Anto so Ambalbalangan Atap ya Ayep ed Apocalipsis Kapitulo 17?

I-PLAY

Say ebat na Biblia

Say ambalbalangan atap ya ayep ya abitlad Apocalipsis kapitulo 17, et simbolo na organisasyon ya say gagala to et pankasakeyen tan irepresenta iray bansa ed mundo. Ginmapo iya bilang League of Nations tan natan et nagmaliw lan United Nations.

No panon ya nabidbir so ambalbalangan atap ya ayep

Sakey ya politikal ya organisasyon. Say ambalbalangan atap ya ayep et walay “pitoran ulo” to ya nibagan mangirerepresenta ed “pitoran palandey” tan “pitoran arari,” odino saray manuley. (Apocalipsis 17:9, 10) Diad Biblia, saray palandey tan ayayep et uusaren bilang simbolo na saray gobierno.—Jeremias 51:24, 25; Daniel 2:44, 45; 7:17, 23.
Mipara ed politikal a sistema na mundo. Say ambalbalangan atap ya ayep et miparad samay atap ya ayep ya walay pitoran ulo ya abitlad Apocalipsis kapitulo 13, ya mangirerepresenta ed politikal a sistema na mundo. Sayan duaran atap ya ayep et parehon walay pitoran ulo, samploran saklor, tan ngaran ya manmumudmora o agmangigagalang ed Dios. (Apocalipsis 13:1; 17:3) Sarayan pamparehoan da et agnibagan nibanbana labat. Say ambalbalangan atap ya ayep et sakey ya imahen, odino kapara, na politikal a sistema na mundo.—Apocalipsis 13:15.
Say pakayari et nanlapud arum ya uley. Say ambalbalangan atap ya ayep et ‘nanlapu ed,’ odino niwala lapud, arum ya uley.—Apocalipsis 17:11, 17.
Walay koneksion tod relihyon. Say Makapanyarin Babilonia, say amin ya palson relihyon ed mundo, et akayurong ed ambalbalangan atap ya ayep, a mangipapanengneng ya say atap ya ayep et iimpluensyaan na saray relihyon.—Apocalipsis 17:3-5.
Agmangigagalang ed Dios. Say atap ya ayep et “napno na saray ngaran a manmumudmora ed Dios.”—Apocalipsis 17:3.
Temporaryon naandi. Say ambalbalangan atap ya ayep et nibantak ed “kaaralman,” a odino naandi ya magano balet ompaway lamet.—Apocalipsis 17:1-8.

Saray propesiya ed Biblia ya asumpal

Nengnengen no panon ya asumpal ed United Nations tan say akauna ed saya, say League of Nations, iray propesiya ed Biblia tungkol ed ambalbalangan atap ya ayep.

Sakey ya politikal ya organisasyon. Susuportaan na United Nations so politikal ya sistema diad panguunor tod ganggan ya “parepareho so pakayarin niiter ed amin ya Membro to.” b
Mipara ed politikal a sistema na mundo. Nen 2011, inyarum na United Nations so koma-193 ya bansan membro to. Kanian, nibagan irerepresenta toy dakel a bansa tan totoo ed interon mundo.
Say pakayari et nanlapud arum ya uley. Say pakayari na United Nations et nanlapud saray bansa ya membro to tan walaan labat na pakayari tan autoridad depende ed iter ed sikato.
Walay koneksion tod relihyon. Say League of Nations tan the United Nations et parehon susuportaan na saray relihyon ed interon mundo. c
Agmangigagalang ed Dios. Say United Nations et inletneg “pian pansiansiaen so kareenan tan seguridad ed interon mundo.” d Anggano marakep so gagala to, diad tua say UN et agmangigagalang ed Dios lapud ibabaga ton gawaen to kuno so kimey ya say Panarian labat na Dios so makagawa.—Salmo 46:9; Daniel 2:44.
Temporaryon naandi. Say League of Nations, ya inletneg kayari World War I pian pansiansiaen so kareenan, et agto apatunda so panlalaban na saray bansa. Naandi iya nen ginmapo so World War II nen 1939. Nen 1945, nen anampot so World War II, inletneg so United Nations. Saray gagala, paraan, tan inkaorganisa to et miparpara ed League of Nations.

a Unong ed Vine’s Expository Dictionary of Old and New Testament Words, say Griegon salita ya impatalos ya “kaaralman” et ontutukoy ed “agnasukat ya kaaralem.” Impatalos met na King James Version bilang “araldalem ya abot.” Diad Biblia, ontutukoy iya ed sakey a lugar odino kipapasen ya akulong tan anggapo lay nagawaan.

b Nengnengen so Artikulo 2 na Charter na United Nations.

c Singa bilang, indeklara na sakey a council ya mangirerepresenta ed dakel ya denominasyon na saray Protestanti ed America nen 1918 ya say League et magmaliw ya “politikal ya representanti na panarian na Dios diad dalin.” Nen 1965, saray representantive na Budismo, Katoliko, Eastern Orthodox, Hinduismo, Islam, Judaismo, tan Protestante et nantitipon diad San Francisco pian suportaan tan mandasal parad United Nations. Tan nen 1979, imbaga nen Pope John Paul II ya iilaloan ton say UN et “mansiansian sankatagyan ya organisasyon parad kareenan tan hustisya.”

d Nengnengen so Artikulo 2 na Charter na United Nations.