алкӕддӕр пайда ке хӕсдзӕй. Алкӕд нин ӕнцон нӕ фӕууй, нӕ гъудитӕ ӕма нӕ фӕндтӕ Хуцауи фӕндонмӕ гӕсгӕ исаразун. Хатгай нӕ еуварсмӕ рахӕссунцӕ. Фал не ’гас хъауритӕй ку архайӕн, уӕд дессаги арфӕдзийнадӕй исхайгин уодзиан – Хуцау нин ратдзӕй ӕ фарнӕ. Е ба цийфӕнди хъиамӕти аккаг дӕр ӕй.

15. Хуарз ци ӕй, уой ку уарзӕн, уӕд нин е фӕлварӕни нихмӕ фӕллӕуунмӕ куд банхус кӕндзӕй?

¹⁵ Цӕмӕй нӕмӕ раст фӕндтӕ уа, уой туххӕй архайун гъӕуй. Ку исахур уӕн, лӕгъуз ци ӕй, уомӕй не ’сӕфт уинун, раст ци ӕй, уой ба уарзун, уӕд нин ӕнцондӕр уодзӕй рӕстӕй архайун, тӕрегъӕдмӕ ка ’ркӕндзӕй, уӕхӕн къахдзӕфтӕй ба нӕхе гъӕуай кӕнун (Амос 5:15). Удта ма ӕнӕнгъӕлти ести уавӕри ку бахауӕн, уӕддӕр нин фӕлварӕни нихмӕ фӕллӕуун ӕнцондӕр уодзӕй, уомӕн ӕма ’й зондзиан, куд гъӕуама архайӕн, уой.

16. Йеговӕмӕ нӕ ка бахӕстӕг кӕндзӕй, еци гъуддӕгти фулдӕр ку архайӕн, уӕд нӕ е лӕгъуз фӕндтӕй куд багъӕуай кӕндзӕй? (Кӕсӕ ма хузӕмӕ.)

¹⁶ Ци гъӕуй кӕнун, цӕмӕй нӕмӕ раст фӕндтӕ уа? Гъӕуама фулдӕр архайӕн, Йеговӕмӕ ке фӕрци фӕххӕстӕгдӕр уодзиан, уӕхӕн гъуддӕгти. Ӕмбурди ку фӕууӕн кенӕ ку фегъосун кӕнӕн, уӕд не ’гас сагъӕстӕ дӕр фӕуунцӕ, Йегови зӕрдӕ куд барохс кӕнӕн, уобӕл.  Еци гъуддӕгти архайгӕй нӕмӕ лӕгъуз фӕндтӕ нӕ фӕззиндзӕнцӕ (Матф. 28:19, 20; Дзиуит. 10:24, 25). Хуцауи Дзурд лӕмбунӕг ку фӕккӕсӕн ӕма ибӕл ку фӕссагъӕс кӕнӕн, уӕд нӕхе фӕййахур кӕнӕн, хуарз ци ӕй, уой уарзунбӕл, фуддзийнадӕй ба не ’сӕфт уинунбӕл (Йес. Н. 1:8; Пс. 1:2, 3; 119:97, 101). Удта ма Киристей дзурдтӕ дӕр дӕ зӕрдӕбӕл дарӕ. Е загъта: «Ӕдзох коветӕ, цӕмӕй фӕлварӕни федар фӕллӕууайтӕ» (Матф. 26:41). Ковгӕ-ковгӕй, зӕгъӕн ес, ӕма нӕ рӕстӕг нӕ уӕларвон Фиди хӕццӕ ферветӕн. Уотемӕй ин фадуат дӕттӕн, цӕмӕй нин банхус кӕна ӕма нӕ никки хъӕбӕрдӕр фӕндӕуа ӕ зӕрдӕ рохс кӕнун (Иак. 4:8).

КЪӔРЦГЪОС УО

17. Петурмӕ цӕхуӕн гъӕндзийнадӕ адтӕй?

