Mansiansian Aliing, a Singa si Jeremias

“Bembenan ko so salitak [“mansiansia ak ya aliing nipaakar ed salitak,” NW] pian sumpalen ko.”​—JER. 1:12.

1, 2. Akin a nikompara’d kiew na almendro so ‘pansiasiansian aliing’ nen Jehova?

SAY almendro et sakey ed saray kiew a sankaunaan a manrorosas diad kapalandeyan na Lebanon tan Israel. Diad pansamposampot na Enero o kagapo labat na Pebrero et nanengneng la ray rosas ton kolor de-rosa odino amputi. Diad Hebreon lenguahe, say ngaran to et literal a mankabaliksan na “onliliing.”

² Sanen tinuro nen Jehova si Jeremias bilang propeta to, inusar to so kiew na almendro pian iyilustra so importantin katuaan. Diad gapo na ministeryo nen Jeremias, anengneng to’d pasingawey so simit na satan a kiew. Antoy labay ya ibaga na satan? Oniay impaliwawa nen Jehova: “Bembenan ko so salitak [“mansiansia ak ya aliing nipaakar ed salitak,” NW] pian sumpalen ko.” (Jer. 1:11, 12) No panon a masakbay ya ‘onliliing’ so kiew na almendro, nibagan ‘ombabangon met na masakbay’ si Jehova pian ibaki iray propeta to, diad ontan et napasakbayan iray totoo to no antoy pansumpalan da no ag-ira ontulok. (Jer. 7:25) Tan agto manpainawa​—sikatoy ‘mansiansian aliing’​—anggad nasumpal so salita to. Nen 607 B.C.E., sinmabi so panangukom nen Jehova ed apostatan Juda eksakto ed panaon ya inggeter to.

3. Antoy seguradon gawaen nen Jehova?

³ Ontan met natan, si Jehova et aliing, a mamatbantay pian sumpalen toy linawa to. Tooren  ton tooren so salita to. Antoy epekto na saya ed sika? Kasin manisia ka a diad sayan taon 2011 et “aliing” si Jehova pian sumpalen iray sipan to? No bilang ta walay panduaruwaan tayo’d saray sipan nen Jehova, natan lay panaon pian onliing ed pantemeg ed espiritual. (Roma 13:11) Bilang propeta nen Jehova et nansiansian aliing si Jeremias. Usisaen tayo pa no panon tan akin a nansiansian aliing si Jeremias ed kimey ya inter na Dios ed sikato, diad ontan et makaaral itayo no panon tayo met a makapantultuloy ed kimey ya inter nen Jehova ed sikatayo.

Mensahen Kaukolan ya Ipasabin Tampol

4. Akin et aliwan mainomay parad si Jeremias so pangiyabawag ed mensahe to, tan akin et kaukolan ton ipasabi itan a tampol?

⁴ Manga 25 años nen Jeremias sanen sikatoy tinuro nen Jehova bilang propeta, ya aliling to et managbantay. (Jer. 1:1, 2) Balet, inisip ton uga-ugaw ni, ya agkualipikadon mitongtong ed saray mamatatken na nasyon, a lalakin maedad la tan walaan na posisyon. (Jer. 1:6) Kaukolan ton diretsaan ya iyabawag so ambelat a mensahe tan makapataktakot a panangukom, lalo la ed saray saserdote, palson propeta, tan saray manuley, ontan met ed saramay agda ‘pagbabawiay inkauges da’ tan ‘angibeneg’ ed tuan panagdayew. (Jer. 6:13; 8:5, 6) Naderal so marakdakep a templo ya impaalagey nen Arin Solomon, a sentro na tuan panagdayew ed ngalngali apatiran siglo. Say Jerusalem tan Juda et agla napanayaman, tan saray taga ditan et nakautibo. On, say mensahen niiter ed si Jeremias et kaukolan ton ipasabin tampol!

5, 6. (a) Panon ya uusaren nen Jehova so grupo na alanaan iran Kristiano natan? (b) Antoy aralen tayo ed sayan artikulo?

⁵ Diad sayan panaon, maaron angiter si Jehova na grupo na alanaan iran Kristiano ya say papel da met et managbantay, a papasakbayan da iray totoo nipaakar ed onsasabin panangukom. Sarayan alanaan et pigaran dekada lan mamapaseseg ed saray totoo a mangimano ed panaon ya pambibilayan tayo. (Jer. 6:17) Idadanet na Biblia ya aliwan matantan si Jehova. Onsabi so agew to eksakto ed panaon ya inggeter to, diad oras ya ag-iilaloan na totoo.​—Sof. 3:8; Mar. 13:33; 2 Ped. 3:9, 10.

