“Sikayo so Kakaarok”

“Sikayo so kakaarok, no gawaen yo so saray bengatla ya inganggan ko ed sikayo.”​—JUAN 15:14.

1, 2. (a) Antoray nanduruman abenegan na kakaaro nen Jesus? (b) Akin et importantin magmaliw itayon kaaro nen Jesus?

SARAMAY lalakin kaiba nen Jesus diad kuarto’d tagey et walaan na nanduruman abenegan. Say sanagin si Pedro tan Andres et managsigay. Si Mateo et datin managsingil na buis, trabahon balbalawen na saray Judio. Say sanagin Santiago tan Juan et nayarin kabkabat da lay Jesus manlapu la’d inkaugaw. Saramay arum balet, a singa si Natanael, et nayarin pigay taon da ni labat a kabat si Jesus. (Juan 1:43-50) Balet, amin a wadman ed saman a makatantandan labi na Paskua ed Jerusalem et kombinsidon si Jesus imay insipan a Mesias, say Anak na mabilay a Dios. (Juan 6:68, 69) Seguradon aliklikna ray panangaro nen Jesus sanen inkuan to ed sikara: “Tinawag ta kayo a kakaaro, ta amin a bengabengatla a nadngel ko ed Amak impaamtak ed sikayo.”​—Juan 15:15.

² Sarayan imbaga nen Jesus ed saray matoor ya apostol to et onaplika met ed amin ya alanaan a Kristiano ed sayan panaon, ontan met ed kaiba ran ‘arum a karnero.’ (Juan 10:16) Antokamay apalabas tayo, walay pribilehyo tayon magmaliw a kaaro nen Jesus. Talagan importante so pikakaaro ed sikato lapud no sikatoy kaaro tayo, magmaliw met a kaaro tayo si Jehova. Diad tua, imposible so iyapit ed si Jehova no agtayo onapit nin unona ed si Kristo. (Basaen so Juan 14:6, 21.) Anto sirin so gawaen tayo pian magmaliw tan mansiansia itayon kaaro nen Jesus? Antis tayon pantongtongan iyan importantin tema, aralen tayo ni alimbawa nen Jesus ed impagmaliw ton maong a kaaro tan no panoy inkiwas na saray disipulo to lapud pikakaaro to.

Maong a Kaaro si Jesus

3. Diad anto akabkabat si Jesus?

³ “Say mayaman [et] walaan na dakel a kakaaro,” so insulat nen makabat ya Arin Solomon. (Uli. 14:20) Ipapanengneng na satan so tendensia na agperpekton totoo a mikaaro lapu labat ta walay naala ra, aliwan lapud ta walay niiter da. Aliwan ontan si Jesus. Agto akikaaro lapud kayamanan odino posisyon na sakey a too. Tua, alikna nen Jesus so panangaro parad samay mayaman a kalangweran a manuley tan inimbitaan ton magmaliw a patumbok to. Anggaman ontan, sikatoy inganggan nen Jesus ya ilako to ray kaykayarian to insan to iter ed saray mairap-bilay. (Mar. 10:17-22; Luc. 18:18, 23) Kabkabat si Jesus aliwan lapud impiulop to ed saray mayaman tan prominente, noagta diad impikaaro to ed saray mapaabeba tan leleglemewen.​—Mat. 11:19.

4. Akin et nibagan nalilingo met iray kakaaro nen Jesus?

⁴ Saray kakaaro nen Jesus et nalilingo met. Walay pankanawnawan agmitunosan so panmoria nen Pedro ed panmoria na Dios. (Mat. 16:21-23) Ontan met, impatnag di Santiago tan Juan so inkamaambisyon sanen kinerew da ed si Jesus ya ikdan to ra na prominentin posisyon ed Panarian. Asanokan iray arum ya apostol lapud satan a ginawa ra, tan lanang iran mansasangsangan no siopay manunaan ed sikara. Anggaman ontan, maan-anos ya impetek nen Jesus so kanonotan na sarayan kakaaro to tan agtamtampol a naingongotan ed sikara.​—Mat. 20:20-28.

5, 6. (a) Akin et nansiansian kakaaro nen Jesus so maslak ed saray apostol to? (b) Akin et pinultot nen Jesus so pikakaaro to ed si Judas?

⁵ Sarayan agperpekton totoo et nansiansian kakaaro nen Jesus aliwan lapud sikatoy  masyadon maabuloy odino nambulag-bulagan ed saray lingo ra. Noagta, say inimano to et saray maong a motibo tan positibon ugali ra. Singa bilang, imbes a suportaan di Pedro, Santiago, tan Juan si Jesus diad samay oras a sikatoy talagan nagogonigon, akaugip ira la laingen. Natural labat a nadismayay Jesus ed sikara. Ingen ta atebek to nin siansia a maong so motibo ra, ya inkuan to: “Say espiritu tua a sikatoy malikeliket, balet say laman makapuy.”​—Mat. 26:41.

