“Say panangaro ed kuarta et lamot na amin a makaderal a bengatla.”—1 Timoteo 6:10.

NO ANTOY IBABAGA NA ARUM

Say kuarta so lamot na amin a kaugsan.

NO ANTOY KUAN NA BIBLIA

“Say panangaro ed kuarta”—aliwan say mismon kuarta—so sengegan na ‘makaderal iran bengatla.’ Diad Biblia, tinukoy na mayaman ya arin si Solomon so taloran klase na makaderal iran bengatla ya mabetbet a nagagawad saray totoon mangaaro ed kuarta. Mapaga: “Say toon mayaman dakel so kayaryan to, kanyan ag makaogip lapud kapagaan to.” (Ecclesiastes 5:12, Maung a Balita) Agkontento: “Say mangaro ed pilak agnapesel ed pilak; odino say mangaro ed daakan, agnapesel ed [nanaalmo to].” (Eclesiastes 5:10) Natukson manggaway mauges: “Samay maganat ya onyaman et agmansiansian andiay kasalanan.”—Uliran 28:20, NW.

“Say kuarta et sakey a proteksion.”—Eclesiastes 7:12, NW.

NO ANTOY IBABAGA NA ARUM

Say kuarta et gawaen ton maliket tan mainaway bilay mo.

NO ANTOY KUAN NA BIBLIA

Say ilusyon ya nasaliw na kuarta so liket tan kaligenan et kabiangan na “mapalikdon pakayari na kaykayamanan.” (Marcos 4:19) Balet, siansia nin ‘say kuarta et ebatan to so amin a pankaukolan.’ (Eclesiastes 10:19) Singa bilang, nasaliw na kuarta iray bengatlan nakaukolan mo pian manbilay—singa say naakan tan tambal.—2 Tesalonica 3:12.

Ontulong met so kuarta pian nalegpet moy pamilyam. Diad tua, ibabaga na Biblia: “No walay siopaman ya agto tataryaan iramay walad pudir to, tan nagkalalo la iramay membro na pamilya to, impulisay to lay pananisia.”—1 Timoteo 5:8.

‘Onyurong nin unona tan kuentaen so nagastos.’—Lucas 14:28.

NO ANTOY KUAN NA BIBLIA

Usaren so kuarta diad paraan ya aabobonan na Dios. (Lucas 16:9) Makabat no usaren so kuarta ed responsable tan matuan paraan. (Hebreos 13:18) Pian napaliisay pakabelatan lapud sobran panaggastos, ‘agkomon napatnagan ed panagbilay mo so panangaro ed kuarta.’—Hebreos 13:5.

Anggaman ag-ibabaga na Biblia ya mauges so onutang, oniay ipapasakbay to: “Say akautang sikato so aripen ed amautang.” (Uliran 22:7) Paliisay pansaliw ya ag-implano, lapud “amin iramay magangganat et seguradon mansumpal ed kairapan.” (Uliran 21:5, NW) Imbes, ‘mangibiig unong ed nasarag mo’ tan mantipon kay kuarta parad bengatlan importantid sika.—1 Corinto 16:2.

Papasesegen itayo na Biblia ya ‘iyugali so mangiter.’ (Lucas 6:38) Saray totoon malabay a mamaliket ed Dios et walaay maabig a rason a magmaliw ya maiter, ta “aaroen na Dios so maliket a mangiiter.” (2 Corinto 9:7) Kanian, “agyo lilingwanan so panggawa na maabig tan say panginabang na saray bengatla ed arum, ta diad panamegley na saratan a bagat et napapaliket a maong so Dios.”—Hebreos 13:16.