⁶ Tandaan a si Jehova et aliing tan asingger lay matunong a balon mundo to. Say pakaamta’d satan et nepeg a mamakiwas ed saray alanaan tan saray dedikadon kaiba ra a mansiansia met ya aliing tan moriaen a kaukolan dan ipasabin tampol so mensahe ra. Sika ey? Agta nepeg met a napakiwas kan lalon onseseg ed panagpulong? No ontan so gawaen mo, nawalaan iray totoo na pankanawnawan mandesisyon no kasin manlingkor ira’d Dios o andi, ya impabitar nen Jesus a kaukolan dan gawaen. Aralen tayo pa sirin so taloran kualidad ya akatulong ed si Jeremias pian mansiansian aliing tan makatulong met ed sikatayo natan.

Aro ed Totoo

7. Ipaliwawa no panon ya pinakiwas na aro si Jeremias pian mantultuloy ya manpulong anggaman aliwan mainomay so situasyon.

⁷ Anggaman aliwan mainomay so situasyon, akin et nantultuloy a nampulong si Jeremias? Lapud inaro to ray totoo. Amta nen Jeremias a papairapen na saray palson ‘managpastol’ iray totoo. (Jer. 23:1, 2) Lapud satan, maaro tan maabagey ton ginawa so kimey to bilang propeta. Labay ton narengel na saray kabaleyan to so mensahe na Dios, diad ontan et niliktar ira. Sikatoy naermenan a maong ed onsabin panangukom ed sikara kanian nanakis. (Basaen so Jeremias 8:21; 9:1.) Sankapatnag diad libro na Tagleey so panangaro tan panangiyansakit nen Jeremias ed ngaran nen Jehova tan ed totoo To. (Tag. 4:6, 9) Sano nanenengneng mo ray totoo ya “singa ra kinatatan tan pinaulyanan a karnero ya andian na managpastol,” napapakiwas ka met kasin inabang ed sikara so makaligliwan balita na Panarian na Dios?​—Mat. 9:36.

8. Antoy pakapatnagan ya agnanem-em na sakit na linawa si Jeremias anggaman nanirap?

⁸ Anggano si Jeremias et pinairap na saramay mismon totoon labay ton tulongan, sikatoy  agbinmales odino nanem-em na sakit na linawa. Sikatoy maanos tan mapangasi, anggan diad mauges ya ari a si Zedekias! Anggan sanen inmabuloy si Zedekias a si Jeremias et napapatey, siansia nin akikasi ya unoren komon na Ari so boses nen Jehova. (Jer. 38:4, 5, 19, 20) Kasin say panangaro tayo ed totoo et singa met ed kabiskeg na panangaro nen Jeremias?

Pakpel a Nanlapud Dios

9. Akin et nibaga tayon say inkakpel nen Jeremias et nanlapud Dios?

⁹ Sanen si Jeremias et tinuro nen Jehova a magmaliw a propeta, nen unaan et nambaraan. Nibaga tayo sirin ya agnisipor so inkakpel tan inkapekder nen Jeremias. On, say makapadinayew a pakpel to bilang propeta et lapud sigpot a panagmatalek to ed Dios. Aliling to et kakkaiba nen Jeremias si Jehova bilang “sakey a makapanyari tan sakey a makapataktakot,” a tinmulong tan amabiskeg ed sikato pian nagawaan toy asainmin to. (Jer. 20:11) Talagan kabkabat si Jeremias ed inkakpel to, ta anggan legan na ministeryo nen Jesus diad dalin et abaloan na arum a si Jesus et si Jeremias a binmilay lamet!​—Mat. 16:13, 14.

10. Akin et nibagan saray alanaan a nakekeraan natan diad dalin et ‘impasen ed saray nasyon tan ed saray nanarian’?

¹⁰ Bilang “Ari na saray nasyon,” ingganggan nen Jehova si Jeremias pian ipasabi so mensahe na panangukom ed saray nasyon tan panarian. (Jer. 10:6, 7) Balet, akin et nibagan saray alanaan a nakekeraan natan diad dalin et ‘impasen ed saray nasyon tan ed saray nanarian’? (Jer. 1:10) Singa si Jeremias nensaman, sarayan alanaan et akaawat na asainmin manlapud Soberano na Uniberso. Inikdan ira na Dios na autoridad a mangiyabawag na panangukom ed saray nasyon tan panarian. Panamegley na satan ya autoridad ya inter na Sankatagyan a Dios tan say malinew a lenguahe na impuyan a Salita to, iyaabawag na sayan grupo a ‘bagoten tan deralen’ na Dios iray nasyon tan panarian diad panaon ya inggeter to. (Jer. 18:7-10; Apo. 11:18) Determinado irayan alanaan ya ag-ontunda ed sayan inter nen Jehova a kimey da a mangiyabawag ed mensahe na panangukom to ed interon mundo.

