1. No say too so amerdona, akin et nanduruma so labay ton ibaga?

 “PINERDONA TA KA LA.” Seguradon makainawa ka no narengel mo iratan ya salita, lalo la no say angibaga et amay toon asakisakitan mo. Pero nen imbaga ton pinerdona to ka la, labay to kasin ibaga, impawil to lay datin pankakaaro yo ya singa anggapoy agawa? Odino imbaga to labat man pian agla naungkat may isyu, pero diad tua, aliwa lan kaaro so turing tod sika? On, no say too so amerdona, nanduruma so labay ton ibaga.

 2. Antoy ibabaga na Biblia nipaakar ed panamerdona nen Jehova? (Nengnengen met so paimanod leksab.)

² Duman maong so panamerdona nen Jehova no ikompara ed panamerdona tayo ran totoo. Agtayon balot naparaan so panamerdona nen Jehova ta espisyal itan. Oniay imbaga na salmista ed si Jehova: “Tua so panamerdonam, [kanian] sikay pandinayewan.” a (Sal. 130:4) On, “tua” so panamerdona nen Jehova tan anggapoy makapipara ed panamerdona to. Diad arum ya bersikulo ed Hebreon Kasulatan, walay salitan inusar ya para labat ed panamerdona nen Jehova tan ag-itan balot inusar no tutukoyen so panamerdona na too.

 3. Akin et duma so panamerdona nen Jehova ed panamerdonay too? (Isaias 55:​6, 7)

³ No si Jehova’y mamerdona, buralen toy kasalanan na sakey ya too tan ituring to lamet ya kaaro to, ya singa anggapoy agawa. Misatsalamat tayod si Jehova ta “baleg so panamerdona to.”—Basaen so Isaias 55:​6, 7.

 4. Antoy ginawa nen Jehova pian natalosan tayoy panamerdona to?

⁴ No dumay panamerdona nen Jehova ed panamerdonay too, panon tayon natalosan so panamerdona to? Wala ray inusar nen Jehova ya balibalin ilustrasyon pian natalosan tayo itan.  Pantongtongan tayo ed sayan artikulo so arum ed saratan. Nanengneng tayod sarayan ilustrasyon ya no peperdonaen itayo nen Jehova, lilingwanan to la ray kasalanan tayo tan ituring to tayo lamet ya kaaro to. Legan tayon aaralen irayan ilustrasyon, lalo tayon naar-aro si Jehova tan napakilos tayon misalamat ed maomaong tan mapangasin Dios tayo.

EEKALEN NEN JEHOVA IRAY KASALANAN TAYO

 5. Antoy gagawaen nen Jehova no peperdonaen to tayo?

⁵ Diad Biblia, mabetbet ya ikokompara so kasalanan ed ambelbelat ya awit. Oniay imbaga nen Arin David ya alikna to nen akagaway kasalanan: “Saray lingok et onsasakbong ed ulok; singa iratan ambelbelat ya awit ya agko sarag a sakbaten.” (Sal. 38:4) Balet no say sakey et magbabawi, seguradon perdonaen nen Jehova. (Sal. 25:18; 32:5) Say Hebreon salita ya impatalos ya “perdonaen” et mankabaliksan na “alsaen” o “awiten.” Ontan ya ontan si Jehova. No mameperdona, singa to eekalen so ambelbelat ya awit tayo pian nalemewan tayo.

 6. Panon kaarawi so pangiyaakaran nen Jehova na saray kasalanan tayo?

⁶ Aglabat eekalen nen Jehova iray kasalanan tayo. Iyaarawi to met iratan ed sikatayo. Oniay ibabaga na Salmo 103:12: “No panoy kaarawi na bubutayan na agew manlapud seselekan to, ontan so impangiyarawi to ed sikatayo na saray kasalanan tayo.” Say bubutayan na agew et arawdawin maong ed seselekan to. Antoy punto? No mameperdona si Jehova, singa to iyaakar iray kasalanan tayo ed sankaarawian ya pasen ya naisip tayo. Makapalemew itan na liknaan!

