NEN insulat so Biblia, inusar so lenguahen Hebreo tan Griego. Say Hebreon salitan she’ohlʹ tan say kapetekan ton Griegon salita ya haiʹdes et masulok a 70 beses ya nausar. Pareho iratan ya ontutukoy ed patey. Diad arum a bersion na Biblia, impatalos iratan bilang “lubok,” “impierno,” odino “abot.” Balet, dakel iray lenguahe ya anggapoy salita ran miparad eksakton kabaliksan na saratan a salitan Hebreo tan Griego. Kanian diad saray paimanod leksab na Balon Mundo a Patalos et inusar iray salitan “Sheol” tan “Hades.” Anton talaga so labay ya ibaga na saratan a salita? Nengnengen tayo no panon iratan ya inusar ed nanduruman teksto ed Biblia.

Nabasad Eclesiastes 9:10: “Anggapo so kimey odino plano odino kakabatan odino karunongan diad Lubok [“Sheol,” paimanod leksab], a laen mo.” Labay kasin ibaga na satan ya say Sheol et samay mismon angiponponan ed inatey ya inad-aro tayo? Andi. No tutukoyen na Biblia so ponponan, duman termino ed Hebreo tan Griego so uusaren parad satan, aliwan she’ohlʹ tan haiʹdes. (Genesis 23:7-9; Mateo 28:1) Sakey ni, ag-uusaren na Biblia so salitan “Sheol” parad ponponan na pigaran totoo, a singa say ponponan na pamilya odino na dakel a totoo.​—Genesis 49:30, 31.

Anto sirin so tutukoyen ya “Sheol”? Ipapaamta na Salitay Dios ya say “Sheol,” odino “Hades,” et aglabat ontutukoy ed ponponan na dakel a totoo. Singa bilang, nabasad Isaias 5:14 ya “pinaawang na Lubok [“Sheol,” paimanod leksab] so sarili to tan insangi ton maong.” Anggano dakdakel lay totoon inaatey ya inakmon na Sheol, a singa panangibaga, singa agnin siansia itan napepenek odino napepesel. (Proverbio 30:15, 16) Aliwan singa say literal a ponponan odino sementeryo, ya limitado labat so nakarga to, ‘Say Lubok et agbalot napepenek.’ (Proverbio 27:20) Labay ton ibaga, say Sheol et agbalot napapano. Anggapoy limitasyon to. Kanian say Sheol odino Hades, et aliwan literal ya pasen a walad saksakey a lugar. Imbes, simboliko itan a pasen ya kawalaan na maslak ya inaatey a totoo.

Ontulong ed sikatayo so bangat na Biblia nipaakar ed kioli  pian lalon natalosan so labay ya ibaga na “Sheol” tan “Hades.” Nalinewan ed Salitay Dios ya saray inaatey ya walad simbolikon pasen ya Sheol tan Hades et walay ilalo dan kioli. * (Job 14:13; Gawa 2:31; Apocalipsis 20:13) Ipapanengneng met na Salitay Dios ya aliwa labat ya saramay nanlingkor ed si Jehova so walad Sheol odino Hades noagta kaiba met so dakel ya agnanlingkor ed sikato. (Genesis 37:35; Salmo 55:15) Kanian, ibabangat na Biblia ya walay “kioli na saray matunong tan saray agmatunong.”​—Gawa 24:15.