No Antoy Tua Nipaakar ed Dios tan say Kristo

I-PLAY

Anggaman dakdakel so dadayewen na totoo ya dirios, saksakey labat so tuan Dios. (Juan 17:3) Sikato so “Sankatagyan a Dios,” sikato so Amalsa ed amin a bengatla tan Subol na bilay. Sikato labat so makanepegan ed panagdayew tayo.—Daniel 7:18; Apocalipsis 4:11.

Siopa so Dios?

Nabasa so ngaran na Dios diad orihinal ya sulsulat MANGA 7,000 BESES

JEHOVA so ngaran na Dios

KATAWAN, DIOS, AMA—Arum ed saray titulo nen Jehova

Antoy Ngaran na Dios? Imbagan mismo na Dios: “Siak si Jehova. Saya so ngaran ko.” (Isaias 42:8) Say personal a ngaran na Dios et manga 7,000 beses ya nabasa ed Biblia. Balet, diad dakel a patalos na Biblia et inekal so ngaran na Dios tan sinalatan na titulo, singa say “Katawan.” Labay kan nakaaro na Dios, kanian papasesegen to kan ‘ontawag ed ngaran to.’—Salmo 105:1.

Saray Titulo nen Jehova. Diad Biblia, tinukoy si Jehova ed saray titulo ya “Dios,” “Makapanyarin-amin,” “Amalsa,” “Ama,” “Katawan,” tan “Soberano.” Diad dakel ya pikakasi ya nabasa ed Biblia, tinukoy si Jehova ed titulo to tan personal a ngaran to ya Jehova.—Daniel 9:4.

Anton Klase na Persona so Dios? Say Dios et espiritu kanian agnanengneng. (Juan 4:24) Imbaga na Biblia ya “anggapoy toon akanengneng ed Dios.” (Juan 1:18) Ipapaamta na Biblia ya walay liknaan to. Saray gagawaen na totoo et nayarin makapaermen ed sikato, odino nayarin “makapaliket ed sikato.”—Proverbio 11:20; Salmo 78:40, 41.

Saray Balibalin Kualidad na Dios. Anggapoy toon lalabien na Dios, antokaman so bansa o binalegan to. (Gawa 10:34, 35) Ontan met, say Dios et “mapangasi tan maabagey, matantan a manpasnok tan abalbaleg ed matoor a panangaro tan katuaan.” (Exodo 34:6, 7) Balet, walay apatiran kualidad na Dios ya talagan makapadinayew.

Pakapanyari. Sikato so “Dios a Makapanyarin-amin” kanian anggapoy limitasyon na pakayari ton sumpalen iray impromisa to.—Genesis 17:1.

Karunongan. Anggapoy makapipara ed karunongan na Dios. Ontan so labay ya ibaga na Biblia nen imbaga na satan ya “sikato labat so marunong.”—Roma 16:27.

Hustisya. Lanang ya gagawaen na Dios no antoy duga. Saray gagawaen to et “ayadyari” tan “agbalot manggaway ag-inkahustisya.”—Deuteronomio 32:4.

Aro. Ibabaga na Biblia ya “say Dios et aro.” (1 Juan 4:8) Aglabat ipapanengneng na Dios so panangaro—sikato so perpekton alimbawa na aro. Amin ya gagawaen to et lapud balbaleg ya panangaro to, tan lapud satan et minanabang tayo diad dakel ya paraan.

Say Pikakaaro na Dios ed Saray Totoo. Say Dios et maaron Ama tayo a walad tawen. (Mateo 6:9) No ipanengneng tayoy pananisia ed sikato, magmaliw itayon kakaaro to. (Salmo 25:14) Diad tua, labay na Dios ya onasingger ka ed sikato panamegley na pikakasi tan ‘ipaawit mod sikato so amin a kapagaan mo, lapud iyaansakit to ka.’—1 Pedro 5:7; Santiago 4:8.

Antoy Pandumaan na Dios tan say Kristo?

Aliwan Dios si Jesus. Espisyal si Jesus—sikato labat so direktan pinalsa na Dios. Kanian sikatoy tinawag na Biblia ya Anak na Dios. (Juan 20:31) Kayarin pinalsa nen Jehova si Jesus, inusar to iyan panguloan ya anak to bilang “marundunong a komikimey” pian gawaen so amin a bengatla tan say too.—Proverbio 8:30, 31; Colosas 1:15, 16.

Agbalot imbaga nen Jesu-Kristo ya sikato so Dios. Imbes, impaliwawa to: “Siak so mangirerepresenta ed [Dios], tan sikato so angibaki ed siak.” (Juan 7:29) Legan ya mitotongtong ed sakey ya disipulo to, tinukoy nen Jesus si Jehova ya “Amak tan Ama yo” tan “Dios ko tan Dios yo.” (Juan 20:17) Nen inatey si Jesus, sikatoy pinaoli nen Jehova diad tawen tan inikdan To na pakauley diad nikawanan To.—Mateo 28:18; Gawa 2:32, 33.

Natulongan Ka nen Jesu-Kristo ya Onapit ed Dios

Linma diad dalin si Jesus pian ibangat ed sikatayo so nipaakar ed Ama to. Oniay imbagan mismo nen Jehova nipaakar ed si Jesus: “Saya so Ana’ko, say inad-arok. Dengel kayod sikato.” (Marcos 9:7) Anggapo lay arum ya mas makapikabat ed Dios nen si Jesus. Oniay imbaga to: “Anggapo . . . so makapikabat no siopa so Ama noag say Anak tan say siopaman a labay a pangipaamtaan na Anak.”—Lucas 10:22.

Perpekton impanengneng nen Jesus iray kualidad na Dios. Inalig ya maong nen Jesus iray kualidad na Ama to kanian nibaga to: “Siopaman ya akanengneng ed siak et anengneng to met lay Ama.” (Juan 14:9) Impanengneng nen Jesus so panangaro na Ama to diad saray ibabaga tan gagawaen to, kanian atulongan to ray totoo ya onapit ed Dios. Imbaga to: “Siak so dalan tan say katuaan tan say bilay. Anggapoy makasabi ed Ama no aliwan diad panamegley ko.” (Juan 14:6) Imbaga to met: “Saray mandadayew ed Ama et mandayew ed sikato diad espiritu tan katuaan, ta diad tua et ontan iray aanapen na Ama a mandayew ed sikato.” (Juan 4:23) Isip mo pa! Aanapen nen Jehova iray totoon singa sika ya labay dan naamtaan so katuaan nipaakar ed sikato.