 7. Antoy gagawaen nen Jehova ed saray kasalanan tayo? (Miqueas 7:​18, 19)

⁷ Anto ni gagawaen nen Jehova no peperdonaen to tayo? Makaala tayoy ideya ed samay insulat nen Arin Hezekias. Oniay imbaga tod si Jehova: “Imbantak mod benegan mo so amin a kasalanan ko.” Diad paimanod leksab na sayan teksto, nayari met iyan ipatalos ya: “Inekal mod pakanengneng mo iray kasalanan ko.” (Isa. 38:​9, 17; paimanod leksab) Labay ton ibaga, no say sakey et magbabawi, ibantak nen Jehova iray kasalanan to tan agto lan balot itan nengnengen. Nayari met iyan ipatalos ya: “Parad sika et singa agak akapanggaway kasalanan.” Walay nabasad Miqueas 7:​18, 19 ya mangidadanet ed sayan punto. (Basaen.) Base ed sayan teksto, singa ibabantak nen Jehova iray kasalanan tayo ed kaaralman na dayat. Nensaman, no walay imbantak mod dalem na dayat, agmo lan balot itan naromog.

 8. Antoy naaralan tayo ed saray ilustrasyon ya apantongtongan tayo la?

⁸ Antoy naaralan tayo ed sarayan ilustrasyon? Naaralan tayo ya no mameperdona si Jehova, talagan ekalen to may belat ya nalilikna tayo. Duga may inkuan nen David ya: “Maliket iramay totoon aperdona la ray mauges a ginawa ra tan saramay asakbongan la ray kasalanan da; maliket so too a say kasalanan to et agla nonoten nen Jehova.” (Roma 4:​6-8) Ontan so tuan panamerdona!

BUBURALEN NEN JEHOVA IRAY KASALANAN TAYO

 9. Anto nin ilustrasyon so inusar nen Jehova pian natalosan tayo so kabaleg na panamerdona to?

⁹ Wala ni ray ilustrasyon ya inusar nen Jehova pian natalosan tayo ya sarasarag ton buralen iray kasalanan tayo no magbabawi tayo tan walay pananisia tayo ed dondon. Ibabaga na Biblia ya singa to tayo uurasan nen Jehova pian nalinisan tayo ed saray kasalanan tayo. Kanian no pinerdona to tayo la, malinis tayo la ed pakanengneng to. (Sal. 51:7; Isa. 4:4; Jer. 33:8) Oniay imbagan mismo nen Jehova: “Anggano saray kasalanan yo  et ambalbalanga, napaputi iratan a singa niebe; anggano singa iratan ambalbalangan abel, magmaliw iratan a singa bagoy karnero.” (Isa. 1:18) No ambalbalangay mantsa na kawes, mair-irap itan ya ekalen. Pero diad satan ya ilustrasyon, ipapaseguro nen Jehova ya anggano ambalbalanga ni tay kasalanan tayo, sarasarag to itan ya paputien.

10. Anton ilustrasyon so mangipapanengneng ya mabulos ya mameperdona si Jehova?

¹⁰ Abitlad imbeneg ya artikulo ya saray kasalanan et singa “utang.” (Mat. 6:12; Luc. 11:​4, paimanod leksab) Kanian kada makakagawa tayo na kasalanan, manbaleg lan manbaleg so utang tayo ed si Jehova. No tiponen tayoy amin ya kasalanan tayo, talagan agtayo makabayar. Pero no pinerdona to tayo la nen Jehova, agto la pabayaran iray utang tayo. Agto tayo lan balot singilen ed saray kasalanan ya pinerdona to la. Maong labat ta wala yan ilustrasyon. Singa ibabaga nen Jehova ya no pinerdona to tayo la, agtayo la panaaburidoan iray utang o kasalanan ya agawaan tayo!

