Сильвийӕ, ацӕргӕтӕм чи кӕсы, иу ахӕм сылгоймаг, загъта: «Колледжы кӕимӕ ахуыр кодтон, уыдонӕй бирӕтӕ сӕхи уырнӕг адӕм хуыдтой. Фӕлӕ-иу экзаменты рӕстӕг дзуаппытӕ сфыстой, стӕй наркотиктӕ кодтой. Динимӕ сын иумӕйагӕй ӕппындӕр ницы уыд».

Иу нӕлгоймаг, Лайонел, зӕгъгӕ, зӕгъы: «Ме ’мкусджытӕ арӕх фӕсайынц: рынчын нӕ вӕййынц, афтӕмӕй телефонӕй ӕрбадзурынц, рынчын дӕн, зӕгъгӕ. Дин сын, хӕдзары рӕсугъды тыххӕй кӕй сӕвӕрынц, ахӕм дзаумайӕ уӕлдай нӕу – ис, фӕлӕ дзы пайда нӕй».

Адӕмӕн сӕ фылдӕрӕн сӕ дин хӕрзӕгъдау цард кӕнынӕн ӕппындӕр не ’ххуыс кӕны. Абон бирӕтӕ «сӕхи афтӕ ӕвдисынц, цыма Хуыцауӕн кувӕг адӕм сты, фӕлӕ сӕ цардӕй... уый бӕрӕг нӕу» (2 Тимофеймӕ 3:5). Сӕ дины разамонджытӕ сын уыцы хъуыддаджы фӕзминаг не сты. Стӕй, Библи хӕрзӕгъдау цард кӕнынмӕ кӕй сиды, уый дӕр сын сӕ аргъуанты нӕ амонынц. Уӕдӕ диссаг нӕу, бирӕтӕ афтӕ цӕмӕн хъуыды кӕнынц, ӕмӕ куыд цӕрынц, уымӕ Хуыцау куыдфӕндыйы цӕстӕй кӕй кӕсы.

Библийӕ бӕрӕг у, нӕ хъуыддӕгтӕй нӕ бон кӕй у Хуыцауӕн йӕ зӕрдӕ барухс кӕнын кӕнӕ дзы маст бауадзын. Раджы заманты-иу израилӕгтӕ Хуыцауы ныхмӕ куы рацыдысты, уӕд-иу ын «фӕриссын кодтой йӕ зӕрдӕ» (Псалом 78:40). Исчи йӕ фыдхъуыддӕгтӕ куы ныууадзы, уӕд та уӕлӕрвты тынг фӕцин кӕнынц (Лукайы 15:7). Адӕймаг нӕ уӕларвон Фыды диссаджы миниуджытӕн аргъ кӕнын куы райдайы, уӕд ӕй тынгдӕр бауарзы, ӕмӕ йӕ бафӕнды, Хуыцау цы уарзы, уый уарзын ӕмӕ, йе сӕфт цӕмӕй уыны, уымӕй йе сӕфт уынын (Амос 5:15).

«Дезерет ньюс»-ы, Солт-Лейк-Ситийы (АИШ, штат Ютӕ) чи цӕуы, иу ахӕм газеты, фыстой, Йегъовӕйы Ӕвдисӕнты кӕй фӕнды, цӕмӕй бинонтӕ ӕнгом уой, адӕм-иу бахъуаджы сахат кӕрӕдзи фарсмӕ балӕууой ӕмӕ паддзахады закъӕттӕ ӕххӕст кӕной. Уымӕй уӕлдай ма дзы фыст ис: «Уыдон сты тынг хӕрзӕгъдау адӕм. Тамако дымын, фыднозт ӕмӕ наркотиктӕ кӕнын, ӕхцайыл хъазын, гомосексуализм ӕмӕ ӕнӕгъдау цард кӕнын нымайынц, Хуыцауы зӕрдӕмӕ чи нӕ цӕуы, ахӕм хъуыддӕгтыл».

Йегъовӕйы Ӕвдисӕнтӕ Хуыцауы миниуджытӕ хорз кӕй зонынц, уый сын куыд ӕххуыс кӕны? Уӕлдӕр кӕй кой кодтам, уыцы сылгоймаг, Сильвийӕ, загъта: «Ӕз кӕм кусын, уым сайын диссаг никӕмӕ кӕсы. Афтӕ цӕрын ӕнцондӕр у. Фӕлӕ ӕз зонын, Йегъовӕ * уымӕ цы цӕстӕй кӕсы, ӕмӕ мын уый ӕххуыс кӕны, цӕмӕй, раст цы у, уый аразон. Ӕз дӕн амондджын ӕмӕ мӕ зӕрдӕйы ис фарн». Сильвийӕ фидарӕй зоны, йӕ цард Библийы фӕрцы кӕй фӕхуыздӕр.