NEN Sabado, Abril 25, 2015, walay agawan yegyeg ya 7.8 so magnitude to diad Nepal, sakey ya mapalandey ya bansa a walad bandad norte na India. Tinmama iya ed sakey a lugar diad bandad northwest ya manga 80 kilometro so kaarawi to ed Kathmandu, say capital na Nepal. Masulok ya 8,500 so inatey, saya lay sankarakelan ya inatey diad Nepal lapud kalamidad. Masulok ya kapalduan milyon ya abung so aderal. Walay 2,200 ya Tasi nen Jehova diad Nepal, tan maslak et manaayam ed apektadon lugar. Makapaermen ta sakey ya Tasi tan duaran anak to so inatey.

“Agawa so yegyeg legan na aral na saray kongregasyon ya walad apektadon maong ya lugar,” so imbaga na Tasi ya si Michelle. “No agawa iya ya walad abung so maslak ed sikami, seguradon dakel so inatey.” Akin et akaligtas iramay inmatendi ed saray aral? Baleg so agawaan na desinyo na Kingdom Hall.

Saray balon Kingdom Hall ed Nepal et denesinyo ya matibay ed yegyeg. Oniay imbaga nen Man Bahadur, sakey ed saray kaiba ed pampapaalagey na Kingdom Hall: “Lanang kamin tetepetan no akin ya ontan la katibay so pundasyon na saray ipapaalagey mi anta melag met labat iratan. Anengneng mi natan so kamaongan na satan!” Kayari na yegyeg, ginawa ya temporaryon ayaman iray Kingdom Hall. Anggano wala ray aftershock, saray Tasi nen Jehova pati saray kakaabay da et mareen so liknaan da ditan.

Tampol ya inanap na saray Kristianon elder iray membro na kongregasyon ya agni amta so agawad sikara. “Inyuna na saray elder so pankaabigan na kongregasyon nen say sarili da,” so imbaga na Tasi ya si Babita. “Makakaakis kami ed impanengneng dan aro.” Diad tinmumbok ya agew kayari na yegyeg, say taloran membro na komite ya mangaasikaso ed kimey na Saray Tasi nen Jehova ed Nepal, kaiba iray ombiabiahen manangasikaso odino saray manangasikaso na sirkito, et binmisita ed saray kongregasyon pian naamtaan da no anto ray pankaukolan tan nasuportaan da iray elder ed kongregasyon.

Anemiran agew kayari yegyeg, si Gary Breaux, ya nanlapud world headquarters na Saray Tasi diad United States, et binmisita ed Nepal kaibay asawa ton si Ruby. Oniay imbaga nen Reuben, sakey ya membro na komite ya abitla niman: “Lapud maguloy situasyon ed Kathmandu tan wala ray aftershock, agkami segurado no makasabi ni Brother Breaux. Pero determinadon onla dia—tan akasabi! Talagan naapresya iman na saray Tasi diad lugar mi.”

Oniay imbaga nen Silas, ya mantratrabahod opisina na Saray Tasi ed Nepal: “Nen nipawil so linya na telepono, agla manunday ontatawag, agew tan labi! Mapagan maong ed sikami iray kapara min Tasi diad interon mundo. Anggano say arum et agmi natalosan so ibabaga ra lapud dumay lenguahe da, sankalikna min inaro da kami tan labalabay da kamin tulongan.”

 Kayari na yegyeg, diad loob na dakel ya agew, wala ray Tasi ya angawit na saray naakan diad Kingdom Hall parad saray mankaukolan. Ontan met, walay binuo ya Disaster Relief Committee, tan sinmasabi iray suplay, maslak et nanlapud Bangladesh, India, tan Japan. Kayari pigaran agew, sinmabi so medical team na Saray Tasi manlapud Europe tan sakey ed saray Kingdom Hall so manunan inusar da parad serbisyo da. Tampol iran nantrabaho, balet agda labat ineksamin so pisikal ya kondisyon na saray biktima na yegyeg noagta tinulongan da met ira ya arapen so trauma ya epekto na yegyeg.

Imbalikas na sakey ya biin si Uttara so nalilikna na dakel: “Grabe tan makapataktakot iman ya yegyeg. Pero kayari na saman, mas inmasingger so liknaan mid saray kaagian mi.” On, agpinakapuy na yegyeg so panangaro na saray lingkor nen Jehova ed sikato tan ed sakey tan sakey. Imbes, binmiskeg itan ya panangaro.