Say guerra ya Armagedon et ontutukoy ed samay sampot ya panlaban na Dios tan saray gobierno na too. Anggad natan et onkokontra ed Dios irayan gobierno tan saray onsusuporta ed sikara ta agda labay so manpasakop ed pananguley to. (Salmo 2:2) Panampoten na guerra ya Armagedon so uley na too.—Daniel 2:44.

 Aminsan labat ya abitla so salitan “Armagedon” ed Biblia, diad Apocalipsis 16:16. Ipapanengneng na satan ya propesiya ed Apocalipsis ya diad “pasen a tatawagen ed Hebreo ya Armagedon,” “saray arari na interon dalin” et natipon ed “guerra a nagawa ed baleg ya agew na Dios a Makapanyarin-amin.”—Apocalipsis 16:14.

 Siopa so manlaban ed Armagedon? Idaulo nen Jesu-Kristo so armada ed tawen pian taloen iray kalaban na Dios. (Apocalipsis 19:11-16, 19-21) Kaiba ed saratan ya kalaban iray agmanrerespeto ed autoridad na Dios tan mamapabanday ed sikato.—Ezequiel 39:7.

 Kasin literal ya nagawa so Armagedon diad Middle East? Andi. Laknaben na guerra ya Armagedon so interon mundo, aliwan sakey labat ya lugar.—Jeremias 25:32-34; Ezequiel 39:17-20.

 Say labay ya ibaga na salitan Armagedon, odino “Har–Magedon” (diad Hebreo et Har Meghiddohnʹ) et “Palandey na Megido.” Say Megido et sakey ya syudad diad Israel nensaman. Nabasa tayod history iray importantin guerra ya agawad satan ya pasen, pati say arum ya akarekord met ed Biblia. (Ukom 5:19, 20; 2 Arari 9:27; 23:29) Balet agnayarin ontukoy so Armagedon ed samay literal ya pasen ya kawalaan na Megido nensaman. Anggapoy baleg ya palandey diman tan anggano ipila ni so interon paliber na Abeban Patar na Jezreel, ag-onduga diman so amin ya milaban ed Dios. Imbes, say Armagedon et ontutukoy ed situasyon na interon mundo ya maniiba iray nasyon ed sampot ya pilaban da ed Dios.

 Anto kasi nagawa diad guerra ya Armagedon? Agtayo amta no panon ya usaren na Dios so pakayari to, balet sarag ton usaren lamet iramay inusar to la nensaman—singa say uran a kristal, yegyeg, maksil ya uran, apoy tan asupre, kirmat, tan sakit. (Job 38:22, 23; Ezequiel 38:19, 22; Habacuc 3:10, 11; Zacarias 14:12) Nagulo so isip na arum ed saray kalaban na Dios kanian sikaran mismo so manpapateyan, balet naamtaan da lanlamang ya say milalaban ed sikara et say Dios.—Ezequiel 38:21, 23; Zacarias 14:13.

 Kasin manampot lay mundo no Armagedon? Agnaderal so planeta tayo ta say dalin so andi-anggaan ya ayaman na too. (Salmo 37:29; 96:10; Eclesiastes 1:4) Agderalen na Armagedon so amin ya totoo, satan ingen so mangisalba ed totoo ta makaliktar ed satan so “sakey a baleg ya ulop” na saray lingkor na Dios.—Apocalipsis 7:9, 14; Salmo 37:34.

 Diad Biblia, likud ed literal ya dalin, no maminsan et ontutukoy so salitan “mundo” ed saray mauges ya totoon onsusumpa ed Dios. (1 Juan 2:15-17) Atan sirin so labay ya ibaga na “anggaan na mundo” no nagawa la so Armagedon.—Mateo 24:3, Say Biblia.

 Kapigan nagawa so Armagedon? Nen impaliwawa nen Jesus so nipaakar ed “baleg a kairapan” ya manampot ed guerra na Armagedon, oniay imbaga to: “Nipaakar ed satan ya agew tan oras et anggapoy siopaman a makaamta, anggan saray anghel ed tawen odino say Anak, noag say Ama labat.” (Mateo 24:21, 36) Pero ipapanengneng na Biblia ya nagawa so Armagedon legan na kiwawala nen Jesus ya ginmapo la nen 1914.—Mateo 24:37-39.