11. Akin et ibabaga na Biblia ya singa ‘buburalen’ nen Jehova iray kasalanan tayo? (Gawa 3:​19, paimanod leksab)

¹¹ Basaen so Gawa 3:​19, paimanod leksab. Diad lenguahen Griego, amay salitan “naperdona” diad sayan teksto et literal ya mankabaliksan na “nabural.” Apantongtongan tayo nen niman ya no pinerdona to tayo la nen Jehova, agto tayo la singilen ed saray kasalanan tayo. Tan diad tua, buburalen to met la iratan. Singa onia ’tan ay: Imadyin mo pay listaan na utang ya walay balbaleg ya X to. Anggano a-cancel la may utang ta wala lay X to, sankanengneng nin siansia iramay akalista. Pero duma so panamerdona nen Jehova ta talagan buburalen to so utang o kasalanan tayo. Pian natalosan tayo iyan ilustrasyon, tandaan tayo ya say uusaren dan tinta nensaman et pinanlalaok ya karbon, yaket, tan danum. No labay dan ekalen so insulat da, mangala ra labat na ambasan espongha pian nabural itan. Kanian nensaman no manbural iray utang, talagan anggapo lay nanengneng mo ed samay nansulatan. Anggapoy atilak ya anggan melmelag ya marka kanian singa agkan balot akautang. On, no pinerdona la nen Jehova iray kasalanan mo, binural to la iratan kanian singa agka akagaway kasalanan!—Sal. 51:​9, paimanod leksab.

12. Antoy naaralan tayo ed ilustrasyon ya nabasa ed Isaias 44:22?

¹² Wala ni sakey ya ilustrasyon ya inusar nen Jehova pian idanet ya talagan agto la nenengnengen iray kasalanan tayo no pinerdona to tayo la. Kuan to: “Punasen ko iray impakalingom a singa iratan nasakbongan na lurem, tan saray kasalanan mo a singa iratan nasakbongan na makapal a lurem.” (Isa. 44:22) On, no mameperdona si Jehova, singa to sasakbongan na makapal a lurem iray kasalanan tayo pian agto la nanengneng. Sasaniban to itan pian agtayo la pawil-pawilen.

13. Akin et balibali ed liknaan no pinerdona to tayo la nen Jehova?

¹³ Antoy naaralan tayo ed sarayan ilustrasyon? No pinerdona to tayo la nen Jehova, agtayo komon iisipen ya amantsaan tayo ni. Malinis tayo la ed pakanengneng to kanian agtayo la dapat nakokonsiensia. Imbayar la nen Jesus so dala to kanian agto tayo la singilen nen Jehova ed saray utang o kasalanan tayo. Tan no pinerdona to tayo la, buralen to la ray kasalanan tayo, ya singa anggapoy agawa. Talagan tuan panamerdona so awaten tayo no pagbabawian tayo iray kasalanan tayo!

IPAWIL NEN JEHOVA SO MALET YA PANKAKAARO YO

14. Akin et agtayo dapat pandudaan so panamerdona nen Jehova? (Nengnengen met iray litrato.)

¹⁴ No mameperdona si Jehova, agto labat eekalen tan buburalen iray kasalanan tayo.  Ipawil to met may malmalet ya pankakaaro yo. No dalepdepen tayo itan, naiwasan tayoy manisip na negatibo tan agtayo la nakonsiensia ed saray agawaan tayon kasalanan ya pinerdona to la. Agtayo met isipen ya ombabarong ni Aman Jehova ed sikatayo tan manaalagar labat na panaon pian nadusa to tayo. Andi, aliwan ontan si Aman Jehova. No imbaga ton pinerdona to tayo la, talagan pinerdona to tayo la. Oniay imbaga nen Jehova ed si propetan Jeremias: “Perdonaen koy lingo ra, tan lingwanan ko lay kasalanan da.” (Jer. 31:34) Atan ya teksto so sankanonot nen apostol Pablo nen oniay insulat to ya imbaga nen Jehova: “Agko lan balot nonoten iray kasalanan da.” (Heb. 8:12) Antoy labay ton ibaga ’tan?

