1. Deskribien so ermen nen Marta tan say sengegan na satan.

SINGA sankanengneng ni nen Marta imay angiponponan ed agi to​—diad sakey ya ungib ya asaraan na baleg a bato. Ngalngali agto la nayarian so belat na liknaan to lapud graben ermen. Agmakapanisia ya naandi lay inad-aro ton si Lazaro. Apat agew ni labat so linmabas sanen nauyos so linawa to, balet singa la itan andukdukey ya panaon na ermen tan impangasikasod saray akiambegya.

2, 3. (a) Antoy nayarin alikna nen Marta sanen anengneng toy Jesus? (b) Antoy nibaga tayon kualidad nen Marta base ed samay importantin imbalikas to?

² Tan natan et abalitaan nen Marta ya onsasabi lay pinabpablin kaaro nen Lazaro, si Jesus, tan asingger lad Betania. Anganko kanengneng tod si Jesus, lalon naarumay sakit na linawa to, ta sikato so inilaloan ton alenleneg ya makapaabig ed agi to. Balet sanen akatongtong to la, anggan panon et alemewan so liknaan to. Anggano aganggano ni ra labat ya nantongtong, aligliwa lay Marta ed panangaro tan pililikna nen Jesus. Tinepetan nen Jesus si Marta pian nipokus toy imano to ed pananisia to tan ed kiolid bilay. Diad saman ya impantongtong da, nibalikas nen Marta so sakey ed saray sankaimportantian ya imbaga to: “Manisia ak a sika so Kristo ya Anak na Dios, samay onsabi ed mundo.”​—Juan 11:27.

³ Ipapanengneng na sarayan salita ya mabisbiskeg so pananisia nen Marta! Diad tua, daiset labat so nabasad Biblia nipaakar ed sikato, balet dakel so naaralan tayo ya mamabiskeg ed pananisia tayo. Pian naamtaan tayo iratan, pawilen tayo imay sankaunaan ya salaysay na Biblia nipaakar ed si Marta.

4. Akin et nikadkaduma so pamilya da di Marta, tan antoy relasyon nen Jesus ed sayan pamilya?

⁴ Pigaran bulan antis na saya, mabilay tan maligligsa ni Lazaro. Diad saman et tatalaranan day isabi na sankaimportantian  ya bisita ra, si Jesu-Kristo. Nikadkaduma so pamilya di Lazaro, Marta, tan Maria​—anggano wala lad edad irayan sanaagi, saniiba ni ran siansia ed saksakey ya abung diad Betania. Ibabaga na arum ya researcher ya si Marta so panguloan ed sikaran talo ta sikaton lanang so manasangkaili, tan no maminsan et unonan nabibitlay ngaran to. (Juan 11:5) Agtayo amta no sinmabi panaon et angasawa ira. Basta say amta tayo et malmalet iran kaaro nen Jesus. Legay ministeryo nen Jesus ed Judea, ya ditan et sikatoy sinumpa tan binusol, diad abung da di Marta so nampundoan to. Seguradon naap-apresya ton maong so suporta na sarayan sanaagi tan say maligen ya impanayam tod abung da.

5, 6. (a) Akin et tumalikarkar si Marta ed pampaparaan tod ibisita nen Jesus? (b) Antoy ginawa nen Maria kasabi nen Jesus ed abung da?

⁵ Si Marta so mangiyuulo ed pangasikaso tan pamarawes ed saray bisita. Makulikulin bii, kanian singa mantalikarkar ya lanang. Lalo la natan ta say bisita ra et si Jesus. Namparaan na dakel ya espisyal iran putahe parad sayan importantin bisita ra, tan nayarin para met ed saray kaiba To. Nensaman et importantin maong so panagsangkaili. Kasabi na bisita, sikatoy angoban, ekalay sandalyas, tan puyokay ambalingit ya larak ed ulo to. (Basaen so Lucas 7:44-47.) Ipaparaan met a maong so naakan tan ugipan to.

⁶ Dakel so kaukolan a gawaen di Marta tan Maria diad pampaparaan dad isabi nen Jesus. Si Maria, ya ipapasen na arum ya mas maaral tan sensitibo nen say si Marta, et seguradon tinmulong met ed si atsi to diad gapo. Balet kasabi nen Jesus et yinmurong lay Maria ed salian to. Parad si Jesus, sayan imbisita to et dugarugan panaon pian makapanbangat​—tan talagan nambangat! Aliwan singa saray lider na relihyon nen panaon to, nirespeto to ray bibii tan maliket ton imbangat ed sikara so Panarian na Dios, say tema na ministeryo to. Aglabay a napalampas nen Maria iyan pankanawnawa kanian madengedengel ed si Jesus.

