1, 2. (a) Panon a nibagan say sakey a regalo et importantin maong ed sika? (b) Akin a nibagan say dondon so sankamablian ya regalon nayarin naawat mo?

ANTOY sankarakepan ya regalon naawat mo? Agkaukolan ya mabmabli so sakey ya regalo pian nibagan importante. Diad tua, aliwan say presyo na regalo so pakasukatan. Imbes, nibagam ya mabmabli so sakey a regalo no agusgustoan mo tan no kakkaukolan mo.

² Diad amin a regalon labay mon naawat, walay sakey ya seguradon kakkaukolan mo. Regalo itan na Dios ed totoo. Amayamay lay inter nen Jehova ed sikatayo, balet say sankarakepan ya regalo to et say bilay ya insakripisyo na Anak to, si Jesu-Kristo. (Basaen so Mateo 20:28.) Naaralan tayod sayan kapitulo ya say dondon so sankamablian a regalo ya nayarin naawat mo, lapud satan et magmaliw kan malikeliket tan niiter na satan iray sankaimportantian ya kaukolan mo. Satan ya dondon so sankabalgan a prueba ya inad-aro ka nen Jehova.

3. Anto so dondon, tan antoy kaukolan tayon naamtaan pian nibaga tayon mabmablin itan ya regalo?

³ Diad simplin panangibaga, satan ya dondon so paraan nen Jehova pian iliktar odino isalba so totoo ed kasalanan tan patey. (Efeso 1:7) Pian natalosan tayo iyan bangat na Biblia, kaukolan tayon pawilen imay agawa ed hardin na Eden. No naamtaan tayoy kabaleg na abalang nen Adan sanen nankasalanan, insan tayo labat natalosan ya say dondon et talagan mabmablin regalo.

4. Lapud perpekto si Adan, anto ray walad sikato?

⁴ Sanen ginawa nen Jehova si Adan, walay mabmablin inter To ed sikato​—say perpekton bilay. Isip mo pa. Lapud perpekto so laman tan nonot nen Adan, agbalot mansakit, ontatken, odino ompatey. Tan lapud perpekton too, nikadkaduma so relasyon tod si Jehova. Ibabaga na Biblia ya si Adan et “anak na Dios.” (Lucas 3:38) Say relasyon nen Adan ed si Jehova a Dios et singa relasyon na sakey ya anak ed maaron ama to. Akitongtong si Jehova ed si Adan ya anak To, tan inikdan To na makapaliket a kimey. Impaamta met na Dios no anto ray nepeg ya gawaen nen Adan.​—Genesis 1:28-30; 2:16, 17.

5. Antoy labay ya ibaga ya si Adan et ginawa “ed indengan na Dios”?

⁵ Ginawa si Adan “ed indengan na Dios.” (Genesis 1:27) Agto labay ya ibagan kaluplupa nen Adan so Dios. Singa naaralan tayo ed Kapitulo 1 na sayan libro, si Jehova et agnanengneng ta sakey ya Espiritu. (Juan 4:24) Kanian anggapoy laman tan dala nen Jehova. Say labay ya ibaga na ginawa si Adan “ed indengan na Dios” et wala ray kualidad to ya mipara ed Dios, kaibay aro, karunongan, hustisya, tan pakayari. Wala ni sakey ya piparaan nen Adan ed Ama to, sikatoy makapandesisyon ya bukor. Kanian si Adan et agginawa na Dios ya singa robot ya say gawaen to labat et no antoy aka-program ed sikato. Imbes,  sarag toy mandesisyon ya pilien so duga odino aliwa. No pinili to ya tuloken so Dios, tuloytuloy komon ya nambilay diad Paraiso ed dalin.

6. Sanen ag-inunor nen Adan so Dios, antoy abalang to, tan antoy epekto ed saray anak to?

⁶ Malinew sirin ya nen ag-inunor nen Adan so Dios tan senentensiaan na patey, balbaleg so abalang to. Lapud impankasalanan to, pinerdi toy perpekton bilay to tan amin ya bendisyon na satan. (Genesis 3:17-19) Makapaermen ta abalang nen Adan so mabmabli tan perpekton bilay to tan say bilay na magmaliw ya ananak to. Oniay ibabaga na Salitay Dios: “No panon a diad panamegley na sakey a too [si Adan] et linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo lapud nankasalanan iran amin.” (Roma 5:12) On, atawir tayon amin ed si Adan so kasalanan. Kanian ibabaga na Biblia ya ‘inlako’ toy sarili to tan saray anak to, tan amin et naaripen na kasalanan tan patey. (Roma 7:14) Anggapo lay ilalo di Adan tan Eva ta ginagala ran ag-unoren so Dios. Balet sikatayo ran anak da ey?

