Say apatiran akakabayo et singa misteryoso tan makapataktakot, balet diad tua et andi. Akin ey? Lapud ipapaliwawa na Biblia tan saray nagagawad mundo natan no anton talagay isisimbolo da. Tan anggano say ibatik da et palatandaan na iyuges na situasyon diad mundo, sinyales met itan ya walay maong a balita parad sika tan say pamilyam. Akin ey? Amtaen tayo nin unona no siopa odino anto so isisimbolo na kada akalugan ed kabayo.

Oniay gapo na eksenan anengneng nen apostol Juan: “Anengneng ko so sakey ya amputin kabayo, tan samay akakabayo ed satan et walay pana to; tan niiter ed sikato so sakey a korona, tan sikatoy linma a manatalo tan pian sumpalen so panatalo to.”—Apocalipsis 6:2.

Siopa so akalugan ed amputin kabayo? Naamtaan tayo no siopa itan dia lanlamang ed libro na Biblia ya Apocalipsis. Nabasad bandad sampot a kapitulo ya say akalugan ed amputin kabayo et “Say Salita na Dios.” (Apocalipsis 19:11-13) Say tutukoyen na satan et si Jesu-Kristo, lapud sikato so spokesman na Dios. (Juan 1:1, 14) Sakey ni, sikatoy tinawag ya “Ari na saray arari tan Katawan na saray katawan” tan “Matoor tan Matua.” (Apocalipsis 19:16) Kanian walay autoridad ton milaban tan man-ari, tan agto abusoen so pakapanyari to odino usaren itan diad mauges. Pero wala ray onlesan tepet.

Siopay angiter ed si Jesus na autoridad ya milaban? (Apocalipsis 6:2) Impanengneng na Dios ed si propeta Daniel so eksena ya say Mesias et “singa anak na too,” tan inter ed sikatoy “panuley, kagalangan, tan panarian” na “samay Akauna nen Saray Panaon,” si Jehova a Dios. * (Daniel 7:13, 14) On, say Makapanyarin-amin ya Dios so angiter ed si Jesus na autoridad tan karapatan ya manuley tan mangukom. Say amputin kabayo et dugarugan simbolo na mahustisyan piguerra na Anak na Dios, ta diad Biblia et mabetbet ya isisimbolo na kolor ya amputi so inkatunong.—Apocalipsis 3:4; 7:9, 13, 14.

Kapigan ginmapon binmatik iray akakabayo? Tandaan ya samay inmunan akakabayo, si Jesus, et linmugan nen sikatoy akoronaan. (Apocalipsis 6:2) Kapigan akoronaan si Jesus bilang Ari diad tawen? Aliwan nen kakkapawil tod tawen. Ibabaga na Biblia ya kaukolan to ni manalagar antis ya nakoronaan. (Hebreo 10:12, 13) Imbaga nen Jesus ed saray disipulo to so tanda pian naamtaan da no kapigan onggapon man-ari ed tawen. Imbaga to ya onuges so situasyon ed mundo. Wala ray nagawan guerra, eras, tan salot. (Mateo 24:3, 7; Lucas 21:10, 11) Nen ginmapoy World War I nen 1914, mapatpatnag ya atan la may impasakbay nen Jesus ya mair-irap a panaon ya diad Biblia et tatawagen ya “kaunoran iran agew.”—2 Timoteo 3:1-5.

Balet no ginmapon nan-ari si Jesus nen 1914, akin et mas inmuges so situasyon imbes ya inminawa? Ta diad satan a taon et ginmapon nan-ari si Jesus dimad tawen, aliwan diad dalin. Walay agawan guerra diad tawen, tan say balon Ari, si Jesus, ya tatawagen met a Miguel, et imbantak tod dalin si Satanas tan saray demonyo to. (Apocalipsis 12:7-9, 12) Agaylay pasnok nen Satanas ta amta ton antiktikey lay panaon to. On, asingger lan deralen na Dios si Satanas pian nagaway linawa To diad dalin. (Mateo 6:10) Amtaen tayo natan no panon ya ipapanengneng na talora nin akakabayo ya manbibilay tayo lad mair-irap ya “kaunoran iran agew.” Aliwan singa samay unonan akakabayo ya ontutukoy ed sakey ya indibidual, isisimbolo na manumtumbok ya talora iray situasyon ed mundo ya naapektoay amin ya totoo.

“Wala ni sananey a sinmabi, sakey ya ambalbalangan kabayo, tan samay akakabayo ed satan et naikday autoridad a mangekal na kareenan ed dalin pian manpapateyan ira, tan inikdan na sakey a baleg ya espada.”—Apocalipsis 6:4.

Isisimbolo na sayan akalugan ed kabayo so guerra. Ekalen toy kareenan diad interon mundo, aliwan diad pigara labat ya bansa. Nen 1914, agawa so World War I ya alanor so interon mundo. Insan agawa so World War II, ya mas grabe. Ibabaga na saray report ya say karakel na inatey lapud guerra tan panlalaban manlapu lad 1914 et masulok ya 100 milyon! Agni kaibad satan iray abaldado odino nakalay parte na laman.

