Anggapoy lalabien na Dios tan labay ton nabendisyonan so amin ya totoo.

Impromisa na Dios ed propetan si Abraham ya ‘amin a pamilya ed dalin et nabendisyonan ed panamegley to.’​—Genesis 12:3.

Antoy naaralan tayo? Inar-aro itayon maong na Dios tan labay to ya nabendisyonan so amin ya pamilya​—lalaki, bibii, tan ugugaw—​ya manguunor ed sikato.

Say Dios et mapangasi tan bebendisyonan to iramay mansasagpot ya sikatoy nakabat da.

Inikdan na Makapanyarin-Amin a Dios si propeta Moises na pakayari pian makapanggawa na saray milagro. Balet siansian nampikasi si Moises: “Ipaamtam ed siak iray dalan mo, pian nakabat ta ka tan mantultuloy kon nagamoray panangabobon mo.” (Exodo 33:13) Aliketan so Dios ed kerew nen Moises kanian tinulongan to pian lalo ton naamtaan tan natalosan iray dalan tan kualidad To. Singa bilang, naaralan nen Moises ya say Amalsa et sakey ya “Dios a mapangasi tan maabagey.”​—Exodo 34:6, 7.

Antoy naaralan tayo? Labay na Dios ya bendisyonan to itayo​—lalaki, bibii, tan ugugaw—​no pansagpotan tayon sikatoy kabaten tayon maong. Ipapaamta to ed Masanton Kasulatan so dugan paraan na pandayew ed sikato tan naamtaan tayo ditan ya labalabay to itayon bendisyonan.

Napanliketan tayo so agmanganggan bendisyon na Dios no aralen tayo so nipaakar ed si Jesus tan saray ginawa tan imbangat to.

Nabasa tayo ed Salita na Dios iray detalye nipaakar ed bilay nen Jesus tan saray bangat to. Inikdan na Dios si Jesus na pakapanyari pian makapanggawa na saray milagro, singa say impamaabig to ed bulag, emel, tan piley. Amaoli ni ingen na saray inaatey. Impanengneng sirin nen Jesus iray bendisyon ya iter na Dios ed saray totoo diad arapen. Impaliwawa nen Jesus no antoy gawaen tayo pian naawat iratan a bendisyon: “Saya so mankabaliksay bilay ya andi-anggaan, a kabaten da ka, say saksakey a tuan Dios, tan samay imbakim, si Jesu-Kristo.”​—Juan 17:3.

Si Jesus et mapangasi, maar-aro, tan maomaong. Saray lalaki tan bibii, ugugaw tan mamatatken, et angawat ed maaron imbitasyon to: “Manaral kayod siak, ta mauyamo tan mapaabeba ak, pian nainawaan kayo.” (Mateo 11:29) Diad panaon nen Jesus, aliwliway panagtrato na arum ed saray bibii, balet maomaong so impantrato to ed sikara, pinagalangan tan nirespeto to ra.

Antoy naaralan tayo? Inar-aron maong nen Jesus iray totoo, tan impanengneng to so sankaabigan ya alimbawa no panon so pantrato tayod arum.

Ibabangat na Masanton Kasulatan ya “saksakey so Dios tayo” tan si Jesu-Kristo et sakey ya mapaabeban mensahero na Dios. (1 Corinto 8:6) Imbaga mismo nen Jesus ya say Dios et mas superyor nen say sikato tan sikatoy imbaki na Dios dia ed dalin.​—Juan 11:41, 42; 14:28. *