11. Antoy ontulong pian mansiansia itayon maseseg ed panagpulong anggano walaray pakakadismayaan tayo?

¹¹ No maminsan et nadidismaya itayo lapud kairapan, isusumpa, odino saray totoon pupulongan tayo et anggapoy interes da. (2 Cor. 1:8) Balet singa si Jeremias, agtayo ontutunda’d kimey tayo. Agkomon onkapuy so linawam. Itultuloy komon na balang sakey ed sikatayo so mikasi ed Dios, manmatalek ed sikato, tan ‘manpakpel a maong’ legan tayon maniilalo ed tulong to. (1 Tes. 2:2) Bilang managdayew nen Jehova, nepeg a lawas tayon aliing ed saray inter ton responsabilidad tayo. Kaukolan a determinado itayon mansiansian maseseg ya ipulong so kaderal na Kakristianoan, a niyaliling ed agmatoor ya Jerusalem nensaman. Aliwa labat lan “taon na pamalangkap nen Jehova” so iyaabawag na saray alanaan, noagta pati say “agew na kababales na Dios tayo.”​—Isa. 61:1, 2; 2 Cor. 6:2.

Maliket a Nankimey

12. Akin et nibaga tayon apansiansia nen Jeremias so liket to, tan panon ton agawaan itan?

¹² Nanliketan nen Jeremias so kimey to. Oniay imbaga to’d si Jehova: “Saray salitam aromog ira, et kinan ko ra; et saray salitam sikara nensaman ed siak so sakey a liket tan gayaga na pusok; ta natawag ak ed panamegley na ngaran mo, O Jehova.” (Jer. 15:16) Parad si Jeremias, say pangirepresenta ed tuan Dios tan say pangipulong ed salita to et sakey a pribilehyo. Wala met so pankanawnawan naandi so liket nen Jeremias sanen say inimano to et say panagbalaw na totoo. Balet, pinmawil so liket to sanen say ninonot to et say karakpan tan kaimportantian na mensahe to.​—Jer. 20:8, 9.

13. Akin et importante so panaral na aralem iran espiritual a katuaan pian mansiansia so liket tayo?

¹³ Pian mansiansia itayon maliket ed panagpulong, kaukolan a mangan itayoy “anawet a naakan,” saray aralem a katuaan ed Salita na Dios. (Heb. 5:14) No manaral itayon maong,  ombiskeg so pananisia tayo. (Col. 2:6, 7) Ipurek na satan ed sikatayo a saray gagawaen tayo et talagan walay epekto to’d si Jehova. No nanairapan itayon mangiganay panaon parad panagbasa tan panagaral na Biblia, nepeg ya usisaen tayoy eskedyul tayo. Anggan say pigaran minuto labat a panagaral tan panagdalepdep diad inagew-agew et lalon mamaapit ed sikatayo ed si Jehova tan mangiter na ‘liket tan gayaga ed puso’ tayo, a singa si Jeremias.

14, 15. (a) Antoy maabig a resulta na impanumpal nen Jeremias ed kimey to? (b) Antoy panmoria na totoo na Dios natan ed panagpulong a kimey?

¹⁴ Si Jeremias et agtinmundan angiyabawag ed pasakbay tan mensahe na panangukom nen Jehova, balet ta sankanonot to met so kimey ton “mangipaalagey tan mantanem.” (Jer. 1:10) Tan maabig so resulta na ‘impanpaalagey tan impantanem’ to. Akaliktar so arum ed saray Judio tan ontan met ed arum ya aliwan Israelita sanen aderal so Jerusalem nen 607 B.C.E. Pigara ed saratan et saray Recabita, si Ebed-melec, tan si Baruc. (Jer. 35:19; 39:15-18; 43:5-7) Sarayan kaaro nen Jeremias a matoor tan matakot ed Dios et nikompara natan ed saramay say ilalo ra et diad dalin a manusuporta ed saray alanaan a Kristiano. Panliliketan na sarayan alanaan ya ‘ipaalagey’ o pabiskegen so  pananisia na sayan “baleg ya ulop.” (Apo. 7:9) Tan sarayan matoor ya kaaro na alanaan a grupo et maliket met ya ontutulong ed matuan impanpuson totoo a naamtaan so katuaan.

¹⁵ Momoriaen na totoo na Dios a say kimey a panagpulong et aliwa labat lan parad pankaabigan na totoon ondengel ed maong a balita, noagta panangidayew met itan ed Dios. Kanian, balanglan ondengel iray totoo o andi, say panlingkor a masimsimoon ed si Jehova panamegley na panagpulong et mamapaliket ed sikatayo.​—Sal. 71:23; basaen so Roma 1:9.

‘Mansiansian Aliing’ ed Kimey Mo!

16, 17. Panon ya ipapanengneng na Apocalipsis 17:10 tan Habacuc 2:3 so inkaganatan na panaon tayo?

¹⁶ Impabitar na impuyan a propesiya ed Apocalipsis 17:10 so inkaganatan na panaon a pambibilayan tayo. Natan et manuuley la so komapiton ari, say Anglo-Amerikanon Pakapanyari ed Mundo. Nipaakar ed satan et oniay nabasa tayo: “Sano sinmabi la [so komapiton pakapanyari ed mundo], sikatoy mansiansian magano.” Natan, sayan ‘maganon’ panaon et asingger lan manampot. Oniay impaseguro nen propeta Habacuc nipaakar ed anggaan na sayan mauges a sistema: “Say pasingawey sikato ni nipaakar ed nigeter a panaon . . . Sikato so alagden mo; ta petepeteg ya onsabi, ya agmanbayag.”​—Hab. 2:3.

¹⁷ Tepetan mo pay sarilim: ‘Kasin talagan ipapatnag ko’d bilay ko so inkaganatan na panaon? Kasin ipapanengneng ko’d paraan na panagbilay ko a parad siak et asingger lay anggaan? Odino kasin ipapanengneng na saray desisyon tan prayuridad ko’d bilay a singa mabayag ni anggaan odino agak ni ingen segurado ya onsabi itan?’

18, 19. Akin et aliwa iyan panaon pian onkapuy so seseg tayo?

¹⁸ Say kimey na managbantay et agni asumpal. (Basaen so Jeremias 1:17-19.) Makapaliket ta saray alanaan a nakekeraan diad dalin et mansiasiansian determinado ed kimey da, a singa malet a “balatyang a seklang” tan “kinutaan a syudad”! Aliling to et ‘abalkesan na katuaan so awak da’ ta aabuloyan dan pabiskegen ira na Salita na Dios ya anggad nasumpal so kimey da. (Efe. 6:14) Ontan met a determinasyon so ipapanengneng na baleg ya ulop diad aktibon panusuporta ra ed saray alanaan.

¹⁹ Aliwa iyan panaon pian onkapuy so seseg tayo ed kimey. Imbes, nepeg tayon imanoen so kabaliksan na Jeremias 12:5. (Basaen.) Amin tayo et makakasagmak na saray subok a kaukolan tayon sungdoan. Sarayan subok ed pananisia tayo et aliling toy “lalaki” a kaukolan tayon pilumbaan. Balet, diad panasingger na “baleg a kairapan,” ilaloan tayon mas onloor iray subok. (Mat. 24:21) Say pipuligesgesan ed saratan a mas mairap a subok diad arapen et aliling toy pilumba ed saray “kabayo.” Pian makapilumba ed kabayo, nepeg a talagan mapaot itayo. Maabig sirin no natan ni labat et sungdoan tayo la ray subok, pian diad ontan et akaparaan itayon sungdoan iray subok diad arapen.

20. Antoy determinadom a gawaen?

²⁰ Sarag tayon aligen si Jeremias tan matalonan sumpalen so kimey tayon manpulong! Saray kualidad a singa say aro, pakpel, tan liket so amakiwas ed si Jeremias pian matoor a makapanlingkor ed 67 taon. Ipapanonot na marakdakep a rosas na almendro a si Jehova et ‘mansiansian aliing’ nipaakar ed salita to pian sumpalen itan. Singa si Jehova, mansiansia tayo met ya aliing. Agawaan itan nen Jeremias, tan seguradon nagawaan tayo met.

Nanonotan Mo Ni?

• Panon ya akatulong so panangaro pian ‘mansiansian aliing’ si Jeremias ed kimey to?

• Akin et kaukolan tayoy pakpel a nanlapud Dios?

• Akin et apansiansia nen Jeremias so liket to?

• Akin et labay moy ‘mansiansian aliing’?

[Tepetepet Parad Panagaral]

[Saray litrato ed pahina 31]

Kasin mantultuloy kan manpulong anggano walay isusumpa?