“Ontawag kad siak, tan ebatan ta ka tan tampol ya ibagak ed sika iray makapadinayew tan agnatalosan a bengatla ya agmo amta.”​—Jeremias 33:3, Balon Mundo a Patalos.

 “Ontawag ka ed siak et ebatan ta ka naani, tan ipanengneng ko naani ed sika so saray baleg a bengabengatla, tan mairap, a sikara so agmo amta.”—Jeremias 33:3, Say Biblia.

 Diad sayan bersikulo, iimbitaan na Dios iray totoo ya ontawag irad sikato diad pikakasi. No awaten da itan ya imbitasyon na Dios tan manpikasi irad sikato, ipaamta tod sikara iray nagawa ed arapen.

 “Ontawag kad siak, tan ebatan ta ka.” Say salitan “ontawag kad siak” et aliwa labat ya basta itawag ed ngaran na Dios. Imbes, tutukoyen na satan so itawag ed Dios pian kerewen so tulong tan panangigiya to panamegley na pikakasi.​—Salmo 4:1; Jeremias 29:12.

 Sayan imbitasyon et posiblin imbaga to parad saray Israelita nensaman. Imbeneg da so Dios tan aatakien ira na saray sundalo na Babilonia. (Jeremias 32:1, 2) Labay nen Jehova a ya ompawil ed sikato iray Israelita diad itawag da ed sikato panamegley na pikakasi.

 “Ibagak ed sika iray makapadinayew tan agnatalosan a bengatla ya agmo amta.” Nibaga ya “agnatalosan” iray promisa na Dios lapud ag-iratan naamtaan na totoo diad sarili da labat ya pakatalos. Say salitan “agnatalosan a bengatla” et nayari met ya ipatalos ya “sekreto.”

 Anto ran “sekreto” so ipaamta na Dios? Saray nagawad arapen, kaiba lay pakaderal tan pamaulyan ed syudad na Jerusalem, ontan met ed pangapiger ed satan. (Jeremias 30:1-3; 33:4, 7, 8) Balet, im-promise met na Dios ya agnaupot iray mandadayew ed sikato.​—Jeremias 32:36-38.

 Naawat nen propeta Jeremias iyan mensahe nen Jehova nen 608 B.C.E., legan na koma-samplon uley nen Arin Zedekias. Impropesiya nen Jeremias ya nasakop so Jerusalem tan nabihag si Zedekias. Lapud ag-agustoan na ari itan ya mensahe, impaipriso toy Jeremias.​—Jeremias 32:1-5; 33:1; 37:21.

 Ontan so situasyon nen impasabi na Dios so imbitasyon ya walad Jeremias 33:3. Makapaermen ta ag-itan dinengel nen Arin Zedekias tan saray Israelita. (Jeremias 7:26; 25:4) Ag-ira nampikasi ed Dios pian naamtaan da komon so instruksion to. Kalabas na sakey taon, nakal ya ari si Zedekias, aderal so Jerusalem, abihag iray Israelita, tan inawit da rad Babilonia.​—Jeremias 39:1-7.

 Ipapanonot na Jeremias 33:3 ed saray manbabasa natan ya sarag na Dios so mangiter na“suston kakabatan nipaakar ed linawa [to].” Ipapaamta to met iray ‘aralem a bengatla’ ed saramay manpipikasi ed sikato pian natalosan day Salita to, say Biblia. (Colosas 1:9; 1 Corinto 2:10) Kaiba ed saratan ya aralem a bengatla iray promisa na Dios ya gawaen to diad arapen.​—Apocalipsis 21:3, 4.

 Bantayan iyan antikey ya video pian nawalaan kay ideya ed libro na Jeremias.