Antis kan manaral, tepetan moy sarilim, ‘Anto ra kasi naaralan ko natan?’ Seguro anggan panon et wala lay ideyam. Pero tandaan mo ya ompan wala ray balon ibangat nen Jehova ed sika. Anto sirin so gawaen tayo pian lukas so nonot tayo ed saray labay nen Jehova ya ibangat ed sikatayo?

Ipikasim ed si Jehova ya ikdan to kay karunongan. Ibagam ed sikato ya tulongan to ka pian nanengneng mo no antoy labay ton ibangat ed sika. (Sant. 1:5) Agka mandedepende ed saray dati lan antam.—Pro. 3:​5, 6.

Mantiwala ka ya walan-walay nitulong na Biblia ed bilay mo. “Say salita na Dios et mabilay.” (Heb. 4:12) Kanian kada no manbabasa tayoy Biblia, walan-walay naaralan tayon balo tan walay epekto to ’tan ed bilay tayo. Pero nagawa labat itan no lukas so nonot tan puso tayo legan tayon manaaral.

Apresyam so amin ya espiritual ya naakan ya itatarya nen Jehova. Singa itan “ponsia a sankananaman iray kakanen.” (Isa. 25:6) Agmo iisipen ya agmo nagustoan so arum ya putahe. Tawayan mon amin! No ontan so gawaen mo, mas na-enjoy moy manaral na Biblia tan lalo kan onaligwas ed espiritual!