Impriso Lapud Pananisia Ra—Russia
Say history na saray Tasi nen Jehova diad modernon Russia et sakey ya istorya na panamairap tan panamasegsegang. Legay koma-20 a siglo, pinairap tan minaltrato na saray autoridad na Russia iray Tasi anggano kabkabat ya mareen iran totoo tan matulok irad ley. Labay iran piliten na gobierno na Soviet Union ya awaten iray papanisiaan na Soviet. Bawal iran nawalaan na Biblia odino antokaman ya literatura da. Lanang iran maman-manan kanian pasekreto iray pantitipon da. No naerel ira, bugbogen da ra tan nasentensiaan ira na mabayag ya pakapriso. Nilibo ed sikara so inyakar na gobierno ed Siberia.
Balet anguman itan nen 1991 ta ginawan legal na gobierno na Russia iray Tasi nen Jehova tan bulos la ran mandayew ya agla ra pibabalian na saray autoridad. Balet agangganon abalang itan ya kareenan.
Nen 2009, ginmapo so isusumpa tan panagbawal ed saray Tasi nen inaprobaan na Russian Supreme Court so desisyon na sakey ya mas abeban korte ya akusaan so sakey ya kongregasyon na Saray Tasi nen Jehova bilang “extremist,” odino bayolentin panatiko. Kayari pigaran taon ya impilaban ed korte, nandesisyon so Russian Supreme Court nen Abril 2017 ya ipasara iray legal ya korporasyon na saray Tasi lapud naakusaan iran manggagaway “extremist activity.” Kinompiskan tampol na saray autoridad na Russia iray kaykayarian na saray Tasi, impasara da ray pasen na panagdayewan da, tan indeklara dan “extremist material” iray literatura da.
Agni nankontento iray autoridad na Russia ed impangataki dad saray legal ya korporasyon na saray Tasi, nandesisyon met iran sansakey ya puntiryaen iray Tasi nen Jehova. Asobraan day ginawa ra ta anggano pribado lan panagdayew so gagawaen na saray indibidual ya Tasi, ikokonekta ni itan na saray autoridad ed samay imbawal ya organisasyon na Saray Tasi. Kada no man-raid iray pulis ed kaabungan na saray Tasi, mamaltratoen tan maruksa da ran tetepetan. Aarestoen da ray lalaki tan bibiin Tasi antokaman so edad da, kakasoan da ra insan da ra sesentensiaan ya napriso odino na-house arrest.
Manlapu lad samay impangibawal nen Abril 2017, nilasus ya Tasi so asentensiaan na pakapriso antis nin nalitis odino pakapriso lapud akusasyon ya extremist ira kuno. Anggad nen Oktubre 18, 2024 ami-amin et 131 ni ya Tasi so akapriso.
Saray Protesta ed Maruksan Panagtrato na Russia ed Saray Tasi nen Jehova
Ipipriso na saray autoridad na Russia iray Tasi ta manggagawa ra kunoy extremist activity. Tuloytuloy nin gagawaen itan na saray autoridad anggano amayamay lay manproprotesta ed nanduruman bansa. Babalawen na saray totoon makakaobserba tan saray korte ed arum ya bansa so pamapairap na gobierno na Russia ed saray Tasi nen Jehova.
European Court of Human Rights: Nen Hunyo 7, 2022 in-release na European Court of Human Rights so importantin desisyon kontrad Russia, ya mangokondena ed pamapairap da ed saray Tasi nen Jehova (Taganrog LRO and Others v. Russia, nos. 32401/10 and 19 others). Imbaga na Korte ya ilegal so ginawa na Russia ya isebel so kimey na saray Tasi nen Jehova nen 2017. Ingganggan day Russia ya “nepeg ton gawaen so amin ya nakaukolan pian agla ituloy so amin ya aka-pending ya kriminal ya kaso kontrad saray Tasi nen Jehova . . . tan ibulos la . . . iray [akaprison] Tasi nen Jehova.” Ingganggan met so Russia ya kaukolan ya ipawil so amin ya kinompiskan kaykayarian ed saray Tasi odino bayaran ira na masulok ya 60 milyon a dolyar bilang kasalat na saratan, tan bayaran ira na masulok ya 3 milyon a dolyar bilang danyos.
Say Sulat na Secretary General na Council of Europe: Oniay imbaga nen Marija Pejčinović Burić ed sulat to ya apetsaan na Disyembre 9, 2022 parad Russian Minister of Foreign Affairs: “Parad saray kaso ya Jehovah’s Witnesses of Moscow and Others and Krupko and Others, nipaakar ed impankansela ed rehistro na saray Tasi bilang relihyon kanian insebel iray kimey da, apatunda iray mareen ya seremonya ed panagdayew da tan naandi so bulos ya pibibiang da ed saratan, mapekder ya igaganggan na Komite iray autoridad ya itunda la so panesebel ed saray kimey na amin ya organisasyon na Saray Tasi nen Jehova tan itunda lay amin ya kriminal ya kason iyaakusa ed sikara.”
Desisyon na Committee of Ministers of the Council of Europe: Diad samay agawan miting nen Setyembre 2023, imbaga na Committee of Ministers [CoM] ya “agtalaga inimano na autoridad na Russia so seryoson ingganggan ed sikara na [European Court of Human Rights] ya ibulos iray niprison Tasi nen Jehova anggano malinlinew ya base itan ed Article 46 of the Convention tan ed samay desisyon ed kaso ya Taganrog LRO and Others.” Lapud agmikokoopera so Russia, nandesisyon so CoM ya “ipaimano iyan pigaran kaso ed United Nations Human Rights Committee, say Working Group on Arbitrary Detention of the UN Human Rights Council, tan arum nin grupo ed arum ya bansa ya mangaasikaso ed problema ya pamapasegsegang na Russia ed saray Tasi nen Jehova pian seguroen ya base ed kakaukolanen na batas so panguukom na Russia.”
Saray Alimbawa na Agano nin Maruksa Iran Sentensia
Nen Enero 25, 2024 asentensiaan si Sona Olopova na duay taon ya puersaan ya pankimey ed sakey ya correctional facility ed Samara Region. Si Sona et sakey ya biin mantaon na 37 tan walay asawa to. Inimbestigaan na saray pulis so abung to nen Mayo 2023. Kayari to man, kinasoan da tan inakusaan da ya manggagawa kuno na extremist activity. Diad tua, say ibabaga dan “krimen” ya gagawaen to et say mareen ya pandadayew to ed Dios kaiba iray kapananisiaan to. Oniay imbaga nen Sona: “Aglabat naisip na saray nansentensia ed siak ya imposiblin magmaliw ya Tasi nen Jehova so sakey ya extremist.”
Nen Pebrero 6, 2024 inaprobaan na korte so sentensia ed si Dmitriy Barmakin. Kapaway tod korte, impriso da lan tampol pian sumpalen toy nakekeraan ed waloy taon ya sentensia ed sikato. Nen Hulyo 2018 nilooban na saray armadon opisyal so apartment ya kawalaan nen Dmitriy tan say asawa ton si Yelena, legan dan aasikasoen so bai nen Yelena ya mantaon lay 90. Insempet day Dmitriy tan Yelena ed syudad da ed Vladivostok, tan diman da inaresto si Dmitriy. Kayari to man, kinasoan day Dmitriy na “pangoorganisa ed saray kimey na extremist ya organisasyon.” Natan et akapriso si Dmitriy ed detention center diad Khabarovsk Territory tan aka-eskedyul ya ibulos no Nobyembre 2029. Si Yelena et lilitisen met lapud pananisia to.
Nen Pebrero 29, 2024 senentensiaan na Tsentralniy District Court of Tolyatti diad Samara Region si Aleksandr Chagan, sakey a lakin walaan na asawa ya mantaon na 53. Asentensiaan si Aleksandr na waloy taon ya pakapriso, sakey itan ed saray sankabayagan ya pakapriso na saray Tasin lalaki diad Russia. Kayari na impanlitis ed sikato, impriso dan tampol kapaway tod korte. Peles ya akapriso si Aleksandr diad Detention Center No. 4 diad Samara Region tan aka-eskedyul ya ibulos no Enero 2032.
Nen Marso 5, 2024 senentensiaan na sakey ya korte ed Irkutsk Region diad eastern Siberia so siameran Tasin lalaki ya extremist ira kuno. Asentensiaan na nanduruman kabayag na pakapriso ya anggad pitoran taon so siameran lalaki. Say sankatatkenan da et mantaon na 72. Saratan ya sentensia ed sikara so sankagrabian la ed amin ya kaso ya ginmapo nen Oktubre 2021 kayari na impan-raid na saray pulis ed kaabungan na saray Tasi. Nen asentensiaan ira, sakey ed saratan ya lalaki ya si Yaroslav Kalin, et masulok lan duay taon ya akapriso antis nin asentensiaan. Imbaga to ya saman ya impakapriso to so sankairapan lan nagawa ed “sanka-aliwliwaan ya prisoan tan kipapasen.”
Nen Nobyembre 2021, akasoan si Rinat Kiramov tan naakusaan ya manggagawa kuno na extremist activity. Kayari na sakey tan kapalduan taon tod detention center, senentensiaan da na pitoy taon ya pakapriso. Natan et 36 lay edad nen Rinat tan susumpalen toy pitoy taon ya sentensia ed sikato. Nen Abril 2024, inyalis na saray opisyal si Rinat ed sakey ya medical correctional facility ta wala kunoy tuberculosis to. Kasabi nen Rinat ed medical facility, pinairap na sakey ya grupo na saray priso tan kinuryente da ni ingen panamegley na stun gun. Agda met pinakan tan pinaugip na apat agew. Nen anengneng da ed medical exam ya anggapo manayay tuberculosis nen Rinat, impawil da ed penal colony nen Mayo 17, 2024. Aka-schedule ya ibulos si Rinat no Disyembre 2027.
Nen Hunyo 20, 2024, asentensiaan so taloran Tasin lalaki ya tagad Khabarovsk. Atan la so sankarukeyan ya sentensia ya inter na korte na Russia ed saray Tasi manlapu la nen impasara iray legal ya korporasyon na Saray Tasi nen Jehova. Asentensiaan na waloran taon tan anem bulan si Nikolay Polevodov, waloran taon tan apatiran bulan si Vitaliy Zhuk, tan waloran taon tan duaran bulan si Stanislav Kim. Asentensiaan irayan lalaki ta sikara kunoy mangoorganisa na kimey na saray extremist. Balet diad tua et mareen labat ira ya mantitipon kaibay kapamilya tan kapananisiaan da pian manbasa tan manaral na Biblia. Nen Oktubre 2024, abawasan na sakey taon so sentensia da tan nagmaliw itan ya suspendidon pakapriso. Kanian imbulos ni irayan taloran Tasin lalaki.
Saray Tuloytuloy ya Pansasagpot Pian Napatunda so Agmahustisyan Panangipriso
Aburido lan maong iray Tasi nen Jehova ed interon mundo lapud maruksan panagtrato na Russia ed saray kapananisiaan da. Minilyon ya Tasi ed nanduruman pasen na mundo so angipawit na sulat ed saray opisyal na gobierno na Russia pian onapela parad saray Tasi ya akapriso. Inmapela iray abogado na saray Tasin akapriso ed amin ya klase na korte ed Russia tan dakdakel so impawit dan aplikasyon pian onapela ed European Court of Human Rights. Angi-file met na reklamo iray Tasi nen Jehova ed UN Human Rights Committee tan ed UN Working Group on Arbitrary Detention, tan angiter iray report ed saray internasyonal ya organisasyon ya manbabantay ed saray pangaabuso na karapatan na totoo. Ituloy nin gawaen na saray Tasi nen Jehova so amin ya paraan pian nipaamta so nagagawad saray kapananisiaan da ed Russia pian nasumpal la iyan graben panamasegsegang lapud relihyon.
Time Line
Oktubre 18, 2024
Ami-amin et 131 ya Tasi so akapriso.
Oktubre 24, 2023
Angi-release na duaran View so UN Human Rights Committee (CCPR) nipaakar ed Local Religious Organization ya Elista tan Abinsk. Diad parehon kaso, imbaga na CCPR ya base ed Article 18.1 (“right to freedom of thought, conscience and religion”) tan 22.1 (“right to freedom of association”) na International Covenant on Civil and Political Rights, imbaliwala na Russia so karapatan na saray Tasi. Kinompirma na saratan ya desisyon ya anggapoy nabasa ed saray literatura na saray Tasi ya mangipapaseseg na pambusol odino panggaway inkaruksa.
Hunyo 7, 2022
Angipaakseb so ECHR na importantin desisyon, say Taganrog LRO and Others v. Russia, ya mangibabagan aliwa so gagawaen na Russia ya panagmaltrato ed saray Tasi nen Jehova.
Enero 12, 2022
Inyarum na Ministry of Justice na Russian Federation so JW Library app ed Federal List of Extremist Materials. Saya so sankaunaan tan alenleneg ya app ya insebel ed Russia bilang extremist.
Setyembre 27, 2021
Imbasura na Saint Petersburg City Court so apela ya kontra ed desisyon nen Marso 31, 2021 ya angideklaran extremist so JW Library app tan angibawal ed pangusar ed satan diad interon Russian Federation tan Crimea. Tampol ya impaakseb so dati lan desisyon na korte.
Abril 26, 2019
Nalmoan na UN Working Group on Arbitrary Detention ya asumlang iray kanepegan nen Dimtriy Mikhailov tan kinondena na satan so pamapasegsegang na Russia ed saray Tasi nen Jehova.
Abril 20, 2017
Nandesisyon so Supreme Court of the Russian Federation ya ipasara so branch na saray Tasi nen Jehova tan say 395 ya Local Religious Organization.
Ompan Nagustoan Mo Met
BALITA
Agnepeg ya Takotan so Panamasegsegang
Legan na annual meeting nen 2019, impaliwawa nen Brother Mark Sanderson na Mananguley ya Ulop so teman “What Do We Have to Fear?” Kaiba ed paliwawa to iyan video na saray eksperiensya na arum ed saray agagi tayon napapasegsegang diad Russia.
