PARAD SARAY KABATAAN
9: Inkatoo
NO ANTOY LABAY YA IBAGA NA SATAN
Nabirbir no siopa ka aliwa labat ya diad ngaran tan itsuram. Kaiba met ed satan iray prinsipyom, papanisiaan mo, tan ugalim. Kanian, say inkatoom et no siopa ka ed loob tan paway.
NO AKIN YA IMPORTANTE
No talagan kabat moy sarilim, sarag mon panindigan iray papanisiaan mo tan agka manpakontrol ed saray kaedad mo.
“Dakel so totoo ya singa manikin ya aka-displey. Aliwan sikara so manpipili na kawes da, noagta say arum.”—Adrian.
“Naaralan kon panindigan no antoy duga anggano mairap. Amtak no siopa ray tuan kakaarok diad saray kiwas da tan no antoy kiwas ko no kaibak ira.”—Courtney.
PRINSIPYO ED BIBLIA: “Agkayo la manpapaimpluensya ed sayan sistema na mundo, noagta manpasimbalo kayo diad panguman yo ed panagnonot yo.”—Roma 12:2.
NO ANTOY NAYARIN GAWAEN MO
Dapat ya naamtaan mo la natan no siopa ka tan no antoy labay mon pagmaliwan. Nagawaan mo itan no amtaen mo ray maong ya ugalim tan abilidad mo, saray kakapuyan, tan papanisiaan mo. Balibalin igapo iya diad pangebat ed sarayan tepet.
Maong ya ugalim tan abilidad mo: Anto ray talentok tan abilidad ko? Anto ray maong ya ugalik? (Singa bilang: Kasin wala ak ed oras? walay kontrol kod sarilik? makuli ak? maiter ak?) Anto ray maong ya gagawaen ko?
SUHESTION: Kasin nanairapan kan isipen no anto ray maong ya agawaan mo o imbagam? Tepetan moy ateng mo odino napanmatalkan ya kaarom no anto ray positibon nanenengneng dad sika tan akin.
PRINSIPYO ED BIBLIA: “Usisaen komon na kada sakey so gagawaen to, tan kayari na satan et sikatoy nawalaay rason a manliket nipaakar ed sarili to labat, aliwan diad pangikokompara toy sarili to ed arum.”—Galacia 6:4.
Kakapuyan: Anto ray kaukolan kon umanen ed personalidad ko? Kapigan ak mas natutukson manggaway aliwa? Anto ray situasyon ya mas kaukolan kon kontrolen so sarilik?
PRINSIPYO ED BIBLIA: “No ibaga tayon, ‘Anggapoy kasalanan tayo,’ papalikdoen tayoy sarili tayo.”—1 Juan 1:8.
Papanisiaan: Anton estandarte ed moral so tutumboken ko, tan akin? Kasin manisia ak ed Dios? Anto ran ebidensya so akakombinse ed siak ya walay Dios? Anto ran kagagawa so ipapasen kon aliwan patas, tan akin? Antoy papanisiaan ko ya nagawad arapen?
PRINSIPYO ED BIBLIA: “Say abilidad a mannonot so manbantay ed sika, tan say pakatebek so manprotekta ed sika.”—Proverbio 2:11.
Ompan Nagustoan Mo Met
EBAT ED 10 TEPET NA SARAY KABATAAN
Siopa Ak?
No antam iray abilidad, limitasyon, tan saray planom ed bilay, makapandesisyon kay duga anggano wala ray man-pressure ed sika.
TEPET NA SARAY KABATAAN
Panon Ak ya Manpili na Maong ya Alimbawa?
No walay maong ya alimbawan aligen mo, ontulong itan pian naiwasan mo ray problema, nagawaan moy goal mo, tan nawalaan kay maliket ya bilay. Pero siopay dapat mon aligen?