7, 8. Antoy labay ya ibaga na salitan dondon?

⁷ Inter nen Jehova so dondon pian isalba so totoo. Anto ’tay dondon? Pantongtongan tayoy duara ed saray labay ton ibaga. Unona, say dondon et bili ya ibayar pian nabawi so sakey a bengatla odino pian nibulos so sakey. Nayarin ikompara itan ed kuarta ya ibayar pian nibulos so sakey ya kinidnap. Komadua, say dondon et bili ya isalat odino ibayar parad sakey a bengatla. No walay aperdi odino arisgo, kaukolan ya bayaran so bili na satan. Singa bilang, no aka-aksidente so sakey a too, bayaran to so eksakton presyo na samay aperdi odino arisgo to.

⁸ Panon a nabayaran so balbaleg ya pinerdi nen Adan, ya lapud satan et alanor itayon amin? Tan panon itayon  nibulos ed pangaaripen na kasalanan tan patey? Aralen tayo so nipaakar ed dondon ya inter nen Jehova tan no anto ray niiter na satan ed sika.

9. Anton klase na dondon so kaukolan?

⁹ Lapud perpekton bilay so abalang, agbalot itan nabayaran na aliwan perpekton bilay na too. (Salmo 49:7, 8) Say kaukolan et sakey a dondon a mipetekan ed bili na samay abalang. Base itan ed prinsipyo na perpekton hustisya ya walad Salitay Dios, ya oniay ibabaga to: “Bilay parad bilay.” (Deuteronomio 19:21) Kanian, antoy kaukolan pian nabayaran so abalang nen Adan ya perpekton bilay? Kaukolan so perpekton bilay na sananey a too, say “kasimbangan a dondon.”​—1 Timoteo 2:6.

10. Panon ya inter nen Jehova so dondon?

¹⁰ Panon ya inter nen Jehova so dondon? Imbaki to diad dalin so sakey ed saray perpekton espiritun anak to. Balet aglabat basta angibaki si Jehova na sakey ed sikara. Say imbaki to et amay inad-aro to, say bogbogtong ya Anak to. (Basaen so 1 Juan 4:9, 10.) Mabulos ya tinaynan na sayan Anak so tawen ya panaayaman to. (Filipos 2:7) Singa naaralan tayo lad Kapitulo 4 na sayan libro, nanggawa si Jehova na milagro, inyalis toy bilay na sayan Anak ed eges nen Maria. Panamegley na masanton espiritu na Dios, niyanak si Jesus ya perpekton too, aliwan makasalanan.​—Lucas 1:35.

11. Panon a nadondon na sakey a too so minilyon a totoo?

¹¹ Balet, panon ya nadondon na sakey a too so amayamay a totoo, ya diad tua et minilyon ni ingen? No pawilen tayoy agawa, panon ya nagmaliw a makasalanan so minilyon a totoo? Tandaan ya nen nankasalanan si Adan, abalang to so mabmabli tan perpekton bilay to. Kanian,  agto itan nipatawir ed saray anak to. Imbes, say impatawir to et kasalanan tan patey. Si Jesus, a tinawag na Biblia ya “unor ya Adan,” et perpektoy bilay to bilang too tan agbalot nankasalanan. (1 Corinto 15:45) Nibagan sinalatan nen Jesus si Adan pian nisalba itayo. Si Jesus et matulotulok ed Dios, insakripisyo odino inter toy perpekton bilay to pian nabayaran so kasalanan nen Adan. Kanian inikdan nen Jesus na ilalo iray anak nen Adan.​—Roma 5:19; 1 Corinto 15:21, 22.

