Kasin Dati et Manlilingkor Ka Diad Sakey a Pribilehyo? Sarag Mo Kasi Manlingkor Lamet?

DATI kasi et wala ka ed responsablin posisyon diad Kristianon kongregasyon? Nayarin dati et sakey kan ministeryal a lingkor odino matatken, odino walad sigpot panaon a serbisyo. Maseguron aliknam so liket tan inkapnek ed saray asainmin mo, balet lapud antokaman a rason et kinaukolan mon ikbanan iratan.

Nayarin inikbanan moy pribilehyom pian naasikasom so pamilyam. Nayari met a say rason et lapud inkatatken o sakit. Saratan a desisyon et aliwan tanday kakapuyan. (1 Tim. 5:8) Nen inmunan siglo, si Felipe et nanlingkor bilang misionero, balet diad saginonor et nanayam ed Cesarea pian asikasoen so pamilya to. (Gawa 21:8, 9) Sanen masiken lay David ya ari ed Israel nensaman, inyuksoy toy panuley na anak ton si Solomon bilang onsublay ya ari. (1 Ara. 1:1, 32-35) Ingen, siansia nin si Felipe tan David et parehon inaro tan pinabli nen Jehova, tan rerespetoen ni ra anggad natan.

Balet, nayarin say pribilehyom et inekal ed sika. Say makapuy a kondukta kasi so rason? Odino lapud saray problema ed pamilya? (1 Tim. 3:2, 4, 10, 12) Ompan inisip mo ni ingen ya agmakatunongan so impangekal da’d sika tan anggad natan et wala ni sakit na linawam.

Sarag Moy Ondampot Pian Nawalaan Lamet na Pribilehyo

Agla kasi nipawil so nakal a pribilehyo? Agmet naynay ya ontan. Balet, pian makapanlingkor ka lamet, nepeg mon labayen so ondampot. (1 Tim. 3:1) Akin balet a labayen mo itan? Lapud inarom si Jehova tan saray lingkor to, a saraya met so rason no akin ya indedikam so inkasika ed Dios. No mabulos mon ipatnag itan ya aro diad panlingkor lamet, aabuloyan mon usaren ka nen Jehova, laktip la ray eksperiensyam antis tan kayari inkaekal na pribilehyom.

Nonoten pa imay impamaseguro nen Jehova ed Israel kayari makatunongan ya impangekal to ed espisyal iran pribilehyo ra. Oniay kuan na Salita to: “Siak, si Jehova, agak manguman, kanian sikayo, O anak ira nen Jacob, agkayo naupot.” (Mal. 3:6) Inaro nen Jehova iray Israelita tan labay to ni ran usaren. Labay met nen Jehova ya usaren ka ed arapen. Anto sirin so nagawaan mo ed kaplesan? Diad serbisyo tayo, mas importante so maabig ya espiritualidad nen saray abilidad. Kanian, legan ya anggapo ni ray kaaruman a responsabilidad mo ed kongregasyon, iteen moy imanom ed pamabiskeg na espiritualidad mo.

Pian “ombiskeg” so pananisiam, “anap [moy] Jehova tan say biskeg to.” (1 Cor. 16:13; Sal. 105:4) Say sakey a paraan pian nagawaan mo iya et diad panamegley na impapuson pikakasi. Sano itotongtong moy kipapasen mo ed si Jehova, ibalikas moy naliliknam tan kerew kay espiritu to. Diad panggawam ed saya, mas onapit ka ed sikato, tan ombiskeg ka. (Sal. 62:8; Fil. 4:6, 13) Say sakey nin paraan pian ombiskeg so espiritualidad mo et diad pamaaligwas mo’d panagaral na Salitay Dios. Legan a daiset ni responsabilidad mo, nayarin mas malaem so nagawaan mo parad personal tan pampamilyan panagaral, a nayarin  nipawil mo ni imay rotinan mairap mon pansiansiaen.

