Exodo 38:1-31
38 Sikatoy nanggawa na altar a gawad kiew na acacia parad apay a popoolan. Kuadrado itan, a limaran kasiko* ed karukey, limaran kasiko ed kalapar, tan taloran kasiko ed katagey.+
2 Insan inggawaan to itan na saray saklor diad tapew na apatiran suyok. Akapeket ed satan iray saklor. Insan to itan binalkot na gansa.+
3 Kayari na satan et ginawa to so amin a kagawaan parad altar, saray timba, pala, palanggana, tinidor, tan saray kargaan na ngalab. Amin a kagawaan na satan et ginawa to manlapud gansa.
4 Inggawaan to met na gansan parilya so altar, diad silong na pinagkagilig na satan, diad bandad pegley.
5 Sikatoy nanggawa na apatiran kondiling diad apatiran suyok ya asingger ed gansan parilya, a pangisuroban ed saray palitek.
6 Kayari na satan et sikatoy nanggawa na saray palitek a gawad kiew na acacia tan binalkot to iratan na gansa.
7 Insurob to iray palitek ed saray kondiling a walad saray diking na altar pian naalsa itan. Ginawa to so altar a singa bungaw a kaban a gawad tabla.
8 Insan sikatoy nanggawa na gansan palanggana+ tan gansan patoonan ed satan; inusar to iray espiho* na saray bibii a naorganisan manlingkor diad lolooban na tolda a pantitiponan.
9 Insan sikatoy nanggawa na sular.+ Diad bandad abalaten a diking na sular, ya akaarap ed abalaten, sikatoy nanggawa na saray akasabit a kurtina a gawad marakep a nilagan tinebey a linen, a 100 a kasiko ed karukey.+
10 Walay 20 lusek tan 20 patoonan a gansa, tan saray kawit na saray lusek tan saray pangisuldongan* ed saratan et gawad pilak.
11 Ontan met, diad bandad amianen a diking et wala ray akasabit a kurtina a 100 a kasiko. Saray 20 lusek tan 20 patoonan ed saratan et gawad gansa. Saray kawit na saray lusek tan saray pangisuldongan* ed saratan et gawad pilak.
12 Balet saray akasabit a kurtina diad bandad sagur a diking et 50 kasiko. Walay samploran lusek tan samploran patoonan, tan saray kawit na saray lusek tan saray pangisuldongan* ed saratan et gawad pilak.
13 Say kalapar na bandad bukig a diking ya akaarap ed bubutayan na agew et 50 kasiko.
14 Wala ray akasabit a kurtina a 15 kasiko diad sakey a pagpag na lolooban, a walaan itan na taloran lusek tan taloran patoonan.
15 Tan diad biek a pagpag na lolooban na sular et wala ray akasabit a kurtina a 15 kasiko, a walaan itan na taloran lusek tan taloran patoonan.
16 Amin ya akasabit a kurtina ed liber na sular et gawad marakep a nilagan tinebey a linen.
17 Saray patoonan ed saray lusek et gawad gansa, saray kawit na saray lusek tan saray pangisuldongan* ed saratan et gawad pilak, saray tapew et abalkot na pilak, tan wala ray pilak a pansuldong ed amin a lusek na sular.+
18 Say sanib* na lolooban na sular et impanlalagaan ya asul a tinebey, kolor-ube ya abel,* ambalbalangan tinebey, tan marakep a nilagan tinebey a linen. Satan et 20 kasiko ed karukey tan 5 kasiko ed katagey, a mipadpara ed katagey na saray akasabit a kurtina ed sular.+
19 Saray apatiran lusek tan saray apatiran patoonan na saratan et gawad gansa. Saray kawit tan saray pangisuldongan* na saratan et pilak, tan saray tapew na saratan et abalkot na pilak.
20 Amin a palpal na tolda parad tabernakulo tan ed liber na sular et gawad gansa.+
21 Saya so listaan na saray materyales ya inusar ed impanpaalagey na tabernakulo, say tabernakulo na Testimonya,+ ya inlista unong ed ganggan nen Moises. Saya so responsabilidad na saray Levita+ ya idadaulo nen Itamar+ ya anak nen Aaron a saserdote.
22 Amin ya ingganggan nen Jehova ed si Moises et ginawa nen Bezalel+ ya anak nen Uri ya anak nen Hur ed tribu nen Juda.
23 Kaiba toy Oholiab+ ya anak nen Ahisamac ed tribu nen Dan, sakey a marunong a komikimey tan managburda tan managlaga na asul a tinebey, kolor-ube ya abel, ambalbalangan tinebey, tan marakep a klase na linen a tinebey.
24 Amin a balitok ya inusar parad amin a kimey diad masanton pasen et misimbangan ed karakel na balitok a parad apay ya ipapayapay,+ 29 a talento* tan 730 siklo* unong ed siklo na masanton pasen.*
25 Tan say pilak ya inyakar na saramay lalakin nirehistroy kangaranan da et 100 a talento tan 1,775 siklo unong ed siklo na masanton pasen.*
26 Say kapalduan siklo ya inyakar na kada too et kapalduan siklo unong ed siklo na masanton pasen* parad balang laki a kabiangan na saramay nirehistro a mantaon na 20 a patagey,+ ya asabi ray bilang a 603,550.+
27 Say inusar ed impanggawa na saray patoonan parad masanton pasen tan saray patoonan ed kurtina et asabi toy 100 a talento; say 100 a patoonan et misimbangan ed 100 a talento, sakey a talento parad kada patoonan.+
28 Manlapud samay 1,775 siklo et inggawaan to na saray kawit iray lusek tan binalkot to iray tapew na saratan tan impansusuldongan to iratan.
29 Say gansa ed samay apay* et 70 talento tan 2,400 a siklo.
30 Diad panamegley na saya et ginawa to iray patoonan parad lolooban na tolda a pantitiponan, say gansan altar tan say gansan parilya na satan, amin a kagawaan ed altar,
31 saray patoonan ed liber na sular, saray patoonan a walad lolooban na sular, tan amin a palpal na tolda diad tabernakulo tan amin a palpal na tolda+ ed liber na sular.
Paimanod leksab
^ Say sakey a kasiko et 44.5 sentimetro (17.5 pulgada). Nengnengen so Apendise B14.
^ Salanti, saray pinasileng a maong a metal ya espiho.
^ Odino “saray kondiling; saray kawit; saray taker” parad pangisuldong.
^ Odino “saray kondiling; saray kawit; saray taker” parad pangisuldong.
^ Odino “saray kondiling; saray kawit; saray taker” parad pangisuldong.
^ Odino “saray kondiling; saray kawit; saray taker” parad pangisuldong.
^ Odino “kurtina.”
^ Odino “kolor-ube ya abel a gawad bagoy karnero.”
^ Odino “saray kondiling; saray kawit; saray taker” parad pangisuldong.
^ Say sakey a talento et 34.2 kilo. Nengnengen so Apendise B14.
^ Say sakey a siklo et 11.4 gramo. Nengnengen so Apendise B14.
^ Odino “unong ed masanton siklo.”
^ Odino “unong ed masanton siklo.”
^ Odino “unong ed masanton siklo.”
^ Odino “apay ya ipapayapay.”