12. Antoy pinaneknekan na impanirap nen Jesus?

¹² Indetalye na Biblia so irap ya dinalan nen Jesus antis ya inatey. Sikatoy sinipsiplatan, impasak ed poste, tan pinairap a maong ya anggad inatey. (Juan 19:1, 16-18, 30; Apendise ed artikulon “Nepeg Kasin Mangusar na Krus Iray Kristiano Diad Panagdayew Da?”) Akin et kaukolan nin manirap si Jesus? Diad sakey ed saray ontumbok a kapitulo na sayan libro, naaralan tayo ya papapawayen nen Satanas ya anggapoy toon mansiansian matoor ed si Jehova no nasubok. Diad impanmatoor nen Jesus anggano pinairap ya maong, inter toy sankaabigan ya ebat ed akusasyon nen Satanas. Pinaneknekan nen Jesus ya say sakey a perpekton too ya makapandesisyon a bukor et sarag toy mansiansian matoor ed Dios anggano antoy gawaen na Diablo. Malikeliket si Jehova ta nanmatoor ed sikato so inad-aro ton Anak!​—Proverbio 27:11.

13. Panon ya imbayar so dondon?

¹³ Panon ya imbayar so dondon? Nen Nisan 14, 33 C.E. (diad kalendaryo na saray Judio), inabuloyan na Dios ya ompatey so perpekto tan anggapoy kasalanan ya Anak to. Kanian “pinsanan” ya inter nen Jesus so perpekton bilay to bilang too. (Hebreo 10:10) Diad komatlon agew kayari na impatey nen Jesus, sikatoy binilay nen Jehova bilang espiritu. Diad tawen, impresenta nen Jesus ed Dios so bili na perpekton bilay to bilang too ya insakripisyo to pian nadondon iray ananak nen Adan.  (Hebreo 9:24) Inawat nen Jehova so bili na sakripisyo nen Jesus, say dondon ya kaukolan pian nibulos so totoo ed panangaripen na kasalanan tan patey.​—Basaen so Roma 3:23, 24.

14, 15. Pian ‘naperdona iray kasalanan tayo,’ antoy kaukolan tayon gawaen?

¹⁴ Anggano makasalanan tayo, siansia nin makaawat tayo ray bendisyon lapud dondon. Amtaen tayoy arum ya naawat tayo natan tan diad arapen lapud sayan sankarakepan ya regalo na Dios.

¹⁵ Naperdona iray kasalanan. Lapud agtayo perpekto, aliwan mainomay ya gawaen so duga. Amin tayo et makakapankasalanan diad salita tan gawa. Balet lapud insakripisyo nen Jesus so bilay to, nayarin ‘naperdona iray kasalanan tayo.’ (Colosas 1:13, 14) Pero pian naperdona itayo, kaukolan ya impapuso so pagbabawi tayo. Kaukolan met ya mapaabeba tayon manpikasi ed si Jehova, tan kerewey panamerdona to base ed pananisia tayod insakripisyon bilay na Anak to.​—Basaen so 1 Juan 1:8, 9.

16. Antoy makatulong ed sikatayo pian malinis so konsiensia tayon dayewen so Dios, tan akin et importante ya malinis so konsiensia tayo?

¹⁶ Malinis ya konsiensia. No nakokonsiensia itayo, mainomay tayon nadismaya tan isipen ya anggapo lay kana tayo. Balet lapud dondon, naperdona itayo. Tutulongan itayo nen Jehova pian makapandayew tayod sikato ya walay malinis a konsiensia anggano ag-itayo perpekto. (Hebreo 9:13, 14) Lapud satan et sarag tayon ibaga so amin ed si Jehova tan agtayo nababaingan ya manpikasi ed sikato. (Hebreo 4:14-16) No pansiansiaen tayon malinis so konsiensia tayo, mareen so nonot tayo, nawalaan tayoy respeto ed sarili, tan maliket tayo.

17. Anto ray bendisyon ed arapen lapud inatey si Jesus parad sikatayo?

 ¹⁷ Nawalaan na ilalon manbilay ya tuloytuloy diad paraison dalin. Imbaga na Roma 6:23: “Say bayar na kasalanan et patey, balet say regalon iiter na Dios et say bilay ya andi-anggaan diad panamegley nen Kristo Jesus a Katawan tayo.” Diad Kapitulo 3 na sayan libro, naamtaan tayo ray bendisyon ya nagawa ed Paraiso diad dalin. (Apocalipsis 21:3, 4) Amin iratan ya bendisyon ed arapen, kaiba lay pambilay ya tuloytuloy tan perpekton kondisyon na laman, et posible lapud inatey si Jesus parad sikatayo. Pian naawat tayo iratan ya bendisyon, kaukolan tayon ipanengneng ya papablien tayo itan ya regalo ya dondon.