Siempre, siansia nin irerepresentam si Jehova bilang sakey ed saray Tasi to. (Isa. 43:10-12) Say sankaabigan a pribilehyon nayarin niwala ed siopaman et say pagmaliw a “kakimeyan na Dios.” (1 Cor. 3:9) Say balibalin paraan pian napabiskeg moy espiritualidad mo tan say espiritualidad na saray kaibam ed ministeryo et say pibiang a nagkalalo ed panagpulong.

Panaeg ed Negatibon Liknaan

Lapud inkaandi pribilehyom et nayarin nababaingan odino magbabawi ka. Ompan singa labay mo nin ikatunongan iray ginawam. Panon to balet no dinengel kan tua na saray agagin walad responsabilidad ingen ta parad sikara et talagan agka la manepeg ed pribilehyom? Nayarin maneem-em kay sakit na linawa, a makasbel laingen ed sikan mandampot, odino nairapan ka laingen a makaaral ed ginawam. Imanoen no panon ya ontulong so eksperiensya di Job, Manases, tan Jose pian nalabanan na sakey iray negatibon liknaan to.

Inrepresenta nen Job so arum diad arap nen Jehova tan bilang patriarka et sikatoy nanlingkor met bilang matatken tan ukom. (Job 1:5; 29:7-17, 21-25) Insan nen sankaabigan lay kipapasen na bilay to et naandi kayamanan, ananak, tan maong a bunigas to. Tan lapud saraya, naandi met so kagalangan to diad pakanengneng na arum. “Saray ugugaw nen say siak panelekan da ak,” so kuan nen Job.​—Job 30:1.

Parad si Job, talagan anggapoy ginawa ton mauges tan labay ton idepensay inkasikato ed Dios. (Job 13:15) Ingen, mabulos a nanalagar si Job ed si Jehova, tan abendisyonan lapud satan. Naaralan ton kaukolan toy nipetek, lautla ed samay reaksion to’d dinalan ton subok. (Job 40:6-8; 42:3, 6) Lapud inkamapaabeba nen Job, diad kaunoran et sikatoy daakan a benendisyonan na Dios.​—Job 42:10-13.

No say sengegay inkaandi pribilehyom et lapud walay agawam a makapuy, nayarin isipen mo no kasin talagan naperdona ka ni nen Jehova tan saray agagi, tan no kasin nalingwanan da ni itan. Bueno, nonoten pay Arin Manases na Juda. Sikatoy “nanggawa na dakel a kaugsan ed pakanengneng nen Jehova, pian sikato so sagyaten to a manpasnok.” (2 Ara. 21:6) Balet inatey si Manases bilang matoor ya ari. Panon iyan agawa?

Sanen imbaliwala to iray pasakbay, inusar nen Jehova sumpad sikato iray Asiryano, ya amalor tan angawit ed sikato diad Babilonia. Ditan, si Manases et “inanap to si Jehova a Dios to tan nampabpaabeba na balbaleg ed arap na Dios na saray atateng to. Et nampikasi ed Sikato.” On, diad saginonor et inawat nen Manases so disiplina nen Jehova. Impanengneng to’d gawa so masimoon a pagbabawi kanian aperdona.​—2 Awa. 33:12, 13.

Diad kaslakan, saray naandin pribilehyo et agnipawil a maminpinsan. Balet diad ilalabas na panaon, nayarin napabtangan kay angkelag iran responsabilidad. No awaten mo iraya tan gawaen moy sankaabigan mo, kaslakan lan manresulta itan ed kaaruman iran asainmin. Agto met labay ya ibagan anggapo lay dalanen  mon irap. Nayarin walaray pakadismayaan mo. Balet, no mabulos tan porsigido ka, panggayagaan moy maabig iran resulta.

