Duga tan Aliwa: Say Biblia—Napantiwalaan ya Giya
Agtayo segurado ya maong so pansumpalan na desisyon tayo no imbase tayo labat itan ed nalilikna tayo tan ed nalilikna na arum. Ibabaga na Biblia so rason, balet aliwan satan labat. Naamtaan tayo met ditan no antoy duga tan aliwa ya makatulong pian magmaliw ya maliket so bilay tayo.
KAUKOLAN TAYOY PANANGIGIYA NA DIOS
Ibabaga na Biblia ya pinalsa nen Jehova a ya Dios so too ya kailangan toy panangigiya To, aliwan say too so mangigiya ed sarili to. (Jeremias 10:23) Kanian inter na Dios so Biblia ya nankarga na saray prinsipyo ya mangigiya ed bilay tayo. Inar-aro to tayo kanian agto labay ya nasali tayo ni iray aliwliwan resulta na saray desisyon tayo tan agto labay ya nairapan tayo no manggawa tayo ray importantin desisyon. (Deuteronomio 5:29; 1 Juan 4:8) Aliwan satan labat, bilang Amalsa ed sikatayo, walad sikatoy karunongan tan kakabatan kanian seguradon sankaabigan ya bilin so iiter tod sikatayo. (Salmo 100:3; 104:24) Balet agton balot pipiliten so anggan siopa ya onunor ed saray estandarte to.
Inter nen Jehova ed inmunan laki tan bii, si Adan tan Eva, so amin ya kaukolan da pian magmaliw iran tuan maliket. (Genesis 1:28, 29; 2:8, 15) Iilaloan met nen Jehova ya unoren da so bilin ya inter tod sikara. Balet inabuloyan to ran mandesisyon no kasin unoren da itan odino andi. (Genesis 2:9, 16, 17) Pero makapaermen ta mas pinili nen Adan tan Eva ya unoren so labay da nen say panlabayan na Dios. (Genesis 3:6) Antoy resulta? Talaga kasin maliket so too no say unoren to et say labay to imbes ya say labay na Dios? Andi. Apatunayan tayo la ed saray agawgawa diad apalabas ya no agtayo unoren iray estandarte na Dios agtayo naliknay tuan deen tan liket.—Eclesiastes 8:9.
Mangiiter so Biblia na giya ya kaukolan tayo pian makapandesisyon tayoy duga antokaman so lahi tan kultura tayo. (2 Timoteo 3:16, 17; nengnengen so kahon ya “ Libron Parad Amin ya Totoo.”) Imanoen no panon iyan gagawaen na Biblia.
Amtaen ni arum ya rason no akin ya say Biblia et tinawag ya “salita na Dios.”—1 Tesalonica 2:13. Bantayan so video ya Siopa so Autor na Biblia? diad jw.org/pag.
IPAPAAMTA NA BIBLIA NO ANTOY LABAY NA DIOS YA GAWAEN TAYO
Nabasa tayo ed Biblia no panoy impantrato nen Jehova ed saray totoo manlapu la nensaman. Makatulong iray nabasa tayo ed Biblia pian natalosan tayo no antoy ipapasen nen Jehova ya duga tan aliwa, no antoy makagunggona tan andi. (Salmo 19:7, 11) Naaralan tayo ditan iray ag-ondadaan ya prinsipyo ya makatulong ed sikatayo pian makapandesisyon tayo na duga kada agew.
Singa bilang, amay bilin ya walad Proverbio 13:20: “Samay miuulop ed marunong et magmaliw a marunong, balet samay mililimog ed makulangkulang et aliwliway pansumpalan to.” Singa met nensaman, mausausar iyan prinsipyo anggad natan. Dakel so karga na Biblia ya praktikal tan makatulong iran prinsipyo.—Nengnengen so kahon ya “ Ag-ondadaan so Karunongan na Biblia.”
Balet ompan itepet mo, ‘Panon ak ya makaseguro ya say bilin na Biblia et mausausar ni anggad natan?’ Nabasa ed onsublay ya artikulo iray pigaran eksperiensya.
a Jehova so ngaran na Dios.—Salmo 83:18.