7, 8. Akin et mansyodot si Marta, tan antoy agto apokpokan ya imbaga?

⁷ Isip mo pay pansyodot nen Marta. Dakel ni kaukolan ton lutoen tan iparaan parad saray bisita, kanian mapagpaga, agmakareen, tan telek a telek. Say agi to balet et wadman ya akayurong tan aglabat mangiba. Kasin akakuliseng la lapud syodot to, akasibangot, tan basog-basog ni ingen? Agmet pankelawan no ontan so reaksion to ta agto sarag ya bukor so kimey.

⁸ Nen kien et agla apokpokan nen Marta so sarili to. Sinmalet ed pambabangat nen Jesus ya say kuanto et: “Katawan, anggapo labat ed sika a papaulyanan to ak nen agik a mankikimey a  bukor? Ibagam pa ed sikato a tulongan to ak.” (Luc. 10:40) Diretsaan iraman a salita. Diad arum a bersion na Biblia et oniay imbaga nen Marta: “Katawan, anggapoy pibabalim . . . ?” Insan to imbagad si Jesus ya bagaan toy Maria ya mangiba.

9, 10. (a) Antoy ebat nen Jesus ed si Marta? (b) Panon tayon amta ya agkukuestionen nen Jesus so inkakuli nen Marta?

⁹ Nayarin nabigla iray manbabasay Biblia ed inyebat nen Jesus ed si Marta, tan seguradon anggan si Marta et abigla met. Oniay mauy-uyamon imbaga nen Jesus: “Marta, Marta, dakdakel so pampapagaan tan pakakaaburidoan mo. Ingen ta daiset odino sakey labat so nakaukolan. Balet si Maria et pinili toy sankaabigan a bengatla, tan ag-itan naandi ed sikato.” (Luc. 10:41, 42) Antoy labay ya ibaga nen Jesus? Kasin ibabaga to ya materyalistiko si Marta? Baliwala kasid sikato so impasyan pampaparaan nen Marta na mananam iran naakan?

¹⁰ Andi. Amta nen Jesus ya gagawaen iman nen Marta lapud panangaro. Sakey ni, ag-iisipen nen Jesus ya makapuy so pamparaan na dakel. Diad tua, antis na saya et sikatoy linmad “baleg a ponsia” ya imparaan nen Mateo parad sikato. (Luc. 5:29) Aliwan samay imparaan sirin nen Marta so isyu dia, noagta say prayuridad to. Lapud mapagpaga ed pangitarya na dakel ya putahe, alingwanan to laingen no antoy mas importante. Anto itan ey?

11, 12. Panon ya maaron sinimbawa nen Jesus si Marta?

¹¹ Isipen pa: Walad abung da di Marta so bogbogtong ya Anak na Dios pian ibangat so katuaan. Anggapo lay mas importante nen say satan, anggan say mananam a naakan. Seguradon maermen si Jesus ta pinalampas nen Marta iyan mataltalag a pankanawnawa ya napabiskeg komon so pananisia to. Anggaman ontan, agto pinilit ya ondengel. * Balet no ipibali ni nen Marta si Maria, duma lan tongtongan itan.

¹² Kanian maar-aron sinimbawa nen Jesus si Marta. Amidua to ni ingen ya binitlay ngaran to pian onkalma, tan imbaga to ya agla kaukolan ya ‘pampagaan tan panaburidoay dakel a bengatla.’ Duga lay sakey o duaran simplin putahe, lalo la no walay intaryan espiritual a ponsia. Anggapo sirin so rason pian ekalen nen Jesus so  “sankaabigan a bengatla” ya pinili nen Maria​—say paibangat ed si Jesus!

13. Antoy naaralan tayod samay imbaga nen Jesus ed si Marta?

¹³ Dakel so naaralan tayod sayan salaysay. Agtayon balot aabuloyan ya napaulyan tayoy “espiritual a pankaukolan” tayo lapud antokaman ya rason. (Mat. 5:3) Siempre, labay tayon aligey inkamaparawes tan inkakuli nen Marta. Balet, nepeg ya agtayo masyadon ‘pampapagaan tan panaaburidoan’ iray bengatlan agtanton importante, ta napaulyan tayo laingen iray talagan importante. Sano mililimog tayod saray agagi, say manunan gagala tayo et aliwan pian mangiparungoy naakan odino mangan labat, noagta pian manpapasesegan tan manginabang na espiritual a  langkap. (Basaen so Roma 1:11, 12.) Anggano simpli labat so panangan, say importante et makapanpapabiskegan tayo.