⁶ Diad biek a dapag, asabi panaon et pinultot nen Jesus so pikakaaro to ed si Judas Iscariote. Anggaman ipapatnag nen Judas a singa sikatoy sakey a kaaro, atebek nen Jesus ya inabuloyan na sayan datin maapit a kaulop to a magmaliw a marelmeng so puso to. Lapud nagmaliw lan kaaro na mundo si Judas, ginawa to lay inkasikato a kabusol na Dios. (Sant. 4:4) Kanian pinaalis la nen Jesus si Judas antis Ton imbalikas so pikakaaro To ed saray 11 a matoor ya apostol.​—Juan 13:21-35.

7, 8. Panon ya impatnag nen Jesus so panangaro ed saray kakaaro to?

⁷ Ag-inyapasakey nen Jesus so imano to ed lingo na saray matoor a kaaro to tan lawas ton ninonot so pankaabigan da. Singa bilang, impikasi to’d Ama to a protektaan to ra sano walaray subok a nasagmak da. (Basaen so Juan 17:11.) Inkonsidera nen Jesus iray limitasyon da. (Mar. 6:30-32) Tan agto labat basta imbalikas no antoy walad kanonotan to noagta sikatoy interesado met a dengelen tan talosan no antoy iisipen tan nalilikna ra.​—Mat. 16:13-16; 17:24-26.

⁸ Si Jesus et nambilay tan inatey parad saray kakaaro to. Tua, amta ton nepeg ton iyapay so bilay to ta satan so legal a kakaukolanen na estandarte nen Ama to ed hustisya. (Mat. 26:27, 28; Heb. 9:22, 28) Balet, inyapay nen Jesus so bilay to lapud panangaro. Oniay inkuan to: “Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.”​—Juan 15:13.

Panoy Inkiwas na Saray Disipulo ed Pikakaaro nen Jesus?

9, 10. Panoy inkiwas na saray totoo ed inkamaiter nen Jesus?

⁹ Ag-insiblet nen Jesus so panaon tan kaykayarian to, tan mabulos ton impatnag so panangaro to. Bilang resulta, inmapit so liknaan na totoo ed sikato tan maliket met iran angiter ed sikato. (Luc. 8:1-3) Oniay nibaga nen Jesus base ed mismon eksperiensya to: “Mangiter kayo, et naikdan kayo; sukat a maong, pinerper, aseksek tan manlepleppua, so iter da ed akwalan yo. Ta [say] sukat a pansukat yo sikato met so pansukatan ed sikayo.”​—Luc. 6:38.

¹⁰ Balet, walaray akiulop ed si Jesus lapu labat ed saray naala ra ed sikato. Sarayan mankuankuanan a kakaaro et anaynan ed si Jesus sanen aliway pakatalos da ed imbaga to. Imbes a manmatalek ira’d sikato, aliwan tampol so inisip da tan sikatoy intalirak da. Diad biek a dapag, saray apostol et nanmatoor ed si Jesus. Mabetbet ya asubok so pikakaaro ra ed si  Kristo, balet ta ginawa ray anggaay nayarian dan sikatoy suportaan, diad inawa man o diad irap. (Basaen so Juan 6:26, 56, 60, 66-68.) Diad samay unor lan labi nen Jesus diad dalin bilang too, imbalikas toy panamabli to ed saray kakaaro to, a kuan to: “Sikayo iray nansiansia ed siak sanen nasusubok ak.”​—Luc. 22:28, NW.

11, 12. Antoy impaseguro nen Jesus ed saray disipulo to, tan panoy inkiwas da?

¹¹ Kayarin tuloy a kinomendaan nen Jesus irayan disipulo to lapud inkamatoor da et sikatoy tinaynanan da. Ingen, diad agano et inabuloyan dan say takot ed too so manaeg ed panangaro ra ed Kristo. Balet ta pinerdona ira lamet nen Jesus. Kayari na impatey tan inkioli to, sikatoy nampanengneng ed sikara tan impaseguro ton kaaro to ni ran siansia. Niarum ni, inmatalek to ed sikara so sakey a kimey a nanlapud Dios, say panggawa na babangatan “ed amin a nasyones” tan pagmaliw a tasi to “angga ed kasampotan na dalin.” (Mat. 28:19; Gawa 1:8) Panoy inkiwas na saray disipulo to ed sayan kimey ya inmatalek to?

