NEN 1886, inalad Bible House diad Allegheny, Pennsylvania, U.S.A. so sanlasus a kopya na Millennial Dawn, Volume I, pian iyakar ed Chicago, Illinois. Iilaloan nen Charles Taze Russell so kibunog na sayan balon volume diad saray lakoay libro. Walay sakey ya baleg a kompanya diad United States a mangibubunog na saray libron nipaakar ed relihyon. Tan inmabuloy itan ya ideliber so Millennial Dawn. Balet kayari duay simba, impawil irayan libro diad Bible House.

Naamtaan ya nampasnok so sakey ya maimpluensyan managkalar sanen anengneng ton parehon aka-display so Millennial Dawn tan saray libro to. Tinaktakot to ray akanggawa na lakoay libro ya no agda ekalen so Dawn, iyalis to tan na saray kabkabat ya kakaaro to iray libro tan negosyo ra. Apilitan so kompanya ya ipawil itan. Anggaman in-advertise ed saray dyaryo so Dawn, sineguro na saray onsusumpa ya nakansela iray advertising contract. Kanian, panon a nipasabi iyan balon publikasyon ed saray manaanap na katuaan?

Maong labat ta wala ray tatawagen ya colporteur. * Nen 1881, impakabat na Zion’s Watch Tower a kaukolan so 1,000 ya manangipulong pian sigpot-panaon ya mangibunog ed saray literatura na Biblia. Anggaman manga 300 labat iray colporteur, intayak day akaimprintan bini na katuaan diad ararawin lugar. Nen 1897, ngalngali sakey milyon ya Dawn so imbunog. Tan maslak ya angibunog et saray colporteur. Napapasarag na dakel ed sikara so melag ya reimbursement ya manlalapud kada Watch Tower subscription odino libron nipalima.

Siopa irayan makpel ya colporteur? Saray arum ed sikara et ginmapo nen tinedyer ni, arum et sanen medyo maedad la. Dakel so andiay asawa odino de-asawa ya anggapoy anak, tan pigaran pamilya so akibiang ed sayan kimey. Saray regular colporteur et sanagew ya manpupulong, tan saray auxiliary colporteur et manga sakey o duaran oras kada agew. Aliwan amin et makapan-colporteur lapud ag-iyabuloy na sirkumstansya odino bunigas da. Balet diad sakey ya kombension nen 1906, imbagad saray makayari ya agda kaukolay magmaliw ya “matattalino, sobran maabilidad, odino maong a manalita.”

Diad amin lawarin kontinente, nagagawaan na ordinaryon totoo so ekstraordinaryon kimey. Kinalkula na sakey a brother ya diad pitoran taon et sikatoy  akapangipalima na 15,000 a libro. Balet inkuan to, “Agak nan-colporteur pian magmaliw ya managlakoy libro, noagta, pian magmaliw a tasi parad si Jehova tan parad katuaan to.” Anggan iner so laen na saray colporteur, onlalamot so bini na katuaan tan ondarakel iray grupo na Estudyante na Biblia.

Binalaw na papari iray colporteur tan tinawag da ran managlako labat na libro. Oniay imbaga na Watch Tower nen 1892: “Pigpigaray makaamta ya tuan representanti [ira] na Katawan, nisay makatebek ed kagalangan ya nanenengneng na Katawan ed sikara lapud kapaabebaan tan inkamasakripisyo ra.” On, aliwan mainomay so bilay na saray colporteur. Kaukolay matibay ya sapatos tan bisikleta pian makakar ed nanduruman lugar. No anggapoy kuarta na makan-abung, isalat na saray colporteur iray libro parad naakan. Kayari sanagew ya impanpulong, sikaray naksawan balet maliket ya onsempet ed saray tolda ra odino ed inabangan ya kuarto. Sinmabi panaon, wala lay Colporteur Wagon, ya impasadyan abung a karumata, kanian akatipid ira na panaon tan kuarta. *

Manlapu la nen 1893, diad Chicago Convention of the International Bible Students Association, kaibad programa iray espisyal a sesyon parad saray colporteur. Kalaktip ed saya so mabilabilay ya pangisalaysay ed saray eksperiensya, pangisuheri na panagpulong, tan praktikal iran simbawa. Aminsan et pinaseseg nen Brother Russell iray makukulin manangipulong ya mangalmusal na dakel, oninum na gatas ed bandad alas dies, tan mangan na ice cream ya nansoftdrinks no ampetang so panaon.

Saray colporteur ya manaanap na nakaiba rad panagpulong et aka-ribbon na duyaw legan na kombension. Saray balo nin colporteur et ipipilad saray eksperiensyado. Kaukolan so ontan a panangipasal ta walay balon colporteur ya lapud nerbiyos et oniay nibaga to sanen mangipapalimay liblibro, “Agmo ya labay awa?” Pero, makapalikliket ta inawat itan na unabung tan abautismoan ed saginonor.

Oniay ninonot na sakey a brother, ‘Anto kasi, ituloy ko yay marakep ya trabahok insan ak mandonasyon na $1,000 (U.S.) kada taon parad kimey, odino man-colporteur ak la?’ Walay angibagad sikato ya anggan antoy desisyon to et parehon apresyaen na Katawan, balet mas nabendisyonan no iter toy panaon tod Katawan. Parad si Mary Hinds, say panag-colporteur so “sankaabigan a paraan pian natulongan so dakel a totoo.” Tan inkuan na mabaing ya si Alberta Crosby, “kada agew, lalok ya naaaroy kimey a Panag-colporteur.”

Diad sayan panaon, dakel ed saray ananak tan espiritual ya ananak na maseseg iran colporteur so siansia nin mamapabli ed espiritual a tawir da. No anggapo ni colporteur odino payunir ed linya na pamilya yo, agta maabig no gapoan yo la? Diad ontan, kada agew et lalo yo met a naaroy sigpot-panaon a panagpulong.

[Saray paimano ed leksab]

[Blurb ed pahina 32]

Agda kaukolay magmaliw ya “matattalino, sobran maabilidad, odino maong a manalita”

[Litrato ed pahina 31]

Colporteur a si A. W. Osei diad Ghana, nen manga 1930

[Saray litrato ed pahina 32]

Tagey: Saray colporteur a di Edith Keen tan Gertrude Morris diad England, nen manga 1918; leksab: Stanley Cossaboom tan Henry Nonkes diad United States, kaabay da ray kahon ya nankargaay liblibron impalima ra