18. Akin ya nepeg tayon pisalamatan si Jehova ed inter ton dondon?

¹⁸ Akin ya nepeg tayon pisalamatan si Jehova ed inter ton dondon? Say sakey a regalo et mabmabli no say nanregalo et inter toy panaon tan sagpot to, odino nanggastos. Seguradon malikeliket tayo no nalikna tayon inter to itan a regalo lapud inad-aro to tayo. Say dondon so sankarakepan ed amin a regalo, lapud balbaleg so insakripisyo na  Dios pian niiter to itan. “Ontan lay panangaro na Dios ed mundo ya inter to so bogbogtong ya Anak to,” so imbaga na Juan 3:16. Say dondon so sankabiskegan lan prueba na panangaro nen Jehova ed sikatayo. Prueba met itan ya inad-aro itayo nen Jesus, ta mabulbulos ton inter so bilay to parad sikatayo. (Basaen so Juan 15:13.) Kanian lapud regalon dondon, kombinsido itayon inad-aro nen Jehova tan na Anak to so balang sakey ed sikatayo.​—Galacia 2:20.

19, 20. Panon mon nipanengneng so pisasalamat mod dondon?

¹⁹ Panon mo sirin ya nipanengneng so pisasalamat mod regalo na Dios ya dondon? Unona, kaukolan mon kabaten so Sankaabigan a Manangiter, si Jehova. (Juan 17:3) Nagawaan mo itan no aralen moy Biblia diad tulong na sayan libro. Legan mon kakabaten si Jehova, onaaralem so panangarom ed sikato. Tan lapud satan a panangarom, labay mon gawaen iray makapaliket ed sikato.​—1 Juan 5:3.

²⁰ Ipanengneng so pananisia ed insakripisyo nen Jesus ya bilay to. Ibabaga na Biblia: “Samay mangipapanengneng na pananisia ed Anak et walaan na bilay ya andi-anggaan.” (Juan 3:36) Panon tayon nipanengneng so pananisia ed si Jesus? Satan a pananisia et aglabat anganggad salita. “Say pananisia . . . ya andian na saray gawa et inatey,” so imbaga na Santiago 2:26. On, no talagan manisia tayo, nanengneng itan ed “saray gawa” odino kiwas tayo. Say sakey a paraan pian nipanengneng tayon talagan manisia tayod si Jesus et diad panggawa tayod anggaay nayarian tayon sikatoy aligen, aliwa labat ya diad salita noagta dia met ed gawa.​—Juan 13:15.

21, 22. (a) Akin a nepeg tayon onatendi ed tinaon ya pannodnonot ed Pangdem na Katawan? (b) Antoy ipaliwawa ed Kapitulo 6 tan 7?

²¹ Onatendi ed tinaon ya Pangdem na Katawan. Diad samay labi na Nisan 14, 33 C.E., inggapo nen Jesus so tatawagen ed Biblia ya “Pangdem na Katawan.” (1 Corinto 11:20; Mateo 26:26-28) Tinawag met iyan  Memoryal na impatey nen Kristo. Inggapo itan nen Jesus pian agnalingwanan na saray apostol to tan na amin a magmaliw a tuan Kristiano ya inter toy perpekton bilay to bilang dondon. Oniay ingganggan nen Jesus nipaakar ed Memoryal: “Itultuloy yon gawaen iya bilang pannodnonot ed siak.” (Lucas 22:19) Say Memoryal et mangipanonot ed sikatayo ya say dondon et prueba ya inad-aro itayo nen Jehova tan nen Jesus. Nipanengneng tayon importante ed sikatayo so dondon no onatendi tayod tinaon ya Memoryal na impatey nen Jesus. *

²² Say dondon ya inter nen Jehova et talagan mabmablin regalo. (2 Corinto 9:14, 15) Anggan saray inaatey et minabang met ed satan. Naaralan tayo no panon itan a nagawa diad Kapitulo 6 tan 7.