¹² Inyupo-upot na saray disipulo so biskeg tan bilay da diad panangiyabawag na mensahe na Panarian. Diad tulong na masanton espiritu nen Jehova, ag-abayag et ‘pinano ray Jerusalem na bangat da.’ (Gawa 5:27-29) Anggaman sikaray pinagyaw a pateyen, siansia nin makpel dan tinulok so ganggan nen Jesus a manggaway babangatan. Pigaran dekada labat kayari na samay impangiganggan nen Jesus ed sikara, nisulat la nen apostol Pablo a say maong a balita et nipulong la “ed amin a pinalsa ed leksab na tawen.” (Col. 1:23) Talagan pinaneknekan na sarayan disipulo a pinabpabli ra so malet a pikakaaro ra ed si Jesus!

13. Antoran pananguman so ginawa na saray nagmaliw a disipulo lapud impangiyaplika ra ed saray bangat nen Jesus?

¹³ Inyaplika na saramay nagmaliw a disipulo iray bangat nen Jesus ed kabibilay da. Dakel so nanggaway baleg a pananguman ed kondukta tan personalidad da. Arum ed saray balon disipulo et datin homoseksual, mikakalugoran, buanges, odino matakew. (1 Cor. 6:9-11) Wala met iramay kaukolan dan umanen so panagtrato ra ed saray agda kanasyonan. (Gawa 10:25-28) Ingen ta siansian tinulok day Jesus. Inkaindan da lay daan a personalidad da tan insulong day balon personalidad. (Efe. 4:20-24) Inaral dan maong so “kanonotan nen Kristo,” a tinalosan tan inalig da so panagnonot tan awawey to.​—1 Cor. 2:16.

Say Pikakaaro Tayo Natan ed si Kristo

14. Antoy insipan nen Jesus a gawaen to legan na “anggaan na [sistema na] mundo”?

¹⁴ Dakel ed saray Kristiano nen inmunan siglo et kabkabat dan mismoy Jesus, odino anengneng dan mismo kayari na inkioli to. Balet, ag-itayo awalaan na ontan a pribilehyo. Panon tayo sirin a magmaliw a kaaro nen Kristo? Say sakey a paraan et diad itulok ed saray instruksion na matoor tan makabat ya aripen, a tutugyopen na saray alanaan na espiritun agagi nen Jesus a wadia ni ed dalin. Insipan nen Jesus a legan na “anggaan na [sistema na] mundo,” imatalek to so “amin a wala ed sikato” ed sayan aripen. (Mat. 24:3, 45-47) Diad sayan panaon, karaklan ed saray malabay a magmaliw a kaaro nen Kristo et agkabiangan na sayan aripen a klase. Panon a naapektoan so pikakaaro ra ed si Kristo diad itulok da ed saray instruksion na matoor tan makabat ya aripen?

15. Antoy pakabidbiran no kasin say indibidual et nipasen a karnero odino kanding?

¹⁵ Basaen so Mateo 25:31-40. Saramay kabiangan na matoor ya aripen a klase et tinawag nen Jesus ya agagi to. Diad samay ilustrasyon nipaakar ed panangibiig na saray karnero ed saray kanding, malinlinew ya imbaga nen Jesus a  no antoy gagawaen tayo ed saray agagi to et singa tayo met la gagawaen ed sikato. Diad tua, imbaga to a say pakabidbiran no kasin karnero odino kanding so sakey a too et diad panagtrato na sayan indibidual ed anggan “kamelagan” ed saray agagi to. Kanian, say manunan paraan a nipanengneng na saramay walaan na ilalon manbilay diad dalin a pilalek day magmaliw a kakaaro nen Kristo et diad panuporta ra ed matoor ya aripen a klase.

16, 17. Panon tayon nipanengneng so pikakaaro tayo ed saray agagi nen Kristo?

¹⁶ No say ilalom et manbilay diad dalin ya uleyan na Panarian na Dios, panon mon nipanengneng so pikakaarom ed saray agagi nen Kristo? Konsideraen tayo pay talora labat a paraan. Say unona et say impapuson pibiang ed panagpulong a kimey. Inganggan nen Kristo iray agagi to ya ipulong day maong a balita ed sankamundoan. (Mat. 24:14) Balet, saray nakekeraan ya agagi nen Kristo natan et nairapan a manakbat ed satan a responsabilidad no anggapo so tulong na kakaiba ran arum a karnero. Diad tua, kada pankanawnawan mibiang a manpulong iray kabiangan na arum a karnero et tutulongan da ray agagi nen Kristo a sumpalen itan a sagradon kimey. Satan a paneknek na pikakaaro ra et papablien a maong nen Kristo tan say matoor tan makabat ya aripen a klase.

