No Akin ya Importantin Antam so Ebat
Akin et importantin naamtaan no kasin walay Amalsa? No akombinse ka na saramay ebidensya ya talagan walay makapanyarin Dios, nayarin labay mo met ya aralen iray ebidensya ya say Biblia et nanlapud sikato. No pantiwalaan moy ibabaga na Biblia, nagunggonaan ka ed sarayan nanduruman paraan.
Mas na-enjoy moy bilay
SAY IBABAGA NA BIBLIA: ‘Say Dios et maong so ginawa to, ya iikdan to kayoy uran manlapud tawen tan mabunga iran panaon, a pepeneken to kayoy naakan tan paliliketen toy kapusoan yo.’—Gawa 14:17.
SAY LABAY TON IBAGA: Saray amin ya pani-enjoyan mod mundo et regalo na Amalsa. Mas naapresyam irayan regalo no naamtaan mo no panon kan aasikasoen na samay angiter ed saratan.
Makaanap kay maong ya bilin
SAY IBABAGA NA BIBLIA: “Natalosan mo no antoy matunong tan maptek tan patas, say interon dalan na kamaongan.”—Proverbio 2:9.
SAY LABAY TON IBAGA: Lapud say Dios so amalsa ed sika, amta to no panon kan magmaliw ya maliket. No basaen moy Biblia, dakel so naaralan mo ya makatulong ed bilay mo.
Naebatan iray tepet mo
SAY IBABAGA NA BIBLIA: “Naromog moy kakabatan nipaakar ed Dios.”—Proverbio 2:5.
SAY LABAY TON IBAGA: Say pakaamta ya walay Amalsa so ontulong ed sikan naanap iray ebat ed importante iran tepet singa say: Antoy gagala na bilay? Akin et maniirap tayo? Antoy nagawa ed sikatayo no ompatey tayo? Naanap mo iray makaligliwan ebat diad Biblia.
Nawalaan kay pag-asa ed arapen
SAY IBABAGA NA BIBLIA: “‘Amtak iray bengatlan nononoten ko parad sikayo,’ so imbaga nen Jehova, ‘say kareenan, tan aliwan say kadederal, pian ikdan ta kayoy maong ya arapen tan ilalo.’”—Jeremias 29:11.
SAY LABAY TON IBAGA: Impromisa na Dios ya diad arapen et ekalen to so kaugsan, kairapan, tan ipapatey. No pantiwalaan mo iray promisa na Dios, mas nasarag mo iray problemam diad inagew-agew.
Ompan Nagustoan Mo Met
ONLIING!
Say Dalan na Maliket ya Kabibilay—Gagala na Bilay
Say pangamta ed saray ebat ed importante iran tepet ed bilay et makatulong pian magmaliw itayon maliket.
