Imbangat nen Jesus iray totoo no panon iran mikareenan ed arum. Aminsan balet et oniay imbaga to ed saray apostol to: “Agyo iisipen a linma ak dia pian mangiyakar na kareenan diad dalin; linma ak dia pian mangiyakar na espada, aliwan kareenan. Linma ak dia pian pansengegay inkaapag-apag, anak a laki kontrad ama to, tan anak a bii kontrad ina to, tan manugang a bii kontrad katulangan ton bii.” (Mat. 10:34, 35) Antoy labay ya ibaga nen Jesus?

Agdia ibabaga nen Jesus ya ayos labat ya mankokolkol iray sankapamilya. Balet amta to ya saray bangat to so nayarin magmaliw ya rason na inkaapag-apag na arum ya pamilya. Nepeg itan ya tandaan na saramay malabay ya magmaliw ya bautismadon disipulo nen Jesu-Kristo. No maminsan, say mismon asawa o kapamilya ra so onkontra ed panlilingkor dad si Jehova, tan nayarin nasubok so katooran da bilang disipulo nen Jesus.

Oniay ipapaseseg na Biblia ed saray Kristiano: “Mikareenan kayod amin a totoo.” (Roma 12:18) Balet diad arum ya pamilya, say bangat nen Jesus et magmamaliw ya “espada.” Ontan so nagawa no say sakey et awaten to iray bangat nen Jesus, balet ta kontraen na pamilya to. Kanian say panlapuan na pambusol et saray mismon kapamilya o kakanayon to.—Mat. 10:36.

Diad sakey ya pamilya, no mandumaan so relihyon, wala ray situasyon ya kaukolan ya mandesisyon so sakey ya Kristiano—kasin paliketen to si Jehova tan si Jesus, odino saray kapamilya to? Singa bilang, panon to no piliten dan manselebra na holiday? Siopay paliketen to ey? Inkuan nen Jesus: “Siopaman a mas inaro toy ama to odino ina to nen say siak et agmakana ed siak.” (Mat. 10:37) Agdia ibabaga nen Jesus ya pian magmaliw iran disipulo to et agda la aroen iray atateng da. Idadanet to labat ed sikara no anto dapat so mas importante ed bilay da. Kanian no patundaen itayo na saray kapamilya tayo diad pandadayew tayod si Jehova, aroen tayo ni ran siansia. Pero dapat, mas inaro tayoy Aman Jehova nen say anggan siopa.

Tua, ansakit tan makapaermen no say mismon pamilya tayo so onkontra ed pandadayew tayod si Jehova. Pero importantin tandaan tayo iyan imbaga nen Jesus: “Siopaman ya agmangawat ed panamairapan a poste to tan ag-ontumbok ed siak et agmakana ed siak.” (Mat. 10:38) Diad simplin salita, iilaloan lan talaga na saray Kristiano ya say sakey ed saray kaukolan dan anosan et say ikontra na saray kapamilya da, pero agmet ira nanaekalan na ilalo ya onsabi lanlamang so panaon ya manguman iray aliwan Tasin kapamilya ra tan manaral met iray Biblia.—1 Ped. 3:1, 2.