¹⁷ Say komaduan paraan et diad panangiter na pinansyal a suporta ed panagpulong a kimey. Pinaseseg nen Jesus iray papatumbok to a mikaaro ira panamegley na “saray kayamanan na ag-inkatunong.” (Luc. 16:9) Agto labay ya ibagan nabayaran tayoy pikakaaro ed si Jesus odino ed si Jehova. Imbes, kabaliksan na saya a no usaren tayoy materyal iran kaykayarian tayo pian napalaknab so intereses na Panarian, papaneknekan tayon say pikakaaro tan panangaro tayo et aliwan angangga’d salita labat, noagta “dia ed gawa tan dia ed katuaan.” (1 Juan 3:16-18) Iiter tayoy pinansyal a suporta tayo sano mibibiang itayon mismo ed panagpulong a kimey, sano mandodonasyon itayo parad panagpaalagey tan panagmintina na saray pasen a pandadayewan tayo, tan sano mankokontribusyon itayo parad sankamundoan a panagpulong. Baleg man odino melag so kontribusyon tayo, seguradon aapresyaen nen Jehova tan Jesus so sililiket a panangiter tayo.​—2 Cor. 9:7.

18. Akin a nepeg tayon tuloken iray nibase ed Biblian instruksion na mamatatken diad kongregasyon?

¹⁸ Say komatlon paraan et diad pikokoopera tayo ed saray mamatatken ed kongregasyon. Sarayan lalaki et tinuro na masanton espiritu diad panangiwanwan nen Kristo. (Efe. 5:23) “Ontulok kayo ed saray wala a manuley ed sikayo, tan pauleyan kayo ed sikara,” so insulat nen apostol Pablo. (Heb. 13:17) Walaray pankanawnawan nayarin mairap so itulok ed saray nibase ed Biblian instruksion ya iiter na saray mamatatken ed kongregasyon tayo. Ompan lapud amta tayo iray kakapuyan da et agtayo la ikabkabilangan iray simbawa ra. Balet ta nonoten tayon say Ulo na kongregasyon, si Kristo, et maliket a manguusar ed sarayan agperpekton lalaki. Kanian, say pampasakop tayo ed  autoridad da et direktan mangapekta ed pikakaaro tayo ed si Kristo. Papaneknekan tayon inaro tayoy Kristo no maliket tayon tutumboken iray instruksion na mamatatken anggaman walaray kakapuyan da.

No Iner so Pakaromogan na Maong a Kakaaro

19, 20. Anton klase na kakaaro so naromog tayo diad kongregasyon, tan antoy aralen tayo ed onsublay ya artikulo?

¹⁹ Lawas itayon aasikasoen nen Jesus, aliwa lambengat diad panamegley na panangidaulo na saray maaron pastol noagta ontan met ed pangiiter to ed sikatayo na espiritual iran atateng tan agagi ed kongregasyon. (Basaen so Marcos 10:29, 30.) Antoy reaksion na saray kakanayon mo sanen ginmapo kan milimog ed organisasyon nen Jehova? Marakep no sinuportaan day sagpot mo ya onapit ed Dios tan ed Kristo. Balet ta impasakbay nen Jesus a no maminsan, ‘saray kabusol na too et saray kaamong to lanlamang.’ (Mat. 10:36) Makapalikliket balet a naamtaan a diad kongregasyon et walaray naromog tayon kakaaro a mas maapit ni nen say agi tayo ed laman!​—Uli. 18:24.

²⁰ Diad sampot na sulat nen Pablo ed kongregasyon na Roma, dakel so agagin kinukomusta to, a mangipapanengneng a dakel so nagmaliw a maapit a kakaaro to diman. (Roma 16:8-16) Sinampotan met nen apostol Juan so komatlon sulat to ed onia ran salita: “Ikomustaan mo ak met ed kada sakey ed saray kakaaro.” (3 Juan 14, NW) Mapatpatnag met ed satan a dakel so nagmaliw a malet a kakaaro to. Panon tayon naalig so ehemplo di Jesus tan saray inmuunan disipulo no nipaakar ed maong a pikakaaro? Panon tayon napansiansia so pankakaaro diad limog na saray agagi tayo? Naebatan iratan ed onsublay ya artikulo.

Panon Yon Ebatan?

• Akin a nibagan maong a kaaro si Jesus?

• Panoy inkiwas na saray disipulo ed pikakaaro nen Jesus?

• Panon tayon napaneknekan a kaaro itayo nen Kristo?

[Tepetepet Parad Panagaral]

[Litrato ed pahina 14]

Interesado si Jesus ed iisipen tan nalilikna na saray kakaaro to

[Saray litrato ed pahina 16]

Panon tayon napaneknekan a kaaro itayo nen Kristo?