14. Akin et segurado itayon inawat nen Marta imay simbawa nen Jesus?

¹⁴ Kasin inawat nen Marta so maaron simbawa nen Jesus tan akaaral ed satan? On! Oniay imbaga nen apostol Juan sanen insulat toy agawad si Lazaro: “Inar-aro nen Jesus ira di Marta tan say yugtan ton bii tan si Lazaro.” (Juan 11:5) Pigaran bulan lay linmabas manlapu lad samay imbisita nen Jesus ed Betania. Mapatnag ya agnanem-em na sakit na linawa si Marta; agnansinti ed si Jesus. Imbes, impapuso toy maaron simbawa to. Diad saya et maabig ya alimbawa so impanengneng nen Marta, ta siopad sikatayo so agmankaukolay panangipetek sagpaminsan?

15, 16. (a) Antoy seguradon ginawa nen Marta sanen nansakit si Lazaro? (b) Akin et adismaya si Marta tan Maria?

¹⁵ Sanen nansakit si Lazaro, seguradon inasikason maong nen Marta. Ginawa toy anggaay nayarian to pian anggan panon et nainawaan tan onabig so agi to. Anggaman ontan, linmoor so sakit nen Lazaro. Sikatoy agpinaulyanan na saray agagi to, wadtan iran lanang ed abay to ya mangasikaso. Imadyin mo pay Marta ya sankanengneng ton naynay so pakaskasin lupa nen agi to, tan sankanonot to ray linmalabas ya taon ya diad liket tan ermen et sankakaiba ira.

¹⁶ Sanen singa aglan talaga onabig si Lazaro, walay imbaki di Marta tan Maria ya mangipasabid si Jesus ed sayan balita. Diad saman et manpupulong si Jesus ed lugar ya manga duay agew nin akaren paonlad Betania. Oniay antikey ya mensahe rad sikato: “Katawan, nengneng mo! samay pinabpablim a kaaro et mansasakit.” (Juan 11:1, 3) Amta ran inar-aro nen Jesus si Lazaro, tan matalek iran gawaen toy anggaay nayarian ton tulongan iyan kaaro to. Kasin inilaloan da ya onsabin tampol si Jesus pian nasambot ni bilay na agi ra? No on, seguradon adismaya ira. Inatey si Lazaro.

17. Akin et mankelaw si Marta, tan antoy reaksion to nen abalitaan ton asingger lay Jesus ed baley da?

¹⁷ Agaylay ermen di Marta tan Maria! Imparaan day ponpon nen Lazaro tan inasikaso day dakel ya bisitan tagad sikara tan nanlapu nid arum ya lugar. Balet anggapo nin siansiay balitad si Jesus. Seguradon mankelaw lay Marta akin et agni sinmabi. Nen apat agew lan inatey si Lazaro, abalitaan nen Marta ya asingger lay Jesus ed baley da. Anggano ontan lay paneermen to, nanapuran  inmabet ed si Jesus tan agto la imbagad si Maria.​—Basaen so Juan 11:18-20.

18, 19. Anton ilalo so panisiaan nen Marta, tan akin et makapadinayew so pananisia to?

¹⁸ Kanengneng nen Marta ed Katawan to, imbesngaw to so pigay agew lan pakakagonigonan dan dua nen Maria: “Katawan, no wadia ka labat, agkomon inatey so agik.” Balet, siansian agnaekalan na ilalo tan pananisia si Marta. Oniay imbaga to: “Balet natan et amtak ya anggan panon karakel so kerewen mo ed Dios, iter iratan ed sika na Dios.” Oniay tampol ya inyebat nen Jesus pian ombiskeg so pananisia to: “Say agim et onoli.”​—Juan 11:21-23.

¹⁹ Say abaloan nen Marta ya tutukoyen nen Jesus et say kioli ed arapen, kanian imbaga to: “Amtak a sikatoy onoli diad kaunoran ya agew.” (Juan 11:24) Makapadinayew so pananisia nen Marta ed ilalon kioli. Nensaman, wala ray Judion lider na relihyon  ya tatawagen a Saduceo ya mangibabagan anggapo tay kiolid bilay, anggano malinlinew itan ya ibabangat na Salitay Dios. (Dan. 12:13; Mar. 12:18) Amta balet nen Marta ya imbangat nen Jesus so ilalon kioli tan Sikatoy amaoli ni ingen na inaatey. Balet duma yay si Lazaro ta apat agew lan inatey. Ag-amta nen Marta no antoy nagawa.

20. Ipaliwawa imay agnalinglingwanan ya imbaga nen Jesus ya akarekord ed Juan 11:25-27 tan samay ebat nen Marta.

²⁰ Oniay agnalinglingwanan ya imbaga nen Jesus: “Siak so kioli tan say bilay.” On, inikdan nen Jehova so Anak to na pakayari pian bilayen iray inaatey ed interon mundo diad arapen. Tinepetan nen Jesus si Marta: “Manisia ka ed saya?” Say ebat to et samay walad gapo na sayan kapitulo. Panisiaan to ya si Jesus so Kristo odino Mesias, say Anak nen Jehova, tan say impasakbay na saray propeta ya onsabid mundo.​—Juan 5:28, 29; basaen so Juan 11:25-27.

