Wala ray regalo ya mabli ed sikatayo lapud inter iratan na walaan na atagey ya autoridad odino sakey ya rerespetoen tayo. Say arum ya regalo balet, anggano abeba so presyo to, et talagan espisyal ta nanlapu itan ed inad-aron kapamilya odino kaaro. Ontan may regalo nen Russell ed si Jordan, ya abitla ed akaunan artikulo. Panon iyan onaplika ed regalo ya dondon?

Unona, ibabaga na Biblia ya “imbaki na Dios so bogbogtong ya Anak to diad mundo pian nagamoran tayoy bilay diad panamegley to.” (1 Juan 4:9) Satan so sakey ya rason no akin ya talagan mabmabli itan ya regalo. Anggapo lay walaan na mas atagey ya autoridad nen say Dios. Oniay insulat na Hebreon salmista nipaakar ed Dios: “Say ngaran mo et Jehova, a sika labat so Sankatagyan ed interon dalin.” (Salmo 83:18) Wala ni kasi makapangiter na regalo ya mas atagey nen say Dios?

Komadua, say Dios et “Ama” tayo. (Isaias 63:16) Panon? Nanlapud sikato so bilay tayo. Sakey ni, aasikasoen to itayon maong no panon ya aasikasoen na maaron ama so ananak to. Oniay intepet na Dios nipaakar ed saray totoo to nensaman ya tinawag ton Efraim: “Agta say Efraim et pinabpablik ya anak, tan inad-aron ugaw? . . . Kanian atenyeg so liknaan ko lapud sikato. Tan seguradon kasian ko.” (Jeremias 31:20) Ontan met so nalilikna na Dios ed saray mandadayew ed sikato natan. Sikatoy aliwa labat ya makapanyarin-amin ya Amalsa noagta matoor ya Ama tan Kaaro tayo. Agta satan so rason no akin ya mas pablien tayo so antokaman ya regalon nanlapud sikato?

Wala ray regalo ya mabli ed sikatayo ta inter iratan lapud tuan panangaro, aliwan lapud obligasyon. Say tuan maiter et agmanaalagar na kasalat ed impanengneng ton kaabigan.

Inter na Dios so Anak to parad sikatayo lapud inaro to itayo. “Diad saya et nipatnag so panangaro na Dios nipaakar ed sikatayo, ya imbaki na Dios so bogbogtong ya Anak to,” so ibabaga na Biblia. Akin et ginawa to itan? “Pian nagamoran tayoy bilay diad panamegley to.” (1 Juan 4:9) Obligado kasi so Dios ya gawaen itan? Andi! Say “dondon a binayaran nen Kristo Jesus” et pakapatnagan na “agnaparaan a kaabigan” na Dios.—Roma 3:24.

Akin ya satan ya regalo na Dios et pakapatnagan na “agnaparaan a kaabigan”? Ibabaga na Biblia: “Ipapanengneng na Dios so panangaro to ed sikatayo, ta anggano makasalanan itayo ni et inatey si Kristo parad sikatayo.” (Roma 5:8) Lapud masakripisyon aro na Dios, inter toy Anak to parad saray makapuy, pakaskasi, tan makasalanan a totoo. Agtayo itan nansagpotan, tan agtayo met itan nabayaran. Satan ya regalo na Dios so sankabalegan ya prueba na panangaro to.

Wala ray regalo ya mabli ed sikatayo lapud baleg so insakripisyo na samay angiter. No say sakey et mabulos ton inter ed sikatayo so sakey ya bengatlan importante ed sikato, talagan pablien tayo itan ya regalo lapud impansakripisyo to.

Say Dios et “inter to so bogbogtong ya Anak to.” (Juan 3:16) Wala ni kasi niiter to ya mas inaro to nen say Anak to? Diad loob na binilyon ya taon legan ya gagawaen na Dios so uniberso, kaiba toy Jesus ya nankimey tan sikato so “nagkalalon panliliketan to ed kada agew.” (Proverbio 8:30) Si Jesus so “inad-aro ton Anak” tan “kaulibay na agnanengneng a Dios.” (Colosas 1:13-15) Anggapo lay arum ya walaan na mas maapit ya relasyon nen say Dios tan si Jesus.

Balet, “say Dios et agto anggan insiblet so dilin Anak to.” (Roma 8:32) Say inter na Dios ed sikatayo et say sankaabigan ed sikato. Satan lay sankabalegan ya insakripisyo to.

Wala ray regalo ya mabli ed sikatayo lapud niiter na saratan so talagan pankaukolan tayo, lalo la no kakkaukolan tayo iratan. Singa bilang, kaukolan moy manpatambal pian nisalbay bilay mo balet agmo itan sarag ya bayaran. Seguradon pisalamatan mon maong so toon nambayar ed satan tan talagan pablien mo itan ya regalo to.

“No panon ya ompapatey so amin lapud si Adan, bilayen met so amin lapud Kristo.” (1 Corinto 15:22) Lapud ananak itayo nen Adan, amin tayo et “ompapatey,” ya agtayo natakasan so sakit tan patey tan agtayo met sarag ya ipawil so mareen a relasyon tayod Dios tan nawalaan na malinis ya konsiensia. Tan bilang makasalanan a totoo, agtayo sarag ya “bilayen” so sarili tayo odino say arum. Ipapanengneng na Biblia: “Anggapon balot ed sikara so makadondon ed agi to . . . Agdan balot nabayaran itan.” (Salmo 49:7, 8) Kakkaukolan tayoy tulong lapud agtayo sarag ya bayaran so bili na dondon. No sikatayo labat, anggapoy nagawaan tayo.

Lapud baleg a panangaro nen Jehova, mabulos ton binayaran so kaukolan tayo pian nisalba itayo, diad ontan et ‘nabilay so amin’ panamegley nen Jesus. Panon iyan nagawaan na dondon? “Lilinisan itayo na dala nen Jesus ya Anak to ed amin a kasalanan.” On, no walaan tayoy pananisia ed impaagus ya dala nen Jesus, posiblin naperdona iray kasalanan tayo tan nawalaan tayoy bilay ya andi-anggaan. (1 Juan 1:7; 5:13) Tan antoy nagawaan na dondon parad saray inaatey  ya inad-aro tayo? “No panon a say ipapatey et niwala diad panamegley na sakey a too, say kioli na saray inaatey et diad panamegley met na sakey a too [si Jesus].”—1 Corinto 15:21. *

Say dondon so sankarakepan ya regalo ya inter na sankatageyan ya autoridad. Tan anggapo lay regalo ya pakapatnagan na mas baleg ya panangaro nen say sakripisyo nen Jesus. Anggapo lay arum ya mas baleg so insakripisyo to parad sikatayo nen say si Jehova a Dios. Tan anggapo lay arum ya regalo ya mas niiter toy talagan kaukolan tayo nen say sakripisyo ya mangibulos ed sikatayo ed kasalanan tan patey. On, anggapo lay arum ya regalo ya makapipara ed bili na dondon.