Kayari inkioli nen Jesus, inyuksoy ton minengneng ed sikato so 11 ya apostol to diad palandey ed Galilea. Wadman met iray arum nin disipulo, a manga 500 ira, a diad gapo et wala nid sikaray manduaruwa. (Mateo 28:17; 1 Corinto 15:6) Balet makatulong so ibaga nen Jesus pian nakombinse so kada sakey ed sikara a sikatoy talagan mabilay.

Impaliwawa nen Jesus ya inter la na Dios ed sikato so amin ya pakauley ed tawen tan diad dalin. Tan pinaseseg to ra: “Onla kayo sirin tan ibangat yo iray totoo ed amin a nasyon pian magmaliw iran disipulok, a bautismoan yo ra ed ngaran na Ama tan ed ngaran na Anak tan ed ngaran na masanton espiritu, ya ibangat yo ran mangunor ed amin ya ingganggan kod sikayo.” (Mateo 28:18-20) On, aliwa labat a mabilay si Jesus noagta interesado nin siansia a nipulong so maong a balita.

Amin a papatumbok nen Jesus​—lalaki, bibii, tan ugugaw​—so angawat ed sayan ganggan a bangatan iray totoo pian magmaliw iran disipulo. Nayarin wala ray malabay a mamatunda ed panagpulong tan panagbangat da, ingen ta pinaseguroan ira nen Jesus: “Amin a pakauley ed tawen tan diad dalin et niiter lad siak.” Antoy kabaliksan na saya ed saray papatumbok to? Imbaga nen Jesus: “Wala ak ed sikayo ed amin ya agew anggad kaunoran a parte na sistema na mundo.” Ag-imbaga nen Jesus ya amin iramay mangipulong ed maong a balita et makapanggawa na saray milagro. Balet siansia nin tulongan ira na masanton espiritu.

Diad “loob na 40 agew” kayari na inkioli nen Jesus, sikatoy aminpigan nampanengneng ed saray disipulo to. Sikatoy nansulong na nanduruman pisikal a laman tan nampanengneng ed sikara “diad paraan a talagan nakombinse iran sikatoy mabilay,” ya imbangat to ra “nipaakar ed Panarian na Dios.”​—Gawa 1:3; 1 Corinto 15:7.

Mapatnag a wala nid Galilea iray apostol sanen imbaga nen Jesus ya ompawil irad Jerusalem. Nen sikatoy akitipon ed sikara diad syudad, inkuan to: “Agkayo ontataynan ed Jerusalem, noagta alagar yo imay insipan na Ama, ya imbagak ed sikayo; ta tuan nambautismo si Juan ed panamegley na danum, balet nabautismoan kayo ed panamegley na masanton espiritu kayari na pigaran agew manlapud natan.”​—Gawa 1:4, 5.

Kayari na satan, akinengneng lamet si Jesus ed saray apostol to. Inyakar to ra “anggad Betania,” a walad bandad bukig na Palandey na Saray Olibo. (Lucas 24:50) Anggaman amayamay lay imbaga nen Jesus ed sikara nipaakar ed iyalis to, siansia nin panisiaan da a say Panarian to et niletneg diad dalin.​—Lucas 22:16, 18, 30; Juan 14:2, 3.

Tinepet na saray apostol ed si Jesus: “Katawan, ipawil mo ta so panarian na Israel diad sayan panaon?” Say simplin ebat to et: “Agyo nakaukolan ya amtaen iray panaon odino tiempo a wala labat ed pakauley na Ama.” Insan, indanet to lamet so kimey a nepeg dan gawaen, a kuan to: “Makaawat kayo na pakayari sano onsabi ed sikayo so masanton espiritu, tan mantasi kayo nipaakar ed siak diad Jerusalem, diad interon Judea tan Samaria, tan diad sankaarawian a pasen na dalin.”​—Gawa 1:6-8.

Si Jesus tan saray apostol et walad Palandey na Saray Olibo sanen sikatoy ginmapon tinmagey a paonlad tawen. Ag-abayag et sikatoy sinaniban na lurem kanian agda la anengneng. Kayari na samay inkioli nen Jesus, sikatoy nansulong na nanduruman pisikal a laman. Balet natan et nilakseb nen Jesus so akasulong ed sikaton pisikal a laman, tan sinmegep ed tawen bilang sakey ya espiritu. (1 Corinto 15:44, 50; 1 Pedro 3:18) Legan ya akanengneng ed sikato iray matoor ya apostol to, “walay duaran lalaki ya akakawes na amputi” ya inmalagey ed abay da. Saraya et anghel a nansulong na laman na too, a nantepet: “Lalakin taga Galilea, akin et akatangay kayod tawen? Sayan Jesus ya inawat ed tawen et onsabi lanlamang a singa ed impakanengneng yon insegep tod tawen.”​—Gawa 1:10, 11.

Aliwan maparungtal so intaynan nen Jesus ed dalin, a say akaimaton labat et saray matoor ya  papatumbok to. Sikatoy ompawil ed ontan met a paraan​—ya aliwan maparungtal, tan saray matoor labat ya papatumbok to so makatebek ed kiwawala to bilang manuley ed Panarian.

Saray apostol et pinmawil ed Jerusalem. Diad sinmublay iran agew, nantitipon ira a kaibay arum nin disipulo, pati “si Maria ya ina nen Jesus tan saray agagi to.” (Gawa 1:14) Nantultuloy iran nampikasi. Say sakey ya impikasi ra et say pampili na disipulon kasalat nen Judas Iscariote pian nipawil so bilang na saray apostol a 12. (Mateo 19:28) Say labay dan napili et samay disipulon akaimaton ed saray ginawa nen Jesus tan say inkioli to. Pian naamtaan da no antoy linawa na Dios, nampapalaranan ira, tan saya so unor lan asalambit ed Biblia ya impanpapalaranan. (Salmo 109:8; Proverbio 16:33) Say apili et si Matias, a nayarin sakey ed saramay 70 ya imbaki nen Jesus, tan “sikato so niarum ed 11 ya apostol.”​—Gawa 1:26.

Samploran agew kayarin sinmegep si Jesus ed tawen, sinelebraan so Piesta na Pentecostes nen 33 C.E. Nantitipon so manga 120 disipulo diad tagey a kuarto ed Jerusalem. Kabekta et inmungol so interon loob na abung a singa sakey a maksil a siplog na dagem. Insan akanengneng ira na diladila a singa apoy, a dinmapo ed kada sakey ed saramay wadman. Amin a disipulo et ginmapon nansalita na nanduruman lenguahe. Saya la may insipan nen Jesus a pangikalbo toy masanton espiritu!​—Juan 14:26.