15. Antoy labay ya ibaga na ‘aglan balot nonoten nen Jehova iray kasalanan tayo’?

¹⁵ Diad Biblia, amay salitan “nonoten” et aglabat ontutukoy ed panisip na saray agawad apalabas. Ontutukoy met itan ed panggaway aksion. No pawilen tayo may imbaga na samay kriminal ya akapasak ed abay nen Jesus, di ba say kuan to: “Jesus, nonot mo ak sano onsabi kad Panarian mo.” (Luc. 23:​42, 43) Nen imbaga to ’tan, agto labat kekerewen ya sikatoy isipen nen Jesus no wala lad Panarian to. Labay to ya walay gawaen nen Jesus parad sikato. Kanian nanengneng ed samay ebat nen Jesus ya paolien to iyan kriminal. Katon nen imbaga nen Jehova ya agto lan balot nonoten iray kasalanan tayo, singa to ibabaga ya agla manggaway aksion pian dusaen to tayo ed saray kasalanan ya pinerdona to la.

16. Inkompara tayo na Biblia ed anto?

¹⁶ Wala ni ilustrasyon ya inusar na Biblia pian natalosan tayo so liket ya nalikna na sakey a too no sikatoy pinerdona la nen Jehova. Lapud makasalanan tayo, ibabaga na Biblia ya singa tayo ‘aripen na kasalanan.’ Pero no pinerdona to tayo la nen Jehova, ‘nibulos tayo la ed kasalanan.’ (Roma 6:​17, 18; Apo. 1:5) Imadyin mo pay liknaan na aripen ya bulos la ed amin ya paniirap to. Seguradon  malikeliket! Ontan ya ontan so liknaan na toon pinerdona la nen Jehova.

17. Akin et singa to tayo papaabigen nen Jehova no perdonaen to tayo? (Isaias 53:5)

¹⁷ Basaen so Isaias 53:5. Ibabaga na Biblia ya lapud makasalanan tayo, singa walay graben sakit tayo. Pero lapud dondon bagat nen Jesus ya intarya nen Jehova, singa tayo inmabig ed graben sakit tayo. (1 Ped. 2:24) No mankasalanan tayo, singa tayo mansasakit ed espiritual kanian naderal so relasyon tayod si Jehova. Pero lapud dondon, sarag to tayon perdonaen nen Jehova pian ompawil may datin malet ya relasyon tayod sikato. No say sakey a too et inmabig ed graben sakit to, seguradon malikeliket. Ontan met so nalikna na toon inmabig la ed espiritual. Malikeliket ta amta ton walad sikato lamet so pabor nen Jehova.

NO ANTOY EPEKTO NA PANAMERDONA NEN JEHOVA ED BILAY TAYO

18. Antoy naaralan tayod panamerdona nen Jehova ed saray apantongtongan tayon ilustrasyon? (Nengnengen met so kahon ya “Espisyal so Panamerdona nen Jehova.”)

¹⁸ Antoy naaralan tayod panamerdona nen Jehova ed saray apantongtongan tayon ilustrasyon? Naaralan tayo ya no mamerdona si Jehova, lingwanan to la ray kasalanan tayo ya singa anggapoy agawa. Tan agto tayo met la dusaen ed saray kasalanan ya pinerdona to la, kanian agtayo la dapat natatakot o nakokonsiensia. Naaralan tayo met ya no pinerdona la nen Jehova so sakey ya lingkor to, agto labat ekalen o buralen so kasalanan to, noagta ipawil to met may datin pankakaaro da. Pero siempre, tandaan tayo ya say panamerdona nen Jehova et mabmablin regalo. Peperdonaen to tayo lapud inar-aro to tayo tan agnaparaan so kaabigan to, aliwan lapud kanepegan tayo itan.—Roma 3:24.

19. (a) Antoy pisatsalamatan tayo? (Roma 4:8) (b) Antoy pantongtongan tayod ontumbok ya artikulo?

¹⁹ Basaen so Roma 4:8. Misatsalamat tayo ta ‘tua so panamerdona nen Jehova’! (Sal. 130:4) Pero pian perdonaen to tayo, walay nepeg tayon gawaen. Say kuan nen Jesus: “No agyo perdonaen iray totoo ed saray impakalingo ra, agmet perdonaen na Ama yo iray impakalingo yo.” (Mat. 6:​14, 15) On, labay nen Jehova ya mabulos tayo met ya mamerdona. Pantongtongan tayod ontumbok ya artikulo no panon tayon nagawaan itan.