Kakkayari nen Jesus ya inulit so bangat to nipaakar ed pikakasi, balet aliwan satan labat so aminpigan nantongtongan legan na ministeryo to. Nen manggagaway milagro diad Galilea, sikatoy inakusaan da ya iikday pakayari na manuley na saray demonyo. Ontan lamet so akusasyon da diad Judea.

Nen pinapaway nen Jesus so demonyo ed sakey a lakin aselepan kanian naemel, nandinayew iray totoo. Puera balet iray mamabalaw ed sikato. Onia lamet so akusasyon da: “Papapawayen to iray demonyo ed panamegley nen Beelzebub, say manuley na saray demonyo.” (Lucas 11:15) Tan sikatoy sinubok na arum, kinmerew ni ray kaaruman ya tanda manlapud tawen pian napruebaan no siopan talaga si Jesus.

Alikas nen Jesus ya susuboken da, kanian say inyebat tod sikara et parehod saramay mamabalaw ed sikato diad Galilea. Imbaga ton no naapag so sakey a panarian, nageba itan. Impaliwawa ton: “No kokontraen nen Satanas so sarili to, panon a mansiansia so panarian to?” Insan diretsaan ya imbaga nen Jesus ed sikara: “No papapawayen ko ray demonyo ed panamegley na pakapanyari na Dios [“gamet na Dios,” paimanod leksab] asabian kayo lay Panarian na Dios.”​—Lucas 11:18-20.

Nen binitla nen Jesus so “gamet na Dios,” nayarin anonotan na saray onderengel imay agawa nensaman ed saray Israelita. Imbaga na saramay walad palasyo na Faraon ya akanengneng ed milagron ginawa nen Moises: “Gamet iya na Dios!” Tan “gamet na Dios” met so angisulat ed Samploran Ganggan diad duaran tapyas na bato. (Exodo 8:19; 31:18) Ontan met, say “gamet na Dios”​—say masanton espiritu odino aktibon puersa to​—so mangiiter ed si Jesus na pakayarin mamaekal na saray demonyo tan manpaabig na saray mansasakit. Kanian talagan nabetan lay Panarian na Dios irayan onsusumpa, ta say tinuron Ari na Panarian, si Jesus, et wala lad arapan da ya manggagawad sarayan milagro.

Say pakayari nen Jesus ya mamaekal na demonyo et ebidensya ya sikatoy mas mabiskeg nen si Satanas. Singa toon mabisbiskeg ya nalooban toy palasyo tan natalo toy armadon guardia. Inulit met nen Jesus imay ilustrasyon to nipaakar ed demonyo ya tinaynan toy sakey a too. No agpanoen na sayan too na maong iran bengatla so sarili to, ompawil ed sikato itan ya demonyo kaibay pitora ni, tan mas alodloor ni so pansumpalan to nen say datin kipapasen to. (Mateo 12:22, 25-29, 43-45) Ontan so agawad bansan Israel.

Insan, walay sakey a biin inkasil toy boses to tan imbaga tod si Jesus: “Maliket so ina ya angilukon tan nampasuso ed sika!” Labalabay na saray Judion bibii so magmaliw ya ina na propeta, lalo la na say Mesias. Kanian nayarin inisip na sayan bii ya malikeliket si Maria ta sikatoy ina na sayan managbangat. Balet impetek nen Jesus so panmoria na bii tan imbaga toy tuan panlalapuan na liket: “Mas maliket iramay onderengel tan manusumpal ed salita na Dios!” (Lucas 11:27, 28) Agbalot imbaga nen Jesus ya nepeg ya ikday nikaduman galang si Maria. Imbes, say lapuan na tuan liket na laki o bii et say matoor a panaglingkor tod Dios, aliwan say kapamilya to odino agawaan to.

Singa ginawa nen Jesus diad Galilea, binano to iray totoo ta pipiliten dan manggaway tanda manlapud tawen. Imbaga ton anggapoy tanda a niiter ed sikara noag say “tanda nen Jonas.” Samay taloy agew nen Jonas ed eges na sira tan samay makpel ya impanpulong to ya amakiwas ed saray tagad Ninive ya magbabawi et sakey a tanda. Kuan nen Jesus: “Balet wadia so sakey a babaleg nen si Jonas.” (Lucas 11:29-32) Sakey ni, si Jesus et mas makapanyari nen si Solomon, ya nila na reyna na Sheba pian ondengel ed karunongan to.

“Kayarin selselan na sakey a too so lamparaan,” so kuan nen Jesus, “itapew to itan ed patoonan, aliwan diad maamot a pasen odino diad dalem na baskit.” (Lucas 11:33) Nayarin say labay  ton ibaga et singa inyamot ya liwawa na lamparaan so pambangat tan panggaway milagro ed sarayan totoo, ta ag-ira ondengel, kanian agda atalosay gagala na saray milagro to.

Kakkayarin pinapaway nen Jesus so demonyo ed sakey a laki kanian makapansalita la. Diad satan et apakiwas komon iray totoo ya idayew so Dios tan ibalitad arum so nagagawaan nen Jehova. Kanian pinasakbayan nen Jesus iray manaanap na lingo to: “Manalwar ka sirin, ompano say liwawan walad sika et kabilungetan. Kanian, no maliwawa so interon laman mo ya anggapon balot so ambilunget ed satan, magmaliw itan a singa kaliwawa na sakey a lamparaan a manliliwawa ed sika diad panamegley na saray sinag to.”​—Lucas 11:35, 36.