Хатт афтӕ хуыдтой, ӕрдызт чи уыд, ахӕм нӕлгоймӕгты. Рагзаманты-иу нӕлгоймӕгтӕй кӕйдӕрты бардызтой, ӕмӕ-иу сӕ афтӕмӕй бафхӕрдтой. Афтӕ ма кодтой, уацары-иу кӕй акодтой кӕнӕ цагъар чи уыди, уыцы нӕлгоймӕгтӕн дӕр. Ӕрдызт нӕлгоймӕгтӕй-иу ӕууӕнк кӕуыл уыд, уыдон-иу сӕ хъус дардтой паддзахы гаремтӕм. Зӕгъӕм, Гегай ӕмӕ Шаазгаз хъахъхъӕдтой персайнаг паддзах Ахашверошы устыты ӕмӕ номылустыты (ахуыргӕндты хъуыдымӕ гӕсгӕ, Ахашверош уыди Ксеркс I) (Есфир 2:3, фиппаинаг; 2:14). Моисейы закъонмӕ гӕсгӕ ахӕм нӕлгоймӕгтӕн бар нӕ уыд, цӕмӕй Хуыцауы адӕмы ӕмбырды хай суыдаиккой (Дыккаг закъон 23:1). Ӕмӕ никуы ис фыст, израилӕгтӕй кӕнӕ ӕрцӕуӕггаг адӕмӕй Израилы паддзӕхты галуанты чи лӕггад кодта, уыдон ӕрдызт кӕй уыдысты. Закъонмӕ гӕсгӕ-иу цагъартӕн хъуамӕ сунӕт скодтаиккой, ӕрдузгӕ сӕ нӕ кодтой. Фӕлӕ ахӕм ӕгъдау уыд мӕнг хуыцӕуттӕн кувӕг адӕмтӕм. Хӕсты рӕстӕджы-иу уацары цы сывӕллӕтты акодтой, уыдонӕй-иу кӕйдӕрты бардызтой.

Фидӕны цы тӕрхон уыдзӕн, уый кой кӕнгӕйӕ Йесо Чырысти загъта: «Адӕймаджы Фырт йе ’ппӕт зӕдтимӕ кадджын цыд куы ’ркӕна, уӕд... фыййау фысты сӕгътӕй куыд ахицӕн кӕны, афтӕ уый дӕр ахицӕн кӕндзӕн адӕмы» (Матфейы 25:31, 32). Цымӕ-иу рагзаманты фыййӕуттӕ фысты сӕгътӕй цӕмӕн ахицӕн кодтой?

Боны дӕргъы-иу фыстӕ ӕмӕ сӕгътӕ иумӕ хызтысты. Ӕхсӕв та-иу сӕ батардтой ӕхгӕд фосы кӕртмӕ, цӕмӕй-иу сӕ хъахъхъӕдтаиккой сырдтӕй, къӕрныхтӕй ӕмӕ уазалӕй (Райдиан 30:32, 33; 31:38–40). Фӕлӕ-иу фыстӕ ӕмӕ сӕгъты бакодтой хицӕн кӕртыты. Уый фӕрцы-иу хивӕнд сӕгътӕй «сабыр» фысты хъахъхъӕдтой, уӕлдайдӕр та сыл фысты ӕмӕ уӕрыччыты. Иу чиныджы куыд фыссынц, афтӕмӕй ма-иу фыййӕуттӕ фысты сӕгътӕй ахицӕн кодтой, «фос-иу куы схъазыдысты, куы-иу сӕ дыгътой ӕмӕ-иу сӕ куы ӕлвыдтой, уӕд» дӕр (All Things in the Bible). Уӕдӕ Йесо йӕ цӕстуынгӕ цӕвиттоны дзырдта, рагзаманты Израилы адӕмӕн хорз зонгӕ чи уыди, ахӕм хабӕртты тыххӕй, уымӕн ӕмӕ сӕ фылдӕр цардысты хъӕуты.