Komaduan Awaran 18:1-34
18 Si Jehosafat et awalaan na dakel a kayamanan tan baleg a kagalangan,+ balet sikatoy akialyado ed si Ahab+ ed panamegley na panangasawa.
2 Kanian kalabas na pigaran taon, sikatoy linmad si Ahab diad Samaria,+ tan angibagat si Ahab na dakdakel a karnero tan baka parad sikato tan parad saray kakaiba to. Tan sikatoy kinombinse* nen Ahab ya onlan milaban diad Ramot-gilead.+
3 Et oniay inkuan nen Arin Ahab na Israel ed si Arin Jehosafat na Juda: “Labay moy milad siak diad Ramot-gilead?” Et oniay ebat to: “Siak tan sika et saksakey, pati saray totook tan saray totoom, tan suportaan mi ka ed guerra.”
4 Balet inkuan ni nen Jehosafat ed ari na Israel: “Amtaen mo pa ni no antoy ibaga nen Jehova.”+
5 Kanian tinipon na ari na Israel iray propeta ya 400 a lalaki, tan inkuan tod sikara: “Onla kamin milaban ed Ramot-gilead, odino andi?” Et inkuan da: “La ka, tan iyawat itan na tuan Dios ed lima na ari.”
6 Et inkuan nen Jehosafat: “Agta wala diay propeta nen Jehova?+ Ontupleg tayo met diad panamegley to.”+
7 Diad saman, say ari na Israel et inkuan tod si Jehosafat: “Wala ni sakey a laki+ a diad panamegley to et nayari tayon ontupleg ed si Jehova; balet kabkabusol ko ta agbalot mangipropropesiya na maabig iran bengatla nipaakar ed siak noagta puro mauges.+ Say ngaran to et Micaias ya anak nen Imla.” Balet inkuan nen Jehosafat: “Agnepeg a mansalita na ontan so ari.”
8 Kanian impatawag na ari na Israel so sakey ya opisyal ed palasyo tan inkuan to: “Awit mo diay Micaias ya anak nen Imla. Apuram.”+
9 Diad saman, say ari na Israel tan si Jehosafat ya ari na Juda et parehon akayurong ed trono ra, ya akasulong iray kawes na ari; wala rad panag-ilikan ya asingger ed puerta na Samaria, tan amin a propeta et manpropropesiya diad arapan da.
10 Tan si Zedekias ya anak nen Kenaana et nanggawa na saray saklor a balatyang tan inkuan to: “Oniay imbaga nen Jehova, ‘Diad panamegley na saraya et bunoen* mo ray Siryano anggad naupot ira.’”
11 Ontan met so ipropropesiya na saray arum nin propeta, a kuan da: “La ka ed Ramot-gilead tan manalo ka;+ iyawat itan nen Jehova ed lima na ari.”
12 Et samay mensahero a linman manawag ed si Micaias et inkuan tod sikato: “Say imbaga na saray propeta et pareparehon pabor ed ari. Komon ta mipara met ed sikara so ibagam+ tan mansalita ka na maabig.”+
13 Balet inkuan nen Micaias: “Unong a mabilay si Jehova, antokaman so ibaga na Dios ko et ontan so ibagak.”+
14 Insan sikatoy linmad ari, tan oniay intepet na ari: “Micaias, onla kamin milaban ed Ramot-gilead, odino andi?” Et sikatoy inmebat a tampol: “La ka tan manalo ka; iyawat ira ed lima yo.”
15 Diad ontan et inkuan na ari ed sikato: “Maminpiga ta kan nepeg a pansambaen a say katuaan labat so ibagam ed siak diad ngaran nen Jehova?”
16 Kanian inkuan to: “Nanenengneng koy amin ya Israelita a nitaytayak ed kapalandeyan, a singa ra karneron andian na managpastol.+ Inkuan nen Jehova: ‘Andian iraya na katawan. Balang sakey et pasempeten a maligen ed abung to.’”
17 Et inkuan na ari na Israel ed si Jehosafat: “Kuan ko lad sika, ‘Sikatoy agmangipropesiya na maabig iran bengatla nipaakar ed siak noagta puro mauges.’”+
18 Et inkuan nen Micaias: “Dengel yo sirin so mensahe a papaibaga nen Jehova: Anengneng koy Jehova ya akayurong ed trono to+ tan say amin ya armada ed tawen+ ya akaalagey diad nikawanan to tan diad nikawigi to.+
19 Et inkuan nen Jehova, ‘Siopay mamalikdod kinen Arin Ahab na Israel pian sikatoy onla tan ompatey diad Ramot-gilead?’ Et walay bengatlan ibabaga na sakey, balet wala met so sananey ya ibabaga na arum.
20 Insan walay sakey ya espiritu*+ ya inmalagey ed arapan nen Jehova tan inkuan to, ‘Palikdoen ko.’ Et intepet nen Jehova ed sikato, ‘Panon mon gawaen itan?’
21 Et inmebat, ‘Onla ak tan magmaliw ak a manamalikdon espiritu diad sangi na amin a propeta to.’ Kanian inkuan to, ‘Palikdoen mo, tan ontalona ka. La ka tan gawam itan.’
22 Tan natan et angiyan si Jehova na manamalikdon espiritu diad sangi na sarayan propetam,+ balet inyabawag nen Jehova a walay mauges a nagawad sika.”
23 Et dinago nen Zedekias+ ya anak nen Kenaana si Micaias+ tan tinampal to+ tan inkuan to: “Kasin nilampasan ak na espiritu nen Jehova pian mitongtong ed sika?”+
24 Inmebat si Micaias: “Naamtaan mo lanlamang itan diad agew ya onamot kad sankadaleman a kuarto.”
25 Insan inkuan na ari na Israel: “Ala yoy Micaias tan awit yod si Amon a pangulo na syudad tan ed si Joas ya anak na ari.
26 Tan ibaga yod sikara, ‘Oniay inkuan na ari: “Iyakar yod prisoan+ iyan too tan daiset labat a tinapay tan danum so irasyon yod sikato anggad makapawil ak a maligen.”’”
27 Balet imbaga nen Micaias: “No makapawil kan maligen, si Jehova et ag-akitongtong ed siak.”+ Inkuan to ni: “Tandaan yo, amin yon totoo.”
28 Kanian tinmatdang ed Ramot-gilead so ari na Israel tan si Jehosafat ya ari na Juda.+
29 Et inkuan na ari na Israel ed si Jehosafat: “Agak manpabidbir sano onla ak a milaban, balet mansulong kay kawes na ari.” Kanian agnampabidbir so ari na Israel sanen linma ran milaban.
30 Et oniay ingganggan na ari na Sirya ed saray komandante na karwahe to: “Anggapoy arum a nepeg yon pilabanan noag say ari na Israel labat.”
31 Kanengneng na saray komandante na karwahe ed si Jehosafat, ninonot da: “Saya may ari na Israel.” Kanian binmaliwas ira pian sikatoy atakien da; et kinmerew na tulong si Jehosafat,+ tan sikatoy tinulongan nen Jehova, tan pinaarawi iran tampol na Dios ed sikato.
32 Sanen anengneng na saray komandante na saray karwahe ya aliwan sikato may ari na Israel, amuliktar iran tampol tan agda la inusilan.
33 Balet walay sakey a lakin inkena toy pana to ed anggan siopa,* tan nakna toy ari na Israel diad nansaipan na sulong ton samben ed pagew. Kanian inkuan na ari ed managkarwahe to: “Baliwas ka tan iyarawim ak diad panlalabanan,* ta grabe sugat ko.”+
34 Sanagew a pinasyay panlalaban ed saman, tan kaukolan ya ipasaral so ari na Israel diad karwahe pian makaalagey ya akaarap ed saray Siryano anggad labi; tan kaselek na agew et sikatoy inatey.+
Paimanod leksab
^ Odino “tinangguyor.”
^ Odino “itulak.”
^ Odino “anghel.”
^ Odino “ya anggapoy kaam-amta to.”
^ Literal, “kampo.”
