Tepetepet na Saray Manbabasa

Akin ya nibagan “mabmabli ed pakanengneng nen Jehova” so ipatey na saray matoor ed sikato?

▪ Oniay inkanta na pinuyanan a salmista: “Mabmabli ed pakanengneng nen Jehova so ipatey na saray matoor ed sikato.” (Sal. 116:15, NW) Papablien nen Jehova so bilay na kada tuan lingkor to. Balet, sarayan balikas ya inalad Salmo 116 et ag-ontutukoy ed ipatey na sakey ya indibidual.

Diad funeral discourse na sakey a Kristiano, aliwan matukoy ya usaren so Salmo 116:15 anggano say agi et inatey ya matoor ed si Jehova. Akin? Lapud mas malaknab so kabaliksan na satan ya imbaga na salmista. Say labay ton ibaga et ag-iyabuloy na Dios ya ompatey so amin ya matoor ya lingkor to lapud mabmabli rad pakanengneng to.​—Nengnengen so Salmo 72:14; 116:8.

Ipapaseguro na Salmo 116:15 ya ag-iyabuloy nen Jehova ya bilang grupo et naupot iray matoor ya lingkor to diad dalin. Diad tua, graben subok tan panamasegsegang so asagmak na saray agagi tayo diad apalabas iran dekada balet ta asungdoan da itan. Papaneknekan na satan ya agbalot iyabuloy nen Jehova ya napalanit iray lingkor to.

Lapud Makapanyarin-amin si Jehova tan seguradon nasumpal so gagala to, agto iyabuloy ya ompatey itayon amin. No bilang ta iyabuloy itan na Dios, di singa ompaway ya mas mabiskeg iray kalaban nen say sikato! Imposible ’tan! Sakey ni, no ontan so nagawa di agnasumpal so gagala nen Jehova a sayan dalin et panayaman na saray totoon matoor ed sikato. Imposible lamet itan! (Isa. 45:18; 55:10, 11) Anggapo lay mangiyapay na sagradon serbisyo ed si Jehova no anggapo lay toon natilak ya mandayew diad mangaraldalin ya lolooban na baleg ya espiritual a templo to! Anggapo met lay totoon manugyop ed “balon dalin”​—matunong iran totoo ya manayam diad dalin ya uleyan na “balon tawen.” (Apo. 21:1) Agmet nagawa so Sanlibon Taon ya Uley nen Kristo no anggapoy uleyan to diad dalin.​—Apo. 20:4, 5.

Nakuestion so posisyon tan reputasyon na Dios no iyabuloy ton palaniten na saray kalaban to so amin ya lingkor to diad dalin. No ontan so nagawa, pakabalawan itan na posisyon nen Jehova bilang Soberano na uniberso. Niarum ni, apektadoy kagalangan tan ngaran to. Tan isipen pa iya: Si Jehova et “matunong tan maptek” ya Dios, kanian seguradon salimbengan to bilang grupo iramay matoor ya manlilingkor ed sikato. (Deu. 32:4; Gen. 18:25) Ontan met, say ideyan naandi so amin ya lingkor to et sumlang ed sayan ibabagay Biblia: “Si Jehova agto ikaindan so baley to nipaakar ed baleg a ngaran to.” (1 Sam. 12:22) On, “si Jehova agto ibantak so baley to, nisay ikaindan to so tawir to.”​—Sal. 94:14.

Makapaliket ya naamtaan ya agbalot naupot so amin ya lingkor nen Jehova diad dalin! Paneknekan tayo sirin ya naynay itayon matoor ed Dios, tan manmatalek ed sayan sipan to: “Anggapo so ayura ya agawa a sumpa ed sika ya onaligwas naani; tan balang sakey a dila ya onsumpa ed sika ed pangukom dusaen mo naani. Saya sikato so tawir na saray ariripen nen Jehova, tan say inkatunong da a manlapu ed siak.”​—Isa. 54:17.

[Blurb ed pahina 22]

Agbalot iyabuloy na Dios ya napalanit iray lingkor to