Akin ya nibaga tayon nikadkaduma so inkagrabe na guerra ed panaon tayo? First time ed history ya nibagan sarag na too ya pateyen so amin ya mabilay. Anggan saray organisasyon ya para kunod kareenan, singa say United Nations, et agda sarag ya patundaen so akalugan ed ambalbalangan kabayo.

“Anengneng koy sakey ya andeket a kabayo, tan samay akakabayo ed satan et akaegna na simbangan. Walay nadngel kon singano sakey a boses diad pegley na saray apatiran mabilay a pinalsa ya angibaga: ‘Sakey quarto a trigo so nasaliw na sakey a denario tan taloran quarto a sebada so nasaliw na sakey a denario; tan agmo aabuloyan a naupot so larak na olibo tan say alak.’”—Apocalipsis 6:5, 6.

Isisimbolo na sayan akakabayo so eras. Nanengneng tayo dia ya ngalngali anggapoy naakan ta say sakey a quarto (0.7 kilo) na trigo et manbili na sakey a denario, ya sueldo ed sanagew nen first century! (Mateo 20:2) Manbili met na sakey a denario so taloran quarto (2.1 kilo) na sebada, ya mas abeban klase nen say trigo. Pigaran agew labat itan ya kanen na baleg a pamilya! Kanian pinasakbayan iray totoo ya tipiden day suplay da na larak na olibo tan alak, ta aratan so inagew-agew ya uusaren da ed saman a panaon.

Manlapud 1914, kasin nanenengneng tayo ray ebidensya ya ginmapo lan ombabatik so andeket ya kabayo? On! Manga 70 milyon lan totoo so inatey ed eras legan na 20th century. Imbaga na sakey ya organisasyon ya nayarin anggad “805 milyon—manga sakey ed kada siameran totoo ed mundo—so malnourished ya maong nen 2012-2014.” Imbaga na sananey nin report: “Mas dakel ya totoo so ompapatey ed eras nen say AIDS, malaria tan tuberculosis.” Anggan antoy pansasagpot na dakel ya organisasyon pian pakanen iray nanaerasan, anggapoy makapatunda ed akalugan ed andeket a kabayo.

“Anengneng koy sakey a pusisaw a kabayo, tan samay akakabayo ed satan et Patey so ngaran to. Tan manumtumbok ed sikato so Lubok. Tan niiter ed sikara so autoridad ed kakapat na dalin, a mamatey ed panamegley na andukey ya espada tan eras tan makapatey a salot tan saray atap ya ayayep diad dalin.”—Apocalipsis 6:8.

Isisimbolo na komapat ya akakabayo so patey ya resulta na salot tan arum ni. Ag-abayag kayari 1914, minilyon so inatey lapud trangkaso Español. Manga 500 milyon ya totoo so naalisan, manga 33% na populasyon na too ed saman a panaon!

Balet dakel ni linmesan sakit kayari to ’tan. Ibabaga na saray eksperto ya nilasus a milyon ya totoo so inatey lapud smallpox (makapatey ya klase na lutot) legan na 20th century. Anggad natan et minilyon ni ompapatey lapud AIDS, tuberculosis, tan malaria, anggano impasyay panre-research day tambal.

Balanglan guerra, eras, odino salot—saksakey so pansusumpalan to—patey! Ag-ontutundan mantitipon na biktima so Lubok, kanian singa anggapo lay ilalo na totoo.

Asingsingger lan manampot so mair-irap a panaon. Tandaan iya: Manlapu nen 1914, si Jesus et “linma a manatalo,” imbantak toy Satanas diad dalin, balet agto ni asumpal so panatalo to. (Apocalipsis 6:2; 12:9, 12) Pero asingsingger lay Armagedon, tan diad satan et ekalen nen Jesus so amin ya impluensya nen Satanas tan deralen to ray totoon onsusuportad Diablo. (Apocalipsis 20:1-3) Patundaen nen Jesus so taloran akakabayo tan ayosen toy deral ya ginawa ra. Panon? Nia ray impromisa na Biblia.

Anggapo lay guerra, kanian mareen la. ‘Patundaen nen Jehova so guerra diad interon dalin. Puteren to ray pana tan deralen to ray gayang.’ (Salmo 46:9) Saray totoon labay day kareenan et “manliket iran maong ed agnaparaan a kareenan.”—Salmo 37:11.

Anggapo lay eras, dakdakel lay naakan. “Dakdakel so anien ya ilik diad dalin; say toktok na kapalandeyan et napanopano.”—Salmo 72:16.

Anggapo lay salot tan patey, amin et nawalaay maksil ya laman tan agmanampot ya bilay. “Punasen [na Dios] so amin a lua ed kamataan da, tan anggapo lay patey, anggapo met lay panermen tan panakis tan panotot.”—Apocalipsis 21:4.

Nen wadiad dalin si Jesus, impanengneng to no antoy situasyon ed dalin no sikato lay manuley. Imbangat toy kareenan, mamilagron amakan na nilibo, pinaabig to ray mansasakit, tan wala ni ingen iray inatey ya binilay to.—Mateo 12:15; 14:19-21; 26:52; Juan 11:43, 44.

Maliket iray Tasi nen Jehova ya ipanengneng ed sika diad Bibliam no panon kan makapan-ready no patundaen la nen Jesus imay taloran akakabayo. Labay mo?