¹⁷ Ка ’й зонуй, цӕхуӕндӕр гъӕндзийнӕдтӕбӕл фӕууӕлахез ун нӕ бон исуодзӕй. Фал нӕ кӕцидӕрти хӕццӕ ба гъӕудзӕй идарддӕр дӕр тох кӕнун. Ӕркӕсӕн Петури хабармӕ. Адӕнӕй ке фӕттарстӕй, уой туххӕй ӕ Ахургӕнӕгӕй ӕртӕ хатти загъта, нӕ ’й зонун, зӕгъгӕ (Матф. 26:69–75). Фӕстӕдӕр Синедриони ку лӕудтӕй, уӕд Киристей туххӕй хъӕбӕр нифсгунӕй дзурдта. Уотӕ зиндтӕй, цума Петур ӕ гъӕндзийнадӕбӕл кӕронмӕ дӕр фӕууӕлахез ӕй (Гъуд. 5:27–29). Фал ӕнзтӕ ку рацудӕнцӕ, уӕд бабӕй еци гъӕндзийнадӕ нӕуӕгӕй рабӕрӕг ӕй. Дзиуиттаг ка н’ адтӕй, уони хӕццӕ еу фингӕбӕл нӕбал бадтӕй, уомӕн ӕма дзиуиттӕгтӕй тарстӕй (Гал. 2:11, 12). Ка ’й зонуй, Петури цӕргӕ-цӕрӕнбонти дӕр гъудӕй еци гъӕндзийнади хӕццӕ тох кӕнун.

18. Кӕд цӕхуӕндӕр лӕгъуз гъуддагбӕл фӕууӕлахез ан, уӕддӕр нӕ гъудий ци гъӕуама дарӕн?

¹⁸ Ка ’й зонуй, махбӕл дӕр уӕхӕн хабар ӕрцӕуа. Кутемӕй? Еуӕй-еухатт нӕмӕ уотӕ фӕккӕсуй, цума цӕхуӕндӕр лӕгъуз гъуддагбӕл фӕууӕлахез ан, фал бабӕй нӕуӕгӕй фӕззиннуй. Ӕркӕсӕн, еу ӕнсувӕр ци загъта, уомӕ: «Дӕс анзей дӕргъи порнографимӕ нӕ кастӕн ӕма мӕмӕ уотӕ кастӕй, цума еци лӕмӕгъдзийнадӕбӕл фӕууӕлахез дӕн. Фал куд рабӕрӕг ӕй, уотемӕй е уотӕ н’ адтӕй. Е гъӕддаг сирди хузӕн ниссабур ӕй, цӕмӕй фадуат куддӕр фӕззинна, уотӕ ӕхе ниццӕва». Фал не ’нсувӕр еци фӕлварӕни нихмӕ федарӕй фӕллӕудтӕй. Е ӕй балӕдӕрдтӕй, идарддӕр дӕр ӕй ке гъӕуй тох кӕнун, ка ’й зонуй, аци дуйней кӕронмӕ дӕр. Ӕнсувӕр ӕнхус ракурдта ӕ бийнойнагӕй ӕма хестӕр нӕлгоймӕгтӕй, цӕмӕй никки къӕрцгъосдӕр уа ӕма ци гъуддаг ниууагъта, уомӕ нӕуӕгӕй ма раздӕха.

19. Кӕд цӕхуӕндӕр гъуддагбӕл нӕма фӕууӕлахез дӕ, уӕд дӕ ци кӕнун гъӕуй?

 ¹⁹ Ка ’й зонуй, цӕхуӕндӕр гъуддагбӕл фӕууӕлахез ун дӕ бон нӕма ’й. Уӕхӕн уавӕри дӕ бон ци ӕй кӕнун, цӕмӕй дӕбӕл ма фӕхъхъӕбӕрдӕр уа? Гъӕуама алкӕддӕр къӕрцгъос уай ӕма Киристей унаффӕмӕ гӕсгӕ архайай. Е загъта: «Ма бафунӕй уотӕ». Нӕхецӕй ӕгӕр нифсгун гъӕуама ма уӕн ӕма нӕхе еуварс дарӕн, лӕгъуз фӕндтӕ нӕмӕ ке туххӕй фӕззиндзӕй, уӕхӕн уавӕртӕй (1 Кор. 10:12). Гъӕндзийнӕдти хӕццӕ тох кӕнунмӕ дин раздӕр ци гъуддӕгтӕ ӕнхус кодтонцӕ, уони идарддӕр кӕнӕ. Ӕмбесӕндти 28:14 уӕхӕн дзурдтӕ финст ес: «Амондгун ӕй, алкӕддӕр Хуцауӕй ка тӕрсуй, еци адӕймаг» (2 Пет. 3:14).

ЦӔХУӔН ХУӔРЗЕУӔГ НӔМӔ ӔНГЪӔЛМӔ КӔСУЙ?

20, 21. а) Тӕрегъӕдӕй нӕхе еуварс ку дарӕн, уӕд нӕмӕ цӕхуӕн хуӕрзеуӕг ӕнгъӕлмӕ кӕсуй? б) Нӕхецӕй кӕнгӕ ци ӕй, уой ку бакӕнӕн, уӕд Йеговӕ куд архайдзӕй? (2 Коринфӕгтӕмӕ 4:7).

²⁰ Дзубанди дӕр ибӕл нӕййес, кӕдзос цард ке кӕнӕн, е дзӕгъӕли нӕй. Тӕрегъӕд ӕхцӕуӕндзийнадӕ хӕссуй ӕрмӕстдӕр рӕстӕгмӕ (Дзиуит. 11:25). Фал мах дзӕвгарӕ амондгундӕр уодзиан, Йегови уагӕвӕрдтӕмӕ гӕсгӕ ку цӕрӕн, уӕд (Пс. 19:8). Уотӕ цӕмӕн ӕй? Уомӕн ӕма уотӕ конд ан (Райд. 1:27). Уомӕ гӕсгӕ нӕ цардӕй Йегови зӕрдӕ ку фӕррохс кӕнӕн, уӕд дессаги арфӕдзийнӕдтӕй исхайгин уӕн. Нӕ цӕсгон фӕууй кӕдзос ӕма нин фӕззиннуй ӕносон царди нифс (1 Тим. 6:12; 2 Тим. 1:3; Иуди 20, 21).

²¹ Ӕцӕгӕйдӕр, бауӕр лӕмӕгъ ӕй. Фал уӕддӕр е уобӕл дзорӕг нӕй, ӕма тӕрегъӕди нихмӕ фӕллӕуун нӕ бон не ’суодзӕй. Йеговӕ нин зӕрдӕ ӕвӕруй, тох кӕнунмӕ нин хъауритӕ ке дӕтдзӕй. (Бакӕсӕ 2 Коринфӕгтӕмӕ 4:7.) Де ’ргом раздахӕ, Хуцау нӕ ци хъаурӕй исхайгин кӕнуй, е фӕууй, адӕймагмӕ ка нӕййес, уӕхӕн хъаурӕ. Фал нин цӕмӕй Хуцау банхус кӕна, уой туххӕй бал фиццагидӕр гъӕуама нӕхе бон ци ӕй, уой искӕнӕн, цӕмӕй нӕ ци рӕдуйун кӕнуй, уонӕй нӕхе гъӕуай кӕнӕн. Нӕхецӕй кӕнгӕ ци ӕй, уой ку бакӕнӕн, уӕд нин Йеговӕ нӕ кувдтитӕн дзуапп дӕтдзӕй ӕма нӕ цӕйбӕрцӕ хъауритӕ гъӕуй, уойбӕрцӕ нин ратдзӕй (1 Кор. 10:13). Гъе уотемӕй Йегови фӕрци нӕ бон исуодзӕй, цидӕриддӕр нӕ рӕдуйун кӕнуй, уони нихмӕ федар фӕллӕуун!