PRINSIPYOD BIBLIA: “Say panangasawa et nepeg a galangen na amin a totoo, tan ag-itan komon narutakan.”—Hebreos 13:4.

SARAY GUNGGONA: Parad arum, agla uso iratan ya salita. Balet alingo-lingo ra! Anggad natan et ansakisakit nin siansia so epekto na agpanmatoor na asawa, a singa nen panaon ya insulat so Biblia.—Uliran 6:34, 35.

Oniay imbaga nen Jessie, sakey ya asawa tan ama: “Lapud matoor ak ed asawak, mabiskeg so relasyon mi tan maliket kami. Importantin talaga so talek ed sanasawa. Deralen na agpanmatoor itan a talek”—puera ni ray epekto na satan ed ananak!

Impeligro nen Ligaya * so relasyon dan sanasawa. “Imoral iray datin kakaarok,” so kuan to. “Kanian lanang ak ed saray videoke bar ya mabetbet min nasabi palbangon, anggad wala ray nagmaliw ya karelasyon ko.” Maliket kasid bilay to? Mabetbet so kolkolan dan sanasawa tan miserable bilay to. Imbaga to ni: “Nen inisip ko ray kababaingan ya ginawak, atalosan ko ya duga ray atateng ko ya, ‘Say piulop ed mauges et maneral ed maong iran ugali.’”—1 Corinto 15:33.

Onia ni imbaga nen Ligaya: “Antis nin onloor so situasyon, nandesisyon ak ya itunda lay aliwan gagawaen ko tan nanaral ak na Biblia—natan et talagan tutumboken ko la itan.” Antoy resulta? Naayos so relasyon dan sanasawa, maomaong lad sikato tan rerespetoen la na asawa to. “Inuman na Biblia so bilay ko tan agko pagbabawian ya tinaynan koy datin kabibilay ko tan kakaarok,” so kuan to.