Alaen pan alimbawa so anak nen Jacob a si Jose. Diad edad a 17, si Jose so inlako na agagi to tan nagmaliw ya aripen. (Gen. 37:2, 26-28) Seguradon agto inilaloan ya ontay pantrato ed sikato na saray agagi to ed ama. Balet mabulos ton inawat so kipapasen to, tan diad panamendisyon nen Jehova et nagmaliw a mayurdomo ed abung nen Potifar. (Gen. 39:2) Diad saginonor, niprisoy Jose balet nansiansian matoor tan walad sikatoy Jehova, kanian nipiya ed sikatoy pambantay ed saray kapara ton priso.​—Gen. 39:21-23.

Ag-amta nen Jose a walay gagala na amin na saraya. Basta intuloy to labat a ginawa no antoy nagawaan to. Kanian sikatoy nausar nen Jehova pian napansiansiay polin panlapuan na insipan a Bini. (Gen. 3:15; 45:5-8) Anggaman agtayo nailaloan ya onman kaimportante ed betang nen Jose so sumpalen tayo, ipapanengneng labat na sayan pinuyanan a salaysay a walay pibibiang nen Jehova ed saray pribilehyon naaawat na saray lingkor To. Komon ta akaparaan ka lawas a singa si Jose.

Pakaaral ed Ampait Iran Eksperiensya

Si Job, Manases, tan Jose et pareparehon dinmalan ed ampait iran eksperiensya. Inawat da no antoy inyabuloy nen Jehova a nagawa, tan balang sakey et akaaral na makana iran leksion. Sika ey, anto kasi naaralan mo?

Nonot mo no anto kasi labay nen Jehova ya ibangat ed sika. Diad inkadesperado nen Job, sikatoy nagmaliw a makasarili tan alingwanan toy mas baleg iran isyu. Balet lapud maaron impangipetek nen Jehova, nipawil so inkabalanse to, ya inaksobi ton: “Binitlak so agko atalosan.” (Job 42:3) No asakitan ka lapud naandi pribilehyom, ‘agmo nononoten so inkasikan dili ya atagtagey nen say kanepegan mon nonoten, noagta mannonot ka ed kaabebaay linawa.’ (Roma 12:3) Nayarin labay ka labat nen Jehova ya ipetek ed paraan ya agmo ni tanton natatalosan.

Awat moy disiplina. Nayarin diad gapo et inisip nen Manases ya alabas so inter ed sikaton disiplina. Balet inawat to itan, nagbabawi, tan tinaynan toy mauges a kabibilay to. Antokaman so naliliknam ed disiplinan nayarin naawat mo, ‘manpaabeba ka ed arapan na Katawan, pian itandoro to ka.’​—1 Ped. 5:6; Sant. 4:10.

Mananos tan magmaliw a mabulos. Nayarin nanem-em la komon na sanok si Jose tan inisip to lay ombawi lapud naeksperiensya to. Ingen ta abayuboan toy pakatalos tan panangasi. (Gen. 50:15-21) No adismaya ka, mananos ka labat. Tan mabulos kan paipasal ed si Jehova.

Dati kasi et akapanlingkor ka ed sakey a responsablin posisyon ed kongregasyon? Ikdan moy Jehova na pankanawnawan mangipabtang ed sika na saray pribilehyo diad arapen. Pabiskeg moy espiritualidad mo. Mananos ka tan magmaliw a mapaabeba. Awat mon mabulbulos so antokaman ya asainmin a niiter ed sika. Makaseguro kan “anggapo so maong a bengatlan isiblet [nen Jehova] ed saraman so manakar a mapmaptek.”​—Sal. 84:11.

[Blurb ed pahina 30]

Pabiskeg moy pananisiam panamegley na impapuson panagpikasi

[Litrato ed pahina 31]

Say balibalin paraan pian napabiskeg moy espiritualidad mo et say pibiang a nagkalalo ed panagpulong

[Litrato ed pahina 32]

Ikdan moy Jehova na pankanawnawan mangipabtang ed sika na saray pribilehyo diad arapen