Levitico 5:1-19
5 “‘No walay siopaman* a nankasalanan lapud agto impaamta so atasian, anengneng, odino naamtaan to anggaman arengel toy tawag a mantestigo ed publiko,*+ ebatan toy impakalingo to.
2 “‘Odino no adiwit na sakey a too* so antokaman ya agmalinis, balanglan inatey ya agmalinis ya atap ya ayep, agmalinis a kokomponien ya ayep, odino agmalinis ya amungkog a pinalsa,+ sikatoy nagmaliw ya agmalinis tan nankasalanan anggaman agto itan amta.
3 Odino no walay siopaman ya agto amtan adiwit toy karutakan na sakey a too+—antokaman ya agmalinis a manggawa ed sikaton agmalinis—insan naamtaan to itan, diad satan et sikatoy nankasalanan.
4 “‘Odino no walay siopaman* a bengatbengat a mansamba pian gawaey sakey a bengatla—balanglan satan et kamaongan odino kaugsan, antokaman itan—tan agto itan amta, balet amoria to lanlamang a sikatoy bengatbengat a nansamba, sikatoy nankasalanan.*+
5 “‘No sikatoy nankasalanan nisengeg ed sakey ed sarayan bengatla, nepeg ton ipatua+ no panon a sikatoy akapankasalanan.
6 Sikatoy mangiyakar met ed si Jehova na apay to parad impakasumlang lapud impankasalanan to,+ salanti, sakey a kabatyan manlapud pulok, balanglan kabatyan a kordero odino kilaw a kabatyan a kanding, bilang apay parad kasalanan. Insan manggawa na pananakbong so saserdote parad kasalanan to.
7 “‘Balet no agto nayariay mangiter na sakey a karnero, sikatoy mangiyakar ed si Jehova na duaran palekpek odino duaran sibong a malapati+ bilang apay parad impakasumlang to, say sakey et apay parad kasalanan tan say sakey et apay a popoolan.+
8 Iyakar to iratan ed saserdote, a sikatoy mangiyapay nin unona ed samay apay parad kasalanan tan yesyesen toy ulo na satan diad arap na beklew ya agto itan putoten.
9 Iwalsik to so arum a dala na apay parad kasalanan diad diking na altar, balet nepeg ya ipaikik so akeran dala ed leksab na altar.+ Apay itan parad kasalanan.
10 Iyapay to imay sakey bilang apay a popoolan unong ed kaslakan lan gagawaen;+ tan manggawa na pananakbong so saserdote parad kasalanan to, tan sikatoy naperdona.+
11 “‘Natan, no agto nayariay mangiter na duaran palekpek odino duaran sibong a malapati, nepeg a sikatoy mangiyakar na kakaplo na sakey ya efa*+ na pinon arina ya apay to pian onkana ed kasalanan to, bilang apay parad kasalanan. Agto itan lalaokay larak odino iikday olibano, ta sakey itan ya apay parad kasalanan.
12 Iyakar to itan ed saserdote, tan say saserdote et mangalay sankaakop ed satan bilang apay a mangirepresenta* tan paaseweken to itan ed altar diad tapew na saray apay a pinoolan parad si Jehova. Apay itan parad kasalanan.
13 Manggawa na pananakbong so saserdote parad agawaan ton kasalanan, dinanman ed sarayan kasalanan, tan sikatoy naperdona.+ Say kera ed samay apay et magmaliw a kien na saserdote,+ a singa samay apay a kakanen.’”+
14 Onia ni inkuan nen Jehova ed si Moises:
15 “No walay siopaman* ya agnanmatoor diad agginagalan impankasalanan ed saray masanton bengatla nen Jehova,+ sikatoy mangiyakar ed si Jehova na andiay depekton kalakian a karnero manlapud pulok bilang apay parad impakasumlang;+ say kantidad na satan ed siklo* iran pilak et unong ed siklo na masanton pasen.*+
16 Tan bayaran to so impankasalanan to ed masanton pasen tan aruman to ni na kakalima na samay kantidad.+ Iter to itan ed saserdote, pian makapanggawa na pananakbong so saserdote+ parad sikato ed panamegley na kalakian a karnero ya apay parad impakasumlang, tan sikatoy naperdona.+
17 “No walay siopaman* a nankasalanan diad impanggawa to ed dinanman ed saray insebel nen Jehova, anggano agto amta itan, sikatoy siansia nin nankasalanan tan ebatan toy impakalingo to.+
18 Sikatoy nepeg a mangiyakar ed saserdote na andiay depekton kalakian a karnero manlapud pulok unong ed atantyan kantidad, bilang apay parad impakasumlang.+ Insan manggawa na pananakbong so saserdote parad sikato lapud agginagalan lingo ya agto naam-amtaan, tan sikatoy naperdona.
19 Apay itan parad impakasumlang. Talagan sikatoy akapanggawa na kasalanan ed si Jehova.”
Paimanod leksab
^ Literal, “sakey a boses na ayew (samba).” Nayarin sakey ya anunsio nipaakar ed gawan mauges kaibay inyabawag ya ayew ed nanggaway mauges odino ed tasi, no agmantestigo.
^ Odino “kamarerwa.”
^ Odino “kamarerwa.”
^ Odino “kamarerwa.”
^ Nayarin lapud agto tinoor so insamba to.
^ Say kakaplo na sakey ya efa et 2.2 litro. Nengnengen so Apendise B14.
^ Odino “bilang pakanodnonotan (mangirerepresenta) a parte na satan.”
^ Odino “kamarerwa.”
^ Odino “unong ed masanton siklo.”
^ Say sakey a siklo et 11.4 gramo. Nengnengen so Apendise B14.
^ Odino “kamarerwa.”