21, 22. (a) Panon ya impanengneng nen Jesus so pililikna tod saramay maneermen? (b) Deskribien so inkioli nen Lazaro.

²¹ Kasin papablien nen Jehova tan say Anak ton si Jesu-Kristo so pananisia ya singa impanengneng nen Marta? Satan ya tepet et ebatan na saramay sinmublay ya agawa ya anengneng nen Marta. Pinawil ton tampol si Maria. Anengneng nen Marta so ermen ed mata nen Jesus sanen katongtong to lay Maria tan arum ni ran wadman ya miaambegya. Anengneng toy ampaipait ya pannangis nen Katawan to ed impatey na kaaro To. Tan nadngel toy ganggan nen Jesus ya ekalen so bato ya akasara ed lubok nen agi to.​—Juan 11:28-39.

²² Realistiko labat si Marta kanian kinmontra. Imbaga ton apat agew lan inatey si Lazaro tan ambanget la. Impanonot nen Jesus ed sikato: “Agta imbagak ed sika a no manisia ka et nanengneng moy gloria na Dios?” Sikatoy anisia, tan talagan anengneng to so gloria nen Jehova! Diad saman a mismon oras, inikdan na Dios na pakayari so Anak to pian bilayen si Lazaro. Nonoten pa ray agawgawad saman ya bekta ya tinmatak ed isip nen Marta legay bilay to: Say intawag nen Jesus ya, “Lazaro, paway ka!”; say ungol manlapud ungib sanen binmangon tan pinmaway si Lazaro ya apotipotan ni na abel; say ganggan nen Jesus ya “ukbaran yo tan paulyan yo”; tan siempre, say malmalet ya lakapan dan sanaagi. (Basaen so Juan 11:40-44.) Aminpinsan ya nakal so ermen ed puso nen Marta!

23. Antoy labay nen Jehova tan Jesus ya iter ed sika, tan antoy nepeg mon gawaen?

²³ Ipapanengneng na saya a say kioli na saray inatey et aliwan  kugkugip; ibabangat itan na Biblia tan talagan agawa nensaman. (Job 14:14, 15) Labalabay nen Jehova tan na Anak to ya tumangan so pananisia tayo, no panon ya tinumangan day pananisia di Marta, Maria, tan Lazaro. Naawat mo met itan ya tumang no pabiskegen moy pananisiam.

24. Antoy sampot ya nabasad Biblia nipaakar ed si Marta?

²⁴ Say sampot ya pakabasaan ed Biblia nipaakar ed si Marta et diad samay unor lan simba nen Jesus ed dalin. Amta nen Jesus ya magano lay panirap to, kanian tinmuloy lamet ed abung di Marta diad Betania. Manlapu ditan et sikatoy onlad Jerusalem, ya taloran kilometroy kaarawi to. Sanen mamangan si Jesus tan Lazaro ed abung nen Simon ya datin akating, oniay unor ya imbaga na rekord nipaakar ed si Marta: “Si Marta so manseserbi.”​—Juan 12:2.

25. Akin et bendisyon ed saray kongregasyon natan iray bibiin singa si Marta?

²⁵ Talagan makulikulin bii! Nen unonan binitla ed Biblia, mankikimey la; anggad samay unor lan rekord nipaakar ed sikato, mankikimey nin siansia tan gagawaen toy anggaay nayarian ton serbian so arum. Saray kongregasyon nen Kristo natan et abendisyonan met na bibiin singa si Marta​—makpel tan maiter ira, ya ipapanengneng day pananisia ra diad panseserbi dad arum. Ontan kasi intultuloy ya ginawa nen Marta? Posible. Tan maabig no ontan, ta wala ni ray subok ya dalanen to.

26. Antoy agawaan nen Marta lapud pananisia to?

²⁶ Kayari pigay agew, kaukolan ya itepel nen Marta so makapasinagem ya impatey na inar-aro ton Katawan, si Jesus. Sakey ni, saramay amatey ed si Jesus et determinado met ya mamatey ed si Lazaro, ta dakel so anisia lapud inkioli to. (Basaen so Juan 12:9-11.) Siempre, sinmabi so panaon ya impansian met lanlamang na patey irayan sanaagi. Agtayo amta no panon tan kapigan itan agawa, balet aya so segurado: say pananisia nen Marta so tinmulong kanian akapansungdo legay bilay to. Maabig sirin no aligen na saray Kristiano natan so pananisia nen Marta.