Say Diablo et espiritu, kanian sikatoy manaayam ed pasen ya agtayo nanengneng. Pero, aliwa itan ya mangapoy-apoy ya impierno ya ibabaga ran ditan to papairapen iray mauges, ya singa nanengneng ed litrato diad sayan artikulo.

“Guerra ed tawen”

 Wala may panaon nensaman ya si Satanas a Diablo et naabuloyan ni ya makaonlad tawen, tan onaarap ni ingen ed Dios kaiba iray matoor ya anghel. (Job 1:6) Impropesiya na Biblia ya walay nagawan “guerra ed tawen” ya lapud satan et napalayas si Satanas tan ‘ibantak diad dalin.’ (Apocalipsis 12:7-9) Parehon prupruebaan na rekord ed Biblia tan saray agawa ed mundo ya asumpal la itan ya guerra ed tawen. Say Diablo et wadia la natan ed dalin tan agla makaalis dia.

 Kasin labay ya ibaga na satan ya manaayam so Diablo diad sakey ya espisipikon lugar ed planeta tayo? Singa bilang, say syudad na Pergamo nensaman et deneskribe ya “kawalaan na trono nen Satanas” tan “panaayaman nen Satanas.” (Apocalipsis 2:13) Posible ya ontan so deskripsion ed satan ya syudad ta nagmaliw itan ya sentro na panagdayew ed si Satanas nensaman. Ibabaga na Biblia ya say Diablo et manuuley ed “amin a panarian ed dalin,” kanian anggapoy espisipikon pasen ya panaayaman to diad dalin, pero sikatoy agla makaalis dia.​—Lucas 4:​5, 6.