SEKSION 9
Dayewen si Jehova Bilang Pamilya
“Dayewen yo imay Sakey a nanggawa ed tawen tan dalin.”—Apocalipsis 14:7
Singa naaralan tayod sayan brosyur, dakel iray prinsipyod Biblia ya makatulong ed sika tan ed pamilyam. Labay nen Jehova ya maliket kayo. Impormisa to ya no iyuna yo so pandayew ed sikato, “amin a bengatla so niarum ed sikayo.” (Mateo 6:33) Labalabay to kayon nakaaro. Kanian gawa yoy anggaay nayarian yon pabiskegen so pikakaaro yod sikato. Aya so sankaabigan a pribilehyo na too.—Mateo 22:37, 38.
1 PABISKEG MOY RELASYON MOD SI JEHOVA
NO ANTOY KUAN NA BIBLIA: “‘Siak so magmaliw ya ama yo, tan sikayo so magmaliw ya ananak kon lalaki tan bibii,’ so kuan nen Jehova.” (2 Corinto 6:18) Labay na Dios ya magmaliw kan maapit a kaaro to. Pian nagawaan itan, kaukolan moy manpikasi. Iimbitaan ka nen Jehova ya ‘mantultuloy a manpikasi ed sikato.’ (1 Tesalonica 5:17) Sikatoy maliket ya ondengel ed saray iisipen tan panaaburidoan mo. (Filipos 4:6) No manpikasi ka kaibay pamilyam, nanengneng da ya tudtuad sika so Dios.
Likud ed pitongtong ed Dios, kaukolan mo met so ondengel ed sikato. Nagawaan mo ya diad panaral ed Salita to tan based Biblia iran publikasyon. (Salmo 1:1, 2) Nonot mon maong iray nanaaralan mo. (Salmo 77:11, 12) Kaibad idengel mod Dios so regular ya iyatendid pantitipon na saray Kristiano.—Salmo 122:1-4.
Ibagad arum so tungkol ed si Jehova. Sakey ni yan importantin paraan pian napabiskeg moy relasyon mod sikato. No lanang mo yan gagawaen, mas napaapit kad sikato.—Mateo 28:19, 20.
NO ANTOY NAYARIM A GAWAEN:
-
Mangi-set kay oras kada agew ya basaen so Biblia tan manpikasi
-
Bilang pamilya, iyuna yo ray espiritual a kimey imbes ya say panagrelaks
2 GAWAM YA MALIKET SO PANAGDAYEW NA PAMILYA YO
NO ANTOY KUAN NA BIBLIA: “Onapit kayo ed Dios, tan sikatoy onapit ed sikayo.” (Santiago 4:8) Kaukolan mon iyeskedyul tan tumboken so regular ya programa na panagdayew na pamilya yo. a (Genesis 18:19) Balet aliwan satan labat. Diad inagew-agew, kaukolan ya kaibad bilay yo so Dios. Pabiskeg moy relasyon na pamilyam ed Dios diad pangitongtong tungkol ed sikato “sano akayurong kad abung mo tan sano manaakar ka ed dalan tan sano akarukol ka tan sano ombangon ka.” (Deuteronomio 6:6, 7) Alig moy Josue, ya angibagan: “Parad siak tan say pamilyak, manlingkor kami ed si Jehova.”—Josue 24:15, NW.
NO ANTOY NAYARIM A GAWAEN:
-
Manggawa na regular ya programa na panagbangat tan nonotey kaukolan na kada membro na pamilyam
[Paimano ed leksab 30]
a Saray Tasi nen Jehova et sinimban mangi-iskedyul na oras pian saniiba ran sankapamilya ya mandayew ed Dios tan maliket dan pantotongtongan iray espiritual ya topic.
