Inrayew na saray opisyal ed South Korea so organisasyon tayo lapud nandesisyon tayon gawaen ya online so 2020 a programa na kombension tayo imbes ya diad saray angkabaleg ya stadium. Aliketan ed sikatayo iray opisyal lapud sankanonot tayoy safety na dakel a totoo, anggan agtayo kaukolan ya kanselaen iray regular ya programa tayo parad panagbangat na Biblia. Saray indeposito tayo parad pangusar na venue na kombension et impawil ya amin.

Oniay imbaga na sakey ya opisyal ed Seoul: “Iilaloan mi ya duga so desisyon na Saray Tasi nen Jehova. Labalabay mi ray Tasi. Diad sayan komunidad, anggapo lay naisip kon arum ya relihyon ya onia karakel so nitutulong da ed komunidad.” Impaliwawa to: “Iyuuna na Saray Tasi nen Jehova so pankaabigan na arum nen say sarili da. Maermen kami ta agda nausar so pasilidad mi parad kombension da ed sayan taon. Balet, iilaloan mi ya diad arapen et usaren da ni so pasilidad mi.”

Diad Suwon, oniay komento na sakey ya opisyal na pasilidad: “Misalsalamat ak ed Saray Tasi nen Jehova, diad linmabas ya 35 taon et inasikaso da so pasilidad mi ya inturing dan singa gawa dan mismo. Balet mas misalsalamat ak ta kinmiwas iran tampol pian nasuportaan so desisyon na gobierno parad pangamper ed ikakayat na COVID-19. Pandinayewan koy pagmaliw dan makonsidera. Tatalaranan ko ya nanengneng ko ra lamet diad onsublay ya taon.”

Oniay imbaga na sakey ya opisyal ed airport ya asingger ed venue na kombension: “Nen 2018 tan 2019, anengneng min mismo ya organisado iray [Tasi nen Jehova] tan maples dan gagawaen iray kerew mi. Talagan alikliknak so panangaro da diad sayan desisyon da ya kanselaen so kombension da ed sayan taon lapud sankanonot day pankaabigan na arum.” Inyarum to ni: “Seguradon marakdakep no amin ya totoo et singa saray Tasi.”

Misalsalamat kami ran Tasi nen Jehova lapud ipapasal kami ya aroen iray kapara min too tan naiimano iya na arum legan na sayan mair-irap ya panaon